WILLEMSTAD – “Blessed Hands”, un eksposishon di komersiantenan chikí kristian a keda inougurá ayera nochi pa diputado pa Asuntunan Ekonómiko, Eugène Rhuggenaath na House of Worship. Un proyekto komo parti di vishon di pastor Raimy Juliet ku ta pastoriá e kongregashon di House of Worship. Eksposishon ku ta duna oportunidat na komersiantenan chikí kristian pa eksponé nan servisio i produktonan na un eskala mas grandi. Ku e meta pa alkansá mas kliente i duna informashon, “Blessed Hands” a mira lus. Den su diskurso diputado Rhuggenaath a trese dilanti, ku ta trata di un proyekto bunita i ku sigur mester motivá otronan ku e mihó manera pa hasi negoshi ta atraves di Dios. E mandatario a indiká, ku hopi por bisa ku religion no por kana huntu ku negoshi, pero e ta kere ku esaki ta e mihó forma pa hasi negoshi sano.
Ademas, diputado Rhuggenaath a mustra ku e èkspo aki no tin duda ku lo kombertí den un evento karibense. Un total di 39 partisipante ku ta duna servisio i produkto riba diferente tereno manera músika, lès, floresteria, kostura, beyesa, kos dushi, kontratista i otro aktividatnan. For di e apertura ayera nochi pastor Raimy Juliet a afirmá, ku tur aña lo pèrkurá pa organisá e evento i ku pa 2009 lo ta muchu mas grandi ainda. E eksposishon ta tuma lugá na Erosweg 52, kaminda ántes tabata Jumbo Supermarket.

Score: 0.0, Votes: 0