WILLEMSTAD – E situashon na Universidat di Antia (UNA) ta sigui sin solushon no opstante e deliberashonnan di ayera. E studiantenan a anunsiá ku e akshonnan lo sigui djaluna awor.
Miéntras tantu hopi ta esnan ku ta mustra solidaridat ku e studiantenan, ounke aki aya algun no ta tolerá pa nada stroba nan di nan rutina diario. Asina por kalifiká e insidente ku a tuma lugá ayera, kaminda a manda outo riba studiantenan.
Monseñor Amado Römer ta un di e lidernan spiritual ku tambe a duna akto di presensia na universidat, p’asina duna e studiantenan un palabra di enkurashamentu. Esaki el a hasi riba invitashon, segun nos a komprondé Monseñor Römer a hasi un apelashon riba e studiantenan pa pensa, pasobra nan tin e privilegio pa forma nan mes komo hende. Mester respetá nan komo tal; un ser responsabel ku derecho i deber. Pero aktualmente tin algu ta stroba e desaroyo aki. Monseñor Römer a atvertí e studiantenan, pa no laga manipulashon stroba nan. Segun Monseñor Römer, ta hopi manipulashon ta tumando lugá. El a enfatisá, ku studiantenan tin derechi pa sali pa nan derecho. Asina el a rekòrdá kon ántes a pensa ku nos no tabata por i asina dia a traha Peter Stuyvesant College a spera ku ta 10% lokal so tabata kapas pa studia, pero a resultá ku ta nèt kontrali, 90% tabata lokal. A pensa e tempu ei, ku skol sekundario aki tabata imposibel pa nos hendenan. Nunka no a mira nos komo un ku tin mesun humanidat ku otronan. Monseñor Römer a kòrda tempu e mes a bai studia komo e promé yu di Kòrsou komo saserdote, e tempu ei tabatin tiki hende ta studia afó. El a hasié, pasobra e kier mira pais bai dilanti. Ta p’esei mes tambe e ta gosa e desaroyo kaminda tin mas i mas persona ta konsiente ku mester studia pa hiba e pais dilanti. P’esei el a urgí studiantenan, pa lanta para mustra ku nan por. Usa kabes pa pensa, no pa pena so. Mester yuda nos mes i Señor lo yuda ku sobrá. E studiantenan ta riba e bon kaminda, pero Monseñor Römer a pidi nan pa no mishi ku derechi di otro i no laga niun hende manipulá ku nan. Si ta nesesario, traha mas duru pa logra bo meta, pa forma bo mes. Pa e diskurso aki Monseñor Römer a haña un aplouso grandi serka e studiantenan.
Lamentablemente, a sera fin di siman sin un solushon pa e problema aki. Hasta por a komprondé for di e reunion ayera ku minister, ku e último aki lo a kalifiká e universidat komo kampo, pasobra tabatin personahenan einan ku ta ‘kanga saya’. Por lo demas e reunion no a trese un solushon, pasobra dekanonan no a aseptá e proposishon kaminda ta nombra un rector interino ( Charles Dorego) banda di Prof. De Bruijn. Por sierto ku personal kompleto di UNA ta apoyá e studiantenan i ta bisa ku kualke solushon ku ta enserá mantenshon di aktual gerensia, ta inaseptabel pa nan. Mester duna oportunidat pa un tim di maneho.
Minister Omayra Leeflang a informá miéntras tantu ku dos dia di diskushon riba entre e dekanonan di fakultat hurídiko, fakultat tékniko i fakultat general, Hunta di Supervishon, Rector Magnificus i representantenan di Konseho Estudiantil den su presensha no a produsí un resultado ku por karga aprobashon di tur partido. E minister a bisa ku lo mester warda awor riba resultado di e komishon speshal ku a instituí pa studiantenan e problemanan. E komishon enkabesá pa Ron Gomes Casseres a keda di raportá dia 15 di òktober awor.