LAS VEGAS, Nevada, Merka, - E eks hungadó di futbòl amerikano i aktor O.J. Simpson a keda deklará kulpabel di 12 kargo di atrako arma, intento di sekuestro i atrako ku un arma mortal, pa un Tribunal di Las Vegas, Merka.
O.J. Simpson, di 61 aña di edat, a keda akusá di atraká dos bendedó di piesanan di kolekshon, mas ku un aña pasá, den un kamber di un hotèl di e kasino Palace Station di Las Vegas.
Inisialmente, Simpson a bisa ku su úniko intenshon tabata rekuperá su propiedatnan.
Su kómplise, Clarence “C.J.” Steward, tambe a enkontré kulpabel di tur akusashon.
E hurado di nuebe dama i tres hòmber a deliberá durante mas ku 13 ora, ayera.
Simpson lo por pasa sobrá di su bida tras di trali, ya ku e kargonan di atrako armá ta impliká un sentensia di prizòn obligatorio i pa e intento di sekuestro e eks estrea deportivo lo por konfrontá un kondena di kadena perpetua.
Despues di e lektura di su veredikto, Simpson, kende a ninga e akusashonnan, a keda di bui i kondusí pa prizòn sin fiansa.
E lo keda sentensiá 5 di desèmber.
13 aña pasá
Ta hasi eksaktamente 13 aña pasá, 3 di òktober 1995, a deklará Simpson inosente di asesinato di su eks esposa, Nicole Brown, i di un amigu di Nicole, Ronald Goldman.
Sin embargo, un tempu despues a enkontr’é kulpabel den un huisio sivil i a dun’é òrdu pa paga 33.5 mion dollar den dañonan, algu ku e no a hasi.
Na yüli 2007, e derechonan di e outor di buki di Simpson titulá “If i Did It” (Si m’a hasie) a keda entregá na famia di Ronald Goldman, ku e meta di rekobrá e kantidat di e demanda.
Inisialmente e buki, den kua Simpson a skibi kon e lo a mata su eks esposa i su amigu, a keda publiká aña pasá pa e editorial Beaufort Books.
Famia Goldman a añadí komentarionan na e manuskrito original i e buki a keda publiká bou di título “If I Did It: Confessions of the Killer” (Si m’a hasié: Konfeshonnan di e Asesino).

Foto; O.J, Simpson 1410

O.J. Simpson, di 61 aña, por pasa sobrá di su bida tras di trali.

Foto: O.J. Simpson 1 1410

Mira kon Carmelita Durio (man robes) ruman muhé di O.J. Simpson huntu ku su amigu Tom Scotto ta reakshoná ora a deklará Simpson kulpabel.