Skina di Sorti, awe djasabra 4 di òktober di 2008, ta kuminsá ku deseá tur hende un bon dia. Un biaha mas mester konstatá ku nos aserkamentu den kestion di gobernashon ta pober. Si gobernashon ta un kestion di antisipá i prepará, un aserkamentu di tene e rabu di baka i keda konfrontá ku su sushi ta unu defisiente. Gobièrnu mester reprochá su mes ku en bes di antisipá ela pone peso di su mensahe na komunidat riba krea i mantené e persepshon ku gobièrnu ta hasiendo un bon trabou.
****
Te hasta esnan ku a konsiderá ku esnan ku ta den e aktual koalishon lo por hasi un mihó trabou ku esnan ku a keda for di e koalishon, no tin mag di atendé e gobièrnu ku wante di felpa. Al kontrario. Nan mester pone preshon pa evitá ku nan defroudamentu di elektorado lo trese esnan ku ta wòrdu konsiderá ménos bon òf malu ta tuma asiento. Nan mester kompaña gobièrnu krítiko i kaminda gobièrnu ta “underperform” den forma sistemátiko, mester apuntá esei.
****
Na vários okashon mi a apuntá ku prestashon ekonómiko bou di nivel, ta ser kamuflá pa e falta di uso di kriterionan ophetivo pa evaluá akshonamentu gubernamental. Ta un echo ku partisipashon den e sektor di narkotráfiko ta haltu, produktividat ta bou, teknologia ta hopi atrasá, i partisipashon na enseñansa di adulto ta bou. Ta un echo ku tin un problema di formashon.
****
Mester konstatá ku duele ku nos ta fayando den aspektonan ku ta den nos esfera di influensia. Gobernantenan ta transmití un mensahe di sinta warda pasobra kos ta bai den bon direkshon en bes di transmití e mensahe di esfuerso kontinuo pa mehorá prestashon. Nos ta faya den promové “volksvlijt”, tin muchu inklinashon pa wak trabou di ofisina (gobièrnu, banko, seguro, etc.) i poko ambishon pa sigui krese despues di haña un puesto.
****
Ta un realidat amargo ku e lokual tradishonalmente ta ser konsiderá “cost of doing business” ta keda haltu òf te hasta ta subi pasobra no tin un filosofia di krea i mantené bentaha kompetitivo. Kosto di energia pa definishon por lo pronto ta pafó di nos esfera di influensia. Pero kosto di labor, artifisialmente ta eksageradamente haltu. E kosto ta artifisialmente haltu pasobra te hasta esnan sin trabou no ta dispuesto di baha nan preis pa haña un trabou.
****
Pa añanan ta papia di fleksibilisashon pero te ainda “entry regulations” ta un kaminda di krus pa tardansa den prosesamentu di pèrmitnan. “We prijzen onszelf uit de markt”. Práktika polítiko ta pone ku persepshon ku diferente parlamentario populista ulandes ta kere di mester krea ku denominashon manera “roversnest”, no por wòrdu rechasá ku mas ku forsa. Si ántes klima polítiko, di nos pais den mi konsepto tabata “score” un 3 trankil den un eskala di 1 pa 5, awe nos ta bou di averahe i ta lèn den direkshon di un 2.
****
Por lo general sa usa 6 dimenshon pa “governance”. Riba e promé aspekto ku ta e kalidat dje demokrasia dor di bos, voto i responsabilisashon (“Voice and Accountability”), mi a bini ta mustra kon esaki a deteriorá. Ta goberná konforme un filosofia ku no ta esun di Socrates, pero mas serka esun di “the wise must lead and the ignorants should follow”. E proseso estatal ta un ehèmpel klásiko di esei. Un proseso dje masa ta eksklusivamente di e elenko polítiko.
****
Pa e di 2 aspekto ku ta “Political Stability/Lack of Violence” e deterioro ta mas remarkabel. Denter di koalishon tin midimentu di pènchi, miéntras ku esenanan denter di propio sala di Konseho Insular, dilanti dje sala i na sitionan públiko ta mustra kon violensia físiko a bin kompañá esun verbal entre polítikonan.
****
Pa lokual ta e di 3 aspekto ku ta “Government Effectiveness” nos por ta korto. Puntra ken ku bo ke na skina di hanchi si e ta haña ku su espektativa pa lokual ta gobièrnu a keda realisá i e kontesta dje mayoria ta negativo. Mi a mustra ku tin kestion di defroudamentu grave pasobra “gerechtvaardige verwachtingen” a keda malamente violá pa akshonamentu kontrali.
****
Pa lokual ta e di 4 aspekto ku ta “Regulatory Framework” (un di e puntonan ku nos tabata mas fuerte den dje), tambe nos a flakiá. Riba papel kos ta parse bon, pero kaminda akshon mester duna kontenido na lokual ta riba papel, diverso aktor polítiko ta konvertiendo nos estado di derecho den un “mockery”.
****
Pa lokual ta e di 5 aspekto ku ta “Rule of Law” (tambe un parti ku tabata representá fortalesa “de politiek” a kuminsá flakiá), nos a bini ta ripara ku pensamentu di persona i grupo di influensia rondó di dje ta duna nos estado di derecho e aparensia di un estado kaminda tin “rule of affiliation”. Ta kestion di ta ku nos òf kontra di nos.
****
Pa lokual ta e di 6 aspekto ku “Corruption Control” kos a kue un direkshon sumamente peligroso. Kaminda “botsende bestuursculturen” ta forma un pakto, bo tin ku papia di “collusion” kaminda “collision” lo ta e proseso ku un komunidat ta benefisiá di dje. Pa logra e ophetivo (aprobashon di e Slotverklaring” a hasi konseshon inakseptabel pa lokual ta aplikashon di regla di bon gobernashon.
****
“Het oogluikend toelaten” a bira e tendensia denter di Bestuurscollege kaminda esnan ku kuadro di rasonamentu mihó ta kamuflá nan akshonamentu inkorekto mihó. Mi a amplia hopi riba e aspekto aki den kurso di dianan ku ta tras di lomba i lo keda riba dje pasobra e ta konstituí un peliger eminente pa futuro nivel di gobernashon di pais.
****
Si nos ke drecha kos, nos mester kuminsá, pa lokual ta “de politiek” pa hiba debate riba un nivel aseptabel. Stòp ku tiramentu di palabra i prosa sin supstansia. En bes di bisa ku kos ta bon òf ku nos lo bai dilanti, kue e diferente indikadónan i mustra unda nos ta para. Kuminsá na “rate” nos mes. “Benchmark” kontra di e lokual otronan den region, ku ta aparesé den e diferente “ranking” nan ofisial a haña na kalifikashon i pone nos resultadonan banda di esun di nan.
****
Nos prestashon ta leu bou di e averahe general di e region. Pues nos gabamentu di nos mes ta keda kontrarestá pa echonan seku. Kere mi ku si nos kuminsá aseptá e realidat ku ta ku sodo, sanger i lágrima (“blood, sweat and tears”) por tin avanse. Nos mester stòp di kere ku kos ta bini di su mes, ta un mito (“soñar no cuesta nada”). Den e realidat di mundu kompetitivo e realidat ta ku “camarón que se duerme se le lleva el rio”.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te otro mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.