WILLEMSTAD – Jacob Gelt Dekker kier krea un sistema di apartheid den pueblo di Kòrsou. Esei ta opinion di miembro di Konseho Insular, Humphrey Davelaar riba krítikanan ku e invershonista di orígen ulandes Jacob Gelt Dekker a lansa den direkshon di Yu di Kòrsou.

For di diferente skina a bin krítika fuerte riba ekspreshonnan ku Gelt Dekker a lansa siman pasá, den kua el a kaba ku Yu di Kòrsou.
E último krítika a bin for di miembro di Konseho Insular pa Partido Nashonal, Humphrey Davelaar. “Despues di a tuma nota di e kolumna ku Jacob Gelt Dekker a skibi den Luchvaart nieuws bou di e titulo “Visitekaartje Hato”, mi ta konstatá ku esaki ta mas bien un ofensa total kontra di pueblo di Kòrsou. Un ofensa kaminda e ta generalisá kosnan ku a sosodé i te hasta Gelt Dekker tin un bola di kristal kaminda ta e premirá kosnan malu ku ta bai sosodé den futuro den nos komunidat”, asina Davelaar ta bisa den un karta habrí.
Segun Davelaar, den un tiru Gelt Dekker a disidí di peña tur polítiko di Kòrsou i Antia na e kosnan di mas baho ku por tin. “Gelt Dekker ta un hòmber ku “by choice” a skohe Kòrsou komo lugá pa e bin hasi negoshi. Mitar di nos suidat (Otrobanda) i un parti di e kosta west di nos pais ta den poder di Gelt Dekker. Esaki sin embargo no ta dun’é ningun outoridat i poder pa hasi i deshasí manera e ke. Mi ta fuertemente bou di e impreshon ku e akshonnan ku últimamente Gelt Dekker ta tumando kontra di e pueblo aki, ta pa trata na konfundí nos pueblo i trata na krea un situashon di “apartheid” den nos Pueblo. Si enbèrdat Gelt Dekker ta stima Kòrsou manera e ta pretendé, e no ta papia dje malu i denigrante aki di nos. Si ta un “feedback” Gelt Dekker kier a duna, esaki semper ta bon bini, pero e loke ku el a hasi no ta dunamentu di feedback na Pueblo. Esaki mas bien ta un zèt intenshonal i baho pa na un manera denigrante redikulisá i ofendé nos hendenan, nos pueblo, nos idioma i nos kultura. Gelt Dekker mester tin bèrgwensa di tur e kosnan mahos ku el a skibi kontra e pueblo aki, despues di a probechá di e hospitalidat ku e pueblo aki a dun’é. Gelt Dekker mester pidi e pueblo aki despensa públikamente ku el a generalisá i trapa dignidat di e pueblo aki. Un mensahe kla ta bai pa Gelt Dekker pa e stòp di ofendé pueblo di Kòrsou i sigui trata na pinta Kòrsou komo un Pais di desórden, sin òrdu. Gelt Dekker ta basta ku bulgaridat awó òf “ROT OP” i hala kita for di aki”, asina Davelaar ta rekomendá e invershonista.

Score: 0.0, Votes: 0