Prof. dr. Lorito ta yama tur hende un felis djasabra. Awa ta kai pues Lorito mester dek, pasobra bula ku pluma pisá si no ta un kos di hasi. Un saludo pa Nelson ku nos a mira di leu, pero ku no a mira nos.
*********
E situashon na prizòn ta sigui unu di atenshon partikular. Hende mester komprondé, ku un hende será tin un meta so: purba sali mas pronto posibel. Di otro banda ta e outoridat mester sòru pa tuma e medidanan nesesario pa evitá ku prezunan ta sali. Nos ta kere ku esnan responsabel pa prizòn ta hasi nan bida masha difísil den e kaso aki ku e kantidat grandi di intento pa hui. Ata awe mardugá tabatin un otro intento!
*********
Un otro solushon ta, ku miéntras ta warda e kámaranan yega ta pone vigilansia èkstra. T’asina so por evitá mas problema den e instituto. E kos mas iróniko ta riba e dia ku wardadónan di prezu ta selebrá nan dia, prezunan ta trata di hui. Kiko nan a spera: ku nan ta haña un regalo di dia di wardadó di prezu?
*********
E studiantenan na UNA ta hibando un lucha masha noble pa nan mes futuro. Tur hende ku dos plaka di sintí ta komprondé esei. Pero na momentu ku bo akshon bira un molèster pa komunidat, preparábu pa bo pèrdè sosten. Kere nos i nos a sigui hopi akshon di serka, ku tur akshon na Kòrsou ku a kondusí na problema pa hende ku no tin arte ni parte den un situashon, a pèrdè tur sosten den pasado. Maestronan di skol, shofùrnan di bus, manifestantenan kontra Slotverklaring, den enfermeria, na refineria, na Dòk, na UTS i asina nos por sigui menshoná algun mas. E mihó kos ta, trata di mantené e sosten i pone preshon. Evitá ku manipuladónan i ekstremistanan ta drenta den un lucha djis pa nan mes agènda (polítiko). Asina bo ta gana un lucha.
*********
Nos a sigui e opservashonnan di Monseñor Amado ku a pidi e studiantenan pa nan no bira víktima di manipulashon. Nos lo tabata deseá pa e religioso, pa ken nos tin asina tantu rèspèt, a identifiká ta ken (nan) e ta kere ta manipulá e studiantenan. Ainda no ta lat: laga nos sa!
*********
Nos ta kere, ku polis a balotá e situashon na UNA. No a intervení ku 0 Toleransha manera si a hasi ku otro manifestashonnan. Unda Unidat Mobil i gas a keda den e kaso aki. Di kon den esun si i e otro no? Anto gas lo a hasi e esena mas estudiantil ainda! Mas “leven in de brouwerij”, manera ta e kaso na hopi Universidat! Ombudsman lo bai wak awor tambe di kon polis no a aktua (esei tambe ta su trabou si konsiderá ku ora polis aktua SI ta wak!)
*********
Lider di Movementu Patriótiko Kòrsou, Rignald Lak a hasi petishon pa lidernan di PAR i PNP pa buska e solushon den fin di siman pa problemátiko di UNA. Lak ta splika, ku tin grupo di interes, pero laga esaki un banda, di manera ku por mira interes general di Kòrsou. No ta un rapòrt mester ta desisivo, ya ku si resultá ku e rapòrt no ta bon problema lo bira mas grandi ainda. Un solushon berdadero sigur pa bienestar di e edukashon mester ta na promé lugá, sin ku niun hende por sali perhudiká. Esaki ta únikamente ku sabiduria di Dios. Lak ta pidi pa laga plaka na di dos lugá. Un saludo pa Rignald ku masha dia nos no a mira, pero nos sa ku e t’ei!
*********
Papiando di misa, bo a tende kaba ku un hende ku no ta di misa katóliko a hasi misa algun dia tras di otro sin niun hende a ripará. Masha katóliko a rabia i tur hende ta pendiente pa haña un splikashon di Obispu riba ta kiko a pasa eksaktamente den e kaso aki. Lorito sa ta ken i si no bin splikashon nos lo basha abou ku luho di detaye!
*********
Nos ta keda te aki awe. Pasa djasabra i djadumingu. Tur kos bon!