ORANJESTAD- Cuminsando for di diaranson 10 di januari te cu diadomingo dia 14, Stingray/Netpro a organisa pa di dos anja consecutivo un clinic.


E biaha aki e clinic ta mas extensivo compara cu anja pasa. E clinic ta ensera e.o. cu Dr. Rod Havriluk di e compania Swimming Technology Research ta bolbe bin hasi uso di su technologia avanza pa demostra na cada landador con e por mehora su technica pa asina baha su tempo mas ainda y con pa evita lesionnan. Esaki ta juda e entrenadornan tambe hanja mas informacion ora di planea y unda pa pone atencion pa cada landador, y e equipo en general.
Durante e dianan aki tambe ta bai tin charlanan ariba nutricion, flexibilidad, y psicologia. Tur esakinan ta reparti den varios grupo.
Stingray ta convenci cu e tipo di clinica nan asina ta forma un gran parti di e desarrollo di un landador. E landador ta hanja informacion ariba diferente aspecto con pa mehora su prestacion y ta un stimulacion pa ambos, esta e landador mes y entrenador. Ta e tipo di atencionnan asina aki ta hasi cu e equipo di Stingray ta unico y distingui, di cual merecidamente a wordu premia anja pasa pa esaki. Stingray lo sigi busca metodonan y implementa esakinan pa continua na mehora e prestacion di su landadornan.
Danki ta bai na tur sponsor cu a coopera pa hasi esaki posibel. Danki tambe na e landadornan cu a recauda fondo pa e Swim-a-thon di anja pasa cu a juda na baha e gastonan pa cada landador. Danki especialmente na Netpro, Solid Real Estate, Rica Foods, Playa Linda Beach Resort, Hoevertsz ArchiDesign N.V., Elmar , Domino’s Pizza, Prime Distributors N.V., Kong Hing Supercenter, Cas Bon, InterFacilities N.V., Mourik Caribbean N.V., Pim van der Kleij, Valero Refining Company Aruba, Deloitte & Touche.
Alabez Stingray ta invita Prensa completo pa pasa diasabra dia 13 pa 11’or di mainta na Piscina Olimpico Roly Bisslik pa bin presencia parti di e clinic aki y caminda por hasi pregunta.