PARIS, Fransia, - Ku e reseshon gòlpiando su portanan, Europa ta tene su promé kumbre di alto nivel na Paris awe, pa konfrontá e krísis finansiero, sin un plan di akshon na bista i ku notorio divishonnan interno.
Konvoká di urgensia pa e presidente anfitrion, Nicolas Sarkozy, e lidernan di Alemania, Italia i Reino Uní, tambe e máksimo herarkianan europeo, lo buska mehorá nan kordinashon pa salba e bankonan for di bankarota i reformá e regulashon kontabel.
E intenshon ta logra un konsenso europeo promé ku e reunion di ministernan di Finansa i gobernadornan di Bankonan Sentral di G8, siman benidero, na Washington, Merka.
No opstante, e idea di krea un fondo europeo di reskate bankario similar ku esun aprobá na Merka, ventilá pa Fransia, a keda deskartá frente oposishon di Alemania i di Reino Uní.
“Nos tur mester ta di akuerdo pa intervení ora ta hasi falta, pa evitá kualke riesgo sistémiko”, e sekretario di Estado franses di Asuntunan Europeo, Jean-Pierre Jouyet a bisa oranan promé ku e reunion.
Vários banko grandi europeo ta na rant di kiebro, debí n’e krísis di kréditonan hipotekario di alto riesgo na Merka (“subprime”), i ta’tin ku nashonalisá nan parsial òf totalmente den último dianan.
Entre e bankonan asistí ta figura e banko belgo-ulandes Fortis, e banko franko-belgo Dexia i e banko britániko Bradford & Bingley.
Fransia a bira, ademas, den e promé gran ekonomia europeo ofisialmente den reseshon.
“Na lugá di tin 27 kontesta nashonal, ta trata di ku por tin algun tipo di harmonisashon” frente e krísis, e ekonomista Carlos Quenan, profesor di Universidat Sorbonne-Nouvelle, a splika.
Di un banda, e lidernan lo diskutí “si tin márgen di maniobra pa desaroyá algun tipo di polítika pa konfrontá e tendensianan resesivo”, Quenan a sigui bisa.
Quenan a deskartá, sin embargo, ku e idea di un plan di reskate europeo por keda kristalisá.
Ideanan riba mesa
Alemania ta ninga usa e sèn di e kontribuyentenan pa reskatá e bankeronan ku a kometé erornan.
“Ya no tin mas konfiansa den bankonan. Esei ta e motibu prinsipal di e krísis finansiero. Pidi e Gobièrnu pa riska sèn di e kontribuyentenan ta parse inhustifikabel”, e minister di Ekonomia aleman, Michael Glos, a bisa.
Ulanda e siman aki a proponé krea fondonan nashonal di reskate bankario na Europa ku asta 3% di e Produkto Nashonal Bruto (PNB) di kada pais, pa un total di 380.000 mion euro (525.500 mion dollar) entre 27.
Na e kumbre lo partisipá tambe e presidente di Komishon Europeo, José Manuel Durao Barroso, e hefe di ministernan di Finansa di Eurozona, Jean-Claude Juncker, i e presidente di Banko Sentral Europeo (BCE), Jean-Claude Trichet.
BCE a mantené su tasanan di interes e siman aki, pero a duna señalnan di ta habrí pa un próksimo rekorte pa stimulá e kresementu.

Foto: Nicolas Sarkozy 0410

Nicolas Sarkozy