WILLEMSTAD – Aqualectra lo no aseptá ku ta mancha nòmber di e kompania, ni lokalmente ni internashonalmente. Asina e kompania ta bisa relashoná ku e anunsio di e kompania Vantage Consulting Inc. ku a entregá un keho kontra e direktor interino di Aqualectra Anton Casperson na Merka. Ku e anunsio di e kompania e siman aki henter e kaso di Vantage a bolbe lanta kabes.
E kompania lokal ta bisa ku el a tuma nota di e karta di Vantage Consulting Inc. ku a sali den medionan di komunikashon i ta konsiderá komo su deber pa reakshoná riba esaki.
Segun e kompania, den luna di ougùstùs Hunta di Komisario di Aqualectra representá pa presidente komisario a informá e kompania Vantage atrobe pakiko a wanta ku e último pago. “Despues di diferente korespondensia, den e último karta a bolbe splika ku Vantage no a kumpli ku tur su obligashonnan manera a kumbiní den e kontrato, e ‘Terms of Reference’ i e reglanan di ouditoria. Aqualectra ta refutá ku den ningun forma e Gerensia o kualkier personal di e empresa a aktua den un forma ilegal òf no konforme ku lei i regla di nos pais òf regla di Estádos Unídos, manera Vantage ta insinuá”, asina e kompania ta bisa.
Mas aleu Aqualectra ta bisa ku a ehekutá e ouditoria konserní den kuadro di e struktura legal di e empresa. “E órgano den Aqualectra ku ta responsabel pa ku esaki, ta netamente e Hunta di Komisario di e empresa i no e Gerensia. Sí ta asina, ku den kuadro di e empresa su struktura legal, solamente e Gerensia por representá e empresa, rason pakiko e diferente korespondensia di e empresa ku, den e kaso aki, Vantage a kana via di Gerensia. Gerensia por hasi esaki solamente riba instrukshon di e Hunta di Komisario. Den e kuadro aki, Aqualectra ta haña ku ta inakseptabel ku e empresa òf e gerensia di e empresa su bon nòmber ta wòrdu tachá dor di e akto aki di Vantage. Den e kuadro aki, básikamente tin un disputa entre Vantage i Aqualectra, i den e kaso aki Vantage ta hiba di opinion ku e tin derechi riba pago, pa e servisio ku el a brinda Aqualectra, e kaminda korekto den esaki ta via nos sistema di lei i no dor di trata di daña Aqualectra o e Gerensia su bon nòmber den komunidat. Despues di a tuma nota di e último korespondensia di Vantage i tambe lokual a publiká den medionan di komunikashon, Aqualectra a haña ta su deber pa informá korektamente tur esnan ku a risibí kopia di e karta di Vantage na Aqualectra. Tambe Aqualectra a instruí su bufete di Abogado, pa lokal i internashonal atendé e asuntu aki ku Vantage debidamente. Aqualectra ta bolbe enfatisá ku for di un prinsipio e empresa ta di akuerdo ku e deseo di Bestuurscollege di Kòrsou pa realisá ouditoria den e empresa. E empresa semper a duna di konosé ku esaki mester sosodé den kuadro di e struktura legal. Pa e motibu aki, Bestuurscollege, StIP i e Hunta di Komisario di Aqualectra konhuntamente a determiná e ophetivonan i kuadro di e ouditoria, basá riba kual Vantage a ofresé su servisio kontra di pago. Dado kaso, Hunta di Komisario no ta di akuerdo ku e forma i nivel ku Vantage a realisá òf keda sin realisá e ophetivonan, e ta responsabilidat di e órgano aki pa retené parti di e pago. Gerensia den ningun forma no ta den posishon pa bai kontra di esaki, ni pa kambia e ophetivonan stipulá den e TOR, manera Vantage ta pretendé. Finalmente Aqualectra ta informá ku lo e aktua severamente kontra tur esnan, lokal i internashonal ku kier tacha nos bon nòmber, ku tur instrumento legal na nos disposishon”, asina e direktor interino Anthon Casperson a bisa.