Submitted by admin on Tue, 09/05/2006 - 13:14.
Mester remodela stage Festival Center promé ku tur kos!
WILLEMSTAD – Pa basta tempu kaba departamentu di seguridat i Inspekshon a bin ta notifiká Asosashon di Músiko i Artista di Kòrsou riba e estado di e stage di Curaçao Festival Center, sin ku nunka nan a duna oido riba nan atvertensia.
E trabounan di inspekshon ta unu konhunto ku brantwer i DROV i ku ta un rapòrt ta wòrdu traha riba tal investigashon. Esaki LA PRENSA a komprondé di e hefe di servisio, sr. Randolph Gijsbertha den un entrevista awe mainta.
Gijsbertha ta mustra di ta lamentá ku no a buska informashon di nan servisio, di manera ku no ta bin dilanti ku nan intenshon ta pa kaba ku Curaçao Festival Center, pero simplemente mester sali na interes di públiko general, pa protekshon i seguridat. E asuntu aki tin di haber ku esnan ku ta bin den kontakto di e tarima di Curaçao Festival Center, sea pa aktua riba ó den su besindario. Gijsbertha ta afirmá ku AMAK ta konsiente di tur e atvertensianan i un biaha mas tabatin kontròl ku a keda realisá i ku mester yega na remodelashon di e stage di e sitio aki, di manera ku por garantisá seguridat di un i tur.
“No ta kuestion ku si e ekspertonan di Marc Anthony a kontrolá, pero ta e trabou di servisio di gobièrnu ku mester realisá tareanan di inspekshon, no únikamente na Curaçao Festival Center, pero tur kaminda tin hende ta frekuentá.” Gijsbertha ta aploudí e echo ku nan a kuminsá traha riba e tarima i ta para kla pa duna e sosten i konsehonan di manera ku e trabounan ku ta andando den Festival Center por yega na un tarima sólido. E tarima aktual no tabata kuadra ku e stipulashon di lei di seguridat i e rapòrt a wòrdu traha, i ku AMAK tambe tin kopia di esaki den su poder pa hasi e pasonan pa remediá e situashon.
Tin un akuerdo entre e servisio i AMAK pa awor ku e trabounan ta tumando lugá pa remodelashon di e stage pa e sosten nesesario ku nan mester, ya ku gran parti di e stage aki mester keda remodela. E área ku Festival Center ta konstruí mes ta un área ku tin hopi salpeter i mester tene kuenta ku tur e faktornan ku ta ménos benefioso pa e propio lugá. Gijsbertha ta señalá ku no tin nada kontra di e espektákulo di Marc Anthony, pero mester tene kuenta ku tur esnan ku lo bai ta frekuentá riba, ó rondó di e stage aki.
E echo ku den pasado a hala atenshon di AMAK, pero ku nan tampoko no a duna oido i ku awe nan mester hasi algu pa e situashon por mehorá. E trabounan di konhunto ku brantwer, ku mester fiha e salidanan di emergensia, miéntras ku DROV tin di haber ku e parti di fundeshi, miéntras ku tin otro servisio pa e parti di seguridat ku instansianan di gobièrnu ku mester realisá e tipo di kontròlnan aki riba situashonnan kaminda tin aktividatnan ta tuma lugá.
Di parti di presidente di AMAK, Feco Gomes ta mustra ku e trabounan riba e stage a kuminsá i ku lo bai haña un stage sólido ku lo kumpli ku tur e eksigensianan pa garantisá e seguridat nesesario.
