E loke ku a keda skirbí tokante ku tabatin dunamentu di plaka na un par di hende pa ku e kompra di e sistema di UTS dor di DIGICEL no ta kuadra ku bèrdat.


Shòròmbu kier a rektifiká e asuntu aki públikamente den e mesun kolumna kaminda nos a skirbi esaki. E asuntu aki ta algu ku no por keda probá pa Shòròmbu ni tampoko tabatin indikashon ku esaki lo a tuma lugá tampoko. Un biaha mas nos diskulpa pa esaki.

Gobièrnu tin na su disposishon empleadonan ku mester yuda den dunamentu di konseho riba diferente proyektonan i tambe diferente kos ku ta pasa den komunidat. E empleadonan aki ta wòrdu tambe bon pagá pa hasi e trabou aki.

Ora un konseho ta negativo ta pasó e hendenan aki a studia e proyekto òf tereno òf kualke kaso bon promé nan duna nan konseho i komo empleado públiko semper nan ta mira interes di Boneiru na promé lugá.

Awor gobièrnu di Boneiru ta manda e konsehonan aki bek ora nan ta negativo i fòrsa e empleadonan pa hasi e konseho positivo ya e proyekto òf tereno por pasa i ya BC ta di dek si kualke kos bai malu.

Ta esaki ta loke a pasa den dunamentu di tereno aya na Sorobon i ta esaki a pasa ku dunamentu di pèrmit pa konstrukshon. E konsehonan tabata negativo a laga hasi nan positivo pasó e mandatarionan tabata wak benefisio personal i pa nan amigunan.

Gezaghebber ku ta na kabes di gobièrnu i ku mester mira e interes di e pueblo aki ta sera wowo pa e kosnan aki i ta bon ku nos tin un gouverneur ku konosé Monchitu bon i sa kiko su intenshon nan ta i e si a wak interes di Boneiru i a laga para kos.

Na horizonte aktualmente tin un otro kaso ta pintando den kual gouverneur lo tin di bai aktua pasó e hendenan di UPB aki ta sigui bai kontra di konsehonan duná i ta aktua nèt kontrali di e konsehonan.

Waf di sùit ya tin mas di dos aña ta den diskushon pasó e gobièrnu di UPB aki kier pasa e pida tereno ku tin na waf di sùit aki den man di un komersiante ku ta yuda UPB finansieramente pa esaki konstruí un edifisio riba e pida tereno aki.

Tur klase di konseho ku a bini aden tabata negativo pasó simplemente segun reglanan ku tin aktualmente no por konstruí un edifisio asina na pia di waf pasó e ta kontra di loke nan ta yama ISPS code.

Si nan disidí di duna e pida tereno aki tòg den futuro bo por bai hañabo ku barkunan ku ta kai bou di e kos aki i ku mester bishitá un porta merikano lo no por mara mas na e waf aki i ku tur su konsekuensianan ku esaki por tin pa ekonomia di Boneiru.

P’esei ya tin hendenan di entre otro inspekshon di marina aya na Kòrsou i hendenan di haf aki na Boneiru ta drumi warda kiko tei pasa ku e tereno aki pa asina ku e tereno pasa pe e komersiante nan tambe bai gouverneur un bes pa laga destruí e desishon pasó esaki ta kontra interes di Boneiru.

E sindikato FEDEBON a habri aña riba e proyekto nobo ku gobièrnu kier bin kuné pasó segun e hendenan di e sindikato aki nan tin un plan ku ta mihó ku esun di gobièrnu. Tin mas hende den komunidat ku ta kontra di e proyekto aki pasó e ta un proyekto ku mester bai bira un proyekto piloto.