WILLEMSTAD - E programa estilo di talk show ku ta pasa semanalmente na Tele Kòrsou “Un dia Den bida” ta presentá e siman aki e historia trágiko di kuater hóben ku a pèrdè nan bida den un aksidente ku un avioneta na aña 1994 na Watamula. Despues ku seis hóben, kuater hòmber i dos muhé ku edatnan entre 15 pa 21 aña a sali pa dal un trep, e anochi ta kulminá ku e idea pa joyride un avioneta tipo PJ-CAD di un motor. E piloto tabatin solamente 22 ora di eksperensia bulando avion i no tabatin konosementu di kon pa lesa e instrumentonan ni tampoko kon pa papia via di radio di avion. Riba dje ora ku nan a lanta buelo bai, tabata pasá di 2’or di mardugá i naturalmente ku un bista nulo, ku ta via di e instrumentonan so un piloto por sa unda e ta bulando.
Dor di e poko eksperensia di e piloto di 21 aña ku tabata ku tres otro pasahero, ya ku dos mester a keda tera, pasobra ta kuater persona so e avioneta ta karga. Tur kos tabata na nan fabor. Nan por drenta fásil den e Aéreo Klup di Kòrsou. Usa un yabi ku no ta di e avion. Haña outorisashon di toren pa lanta buelo, despues di a dal un keiru pidi toren pa hasi un “touch and go”, es decir baha e avion i lanta di biaha. Esaki ta e momentu ku e piloto ta tuma rumbo di Banda Abou i dor di ko’i direkshon di laman grandi ta pèrdè noshon di unda e ta, ta bruha por kompletu i na Watamula ta plama den e baranka haltu di dicho lugá. Destrosando e avion por kompleto i ku tur kuater okupante den dje. Ta horibel loke ku outoridatnan a bin enkontra na e sitio di loke ku a resta di e hóbennan. E storia aki ta wòrdu kontá pa e hóben Franklin Antion Jr., ku ta e outor di e buki ku ta relatá e suseso tristu aki.
Sintonisá Tele Kòrsou i Un Dia Den Bida pa otro edishon espektakular i un storia ku a konmové Kòrsou kompletu, djadumingu anochi pa 10’or. Poentje a informá ku lo tin footage nunka pasá na TV. Asina ta ku e invitashon ta hasi i bo tin un kompromiso un biaha mas ku bo programa preferí Un Dia Den Bida.