WILLEMSTAD – LA PRENSA a haña informashon for di diferente sitio na Kòrsou ku ta menshonando presensia di abehanan den último dianan. Despues di un periodo relativamente ketu, abehanan a hasi akto di presensia atrobe den sentronan habitá.
Un eksperto ku LA PRENSA a papia kuné a bisa ku ta tempu di abeha. Miéntras tantu no tin konklushon pa loke ta trata e maneho ku Gobièrnu di Kòrsou ke bai hiba riba e tereno aki. Gobièrnu di Kòrsou a anunsiá ku ta bai atendé e asuntu aki despues di dos kaso fatal, pero te awe no tabatin konklushonnan definitivo den e kaso. Remarkabel ta, ku di e yamadanan ku LA PRENSA a haña , mayoria ta di e área di Bándariba. Algun hende a reklamá, ku nan a trata di atendé e situashon nan mes, pero ku e ekspertonan ku por kue e abehanan ta pidi sumanan pa nan trabou ku nan no por paga. Nan a pidi LA PRENSA pa mustra outoridatnan riba e situashon aki. “Kiko nan ta warda? Mas morto?’, asina un di nan a puntra ku tono indigná.
LA PRENSA a haña un karta e siman aki tambe di Ronchi Marlin, ku a menshoná ku tin abeha na Bankwerkersweg number 8. Pegá ku e kas aki (na number 10) tin un krèsh pa mucha di 3 pa 5 aña. Einan tin basta mucha ta bishitá e krèsh aki. E tambe ta puntra ta kiko ta warda.