Lorito ta yama tur hende un felis djasabra. Naturalmente Lorito ta pendiente kuantu hende lo manda kuminda di para pe awe. Nos no a tende di Marvis awe ku tur aña ta yama nos riba nos dia. Marvis, nos no a lubidá riba nos regalo di tur aña!
*********
Un pabien na tur animal awe, entre nan Prikichi, Nòñò, Wiwi, Focks, Fifty, Rico, Lady, Snuchi, Max, Fidel, Hugo, Beauty, Dukey, Beaver, Kew Kew, Beyonce, Big Mac, Kabul, Kachochi, Mupi, Negrita, Maron, Caspar, etc. etc.
**********
Nos a lanta den bon ambiente awe despues di mira kon dos aktividat na Kòrsou ta demostrá kon nèchi hende nos ta i kon nos ta (i por) komportá. E homenahe na Churandy a kana masha bunita, ounke pa nos pensamentu por tabatin mas hende. Posiblemente e momentum a bisa den e kaso di Churandy. Hopi hende ta simpatisá kuné, pero no tabatin e energia despues di un siman di trabou pa sali for di nan kas bai stadion. Di tur manera pueblo a kumpli ku su yu.
*********
Awe ta bai tin un aktividat mas i nos ta spera ku Churandy lo sigui trata tur hende meskos i sin restrikshon. Un biaha mas a resultá ayera e diversidat di nos pueblo, pasobra ta for di tur gremio a sali hende pa partisipá na e homenahe aki. Nan a manda un señal kla tambe ku e profetanan di maldat (sòri Nelson, nos a usa bo palabranan!), lo no haña fèrtil na Kòrsou. E pueblo aki lo rechasá nan tur na nan debido tempu! No por ta otro, pasobra e pueblo aki ke biba den harmonia.
*********
Un otro aktividat ku nos mester menshoná, ta e tremendo fiesta di Grupo Globo na WTC ku patrosinio di Curom. Un aktividat masha bunita ku hende nèchi i desente. Nada di griteria, nada di diskushon i sigur no tabatin pleitu pa ken ta baila ku ken i nada di ken tabata ku ken. Nos ke remarká un biaha mas, ku ta masha lástima ku hopi dama ta sali nan kas, bon peñá bon makiyá i bon bistí sin por haña un hende pa baila ku nan. Mester analisá e situashon aki masha lihé. Lástima ku Lorito a bul, pero no por a atendé ku tur. Hopi di nan sigur meresé mihó!
*********
Papiando di karnaval, nos a ripará kaba, ku e próksimo diskushon grandi ta riba e ruta di karnaval. Mester tuma un desishon purá riba e kaso aki. Lorito ta di e grupo ku ta kere ku karnaval mester pasa den Sentro di Suidat. Ku medidanan adekuá mester ta posibel pa logra e desishon aki. Nos ta kreativo pa mil i un kos i nos por ta kreativo pa esaki tambe. Ademas asuntu di zonido i edifisio por ta bèrdat, pero dia ku F-16-nan a pasa raska den Otrobanda nada no a pasa!
*********
Nos ta kere ku tin biaha ora nos pensa ku un kos ta bai pasa, e lo pasa. Poder di mente ta un kos masha serio. Nos ta deseá Doña Marilyn hopi éksito ku e punto aki ku sigur lo bira un diskushon di otro mundu. Kòrda ku si tin argumentu konvinsente pa marcha no pasa den Kaya Grandi, laga nos sa nan i konvensé nos tambe! Tòg pa nos, karnaval nunka no tabata mas loke e tabata for dia ku a sak’é for di Kaya Grandi!
*********
Nos a komprondé ku Terry Hernandez & Associates ta sigui ku su kaso den e asuntu di análisis di riesgo na Curoil. Parse ku nan a manda bisa STIP, ku nan no ta aseptá e desishon. Nan a haña un karta di ofisina di abogado Kunneman ku a bisa nan ku aparentemente ta trata di un “misverstand”. E kompania no a aseptá e splikashon i komo ku nan no a tende mas di bufete, nan a hinka e kaso den man di STIP. Si ta nesesario lo bai mas leu tambe, asina Lorito a komprondé.
*********
Nos ta keda te aki awe. Te djaluna awor ku Dios su poder!