WILLEMSTAD – “Hisa bo mas pa mi wak bo”, promé evento riba djabièrnè mèrdia riba Brionplein ku karakter pa hubentut a tuma lugá ayera. Tabata e promé enkuentro pa aserkamentu di hóbennan despues di skol, den kua ku músika di nan género ta keda presentá. Ayera Mas Bida Abundante a organisá un evento pa ministrá na kurason di e hóbennan. A konta ku presentashon di MC Koen, Eric Jacobino i Los 3 Escogidos. Tur e presentashon musikal gospel a keda komentá i tabata un forma pa animá e hóbennan pa kambio den nan kurason i pensamentu.
E evento di aserkamentu aki a nase na momentu ku hóbennan tur djabièrnè ta reuní riba Brionplein despues di skol i ku sa tin sierto aktonan di violensia ku ta tuma lugá. Esaki a trese kuné ku polisnan ta subi Brionplein pa plama e grupo for di otro. Mas Bida Abundante ta kere ku kontrali ku hopi ta pensa, mester por proveé aktividat sano pa hóbennan den nan ambiente pa logra ku nan por keda konsientisá pa positivismo. Ademas ta kere ku mester por presentá oportunidat den kua e hóbennan por ta huntu, pero pa kompartí, en bes di violensia òf otro aktonan di malisia.
Pa e okashon aki tambe a laga un hóben Erwinella Lichtenberg ku ta bishitá MIL tambe hiba palabra na e hóbennan. Erwinella a ekshorta pa buska Dios riba tur kos i tene na e Palabra di Dios. Jadiel Emerenciana ku tambe e duna su testimonio i pa spièrta hóbennan riba eskoho robes. Tresiendo su mes bida dilanti, Jadiel a atvertí e hóbennan pa no buska plaser i kosnan den banidat, pero pa mas konfiansa den Dios. E promé enkuentro aki a kontribuí pa presentá un plataforma diferente den kua por nifiká pa konstruí un komunidat sano, pa prevení pa un manera di biba pa medio di temor di Dios.