WILLEMSTAD – E barku Freewinds ta drenta haf di Kòrsou dia 22 di òktober próksimo. Durante dos dia lo tin un seminario na bordo di e barku tokante prevenshon di polushon. Algun tempu pasá Freewinds mes tabata envolví den un eskape di asbèst akí na Kòrsou.
E seminario ta bou di ouspisio di The Regional Activity Center – Regional Emergency Information and Training Center for the Wilder Caribbean Region (RAC/REMPEITC-Caribe), huntu ku e International Maritime Organization, United Nations Environment Program. E seminario ta pa formuladónan di maneho, ekspertonan di medio ambiente, atministradónan marítimo i outoridatnan riba tereno di ‘waste manegement’. Lo atendé e ratifikashon i implementashon di Annex V di e International Convention pa prevenshon di polushon di barkunan. Prinsipalmente tiramentu di shushi den laman.
Remarkabel ta ku despues di e suseso kaminda asbèst a plama riba e barku, outoridatnan a keda ketu. Nunka a bira konosí kiko tabatin skibí den e rapòrt ku DAZ a laga traha. Intentonan pa haña e resultadonan serka diputado Eugène Rhuggenaath no a logra, ounke ku el a duna DAZ instrukshon pa suministrá e datonan na LA PRENSA.
Un bosero di Inspekshon Marítimo a bisa ku e barku a haña lus bèrdè di outoridatnan lokal pa sigui ku su aktividatnan. E barku tabata na Aruba kaminda e hasi sierto reparashonnan. Te awe a keda un misterio kiko eksaktamente a pasa den e kaso aki. E bosero a bisa ku di tur manera nan a haña pèrmit pa e seshonnan tuma lugá na bordo di e boto.