WILLEMSTAD – Ku bon picheo di Johannes Gregorius Jr. durante di seis ining, kaminda e no a permití kareda na e selekshon di Aruba, Antia Ulandes ayera den e di dos partido den stadion Alfonso Carrasquel ta logra triunfo di 10-5 riba Aruba.
“Didi” Jr. a sali i dos relevista Gerald Gregorius i Rivelien Elisabeth a bin permití karedanan di Aruba.
Orsendo Clemencia a bin terminá e partido. E selekshon di Antia atrobe a hunga impekabel.
Antia tabata tin dos honron den e partido, unu di Ardley Jansen i un otro di Lorvin Louisa.
Antia a bati basta hit kontra di Aruba i Djohnny Joubert i Lorvin Louisa tabatin dos hit kada unu.
Awe Antia ta enfrentá e fuerte ekipo di Puerto Rico den e di dos partido den stadion Alfonso Carrasquel.
E promé partido ta bai entre Mexico i Nicaragua.
Na kabes di e tabla di posishon aktualmente tin tres tim empatá, kual nan ta: Nicaragua, Puerto Rico i Antia tur tres ku rekòrt di 5-1.
Antia falta dos wega mas pa hunga ainda, awe kontra di Puerto Rico i mañan kontra di Mexico.
E otro resultadonan di ayera ta:
Nicaragua a gana di Brazil 4-2
Mexico a gana di Panamá 6-5 i Venezuela a gana di Puerto Rico 5-4.