Submitted by admin on Sun, 30/04/2006 - 00:17.
WILLEMSTAD – Marc-O-Mania lo bira un di e atrakshonnan ku lo kulminá ku benta di karchi ku lo kuminsá dia 1 di mei próksimo pa e konsierto di Marc Anthony ku lo keda selebrá dia 27 di mei próksimo.
Riba promé di mei so, tur karchi di sekshon general lo ta na rason di fl. 75.- (OB no ta inkluí). Komo Circle Event ta sigur, ku hopi ta esnan ku lo ta interesá den karchi na e preis aki, a pone e bendementu pa e dia aki so na lokètnan di Sentro Deportivo Kòrsou.
Na e sitio aki lo tin sinku lokèt disponibel pa bende karchi. E sitio di benta di karchi tambe ta un indikashon ku e posibilidat pa un hende yega pa kumpra karchi i keda sin haña karchi a kaba masha chikí mes. E benta ta kuminsá pa 9or di mainta i e ta kaba presis 4or di atardi. Si bo yega un minüt pasá di kuater, bo ta lat i mester warda su manisé pa kumpra e karchi na fl. 95.-.
E Marc-O-Mania ta sigui 2 di mei. Huntu ku e karchinan di sekshon general pa fl. 95, karchinan pa sekshon VIP tambe lo ta na benta for di dia 2 di mei na tur puntonan di benta ku ta Koko Loko, Mensing Caminada, Tik Tak i tur sukursal di Girobank. Preis pa karchi VIP lo ta fl. 300.-.
Despues di mas ku un dékada: Marc Anthony bèk den Curaçao Festival Center
WILLEMSTAD – Den añanan 90, promé ku restu di mundu a deskubri’é, públiko di Kòrsou a konsagr’é komo un artista grandi. Emoshoná pa e aseptashon, ela sigui su konsierto den un tremendo áwaseru. Dia 27 di mei awor, Marc Anthony lo bin rekonektá ku su públiko ku nunka a pèrdè su desaroyo for di bista ora ku ela bai for di Kòrsou.
Circle Events, un organisashon speshalisá riba tereno di espektákulo ta hasi su debut riba e merkado aki tresiendo Marc Anthony. Circle Events tin tur kos reglá i ofisialisá pa e konsierto aki. E proseso pa trese Marc Anthony a kuminsá for di aña pasá ougùstùs. Pero e agènda di e artista ta kompletamente yen. Tabata masha difísil haña un fecha.
Pero Circle Events no a pèrdè pasenshi ni speransa. Masha tantu yamada telefóniko mes, masha rogamentu i masha persistensia a pone ku organisashon di Marc Anthony a realisá ku ta di bèrdat mes Kòrsou ke mira Marc Anthony den konsierto i a duna e fecha di 27 di mei pa su presentashon na Kòrsou.
Den kaso di artista grandi manera Marc Anthony, su hefe di seguridat tin ku inspekshoná e posibel lugánan pa e konsierto i disidí kua lo ta e mihó sitio. Di e lugánan ku hefe di seguridat di Marc Anthony, a mira ela haña ku Festival Center pa loke ta trata seguridat i posibilidat di evakuá e sitio den kaso ku algu a pasa, ta mihó. Tambe Marc Anthony ta kòrda kon tempu e tabata simplemente Marc Anthony, e públiko di Kòrsou a biba ku su presentashon i a lag’é sinti su mes un artista grandi.
Kòrsou a haña e fecha di 27 di mei pa e konsierto, komo ku den e luna aki Marc Anthony ta den gira den e área aki. Marc lo tin kuater presentashon na Colombia. Dia 20 e ta sali di Pereira, Colombia bai Los Angeles pa e bin Kòrsou dia 26 di mei i e konsierto ta dia 27 di mei.
Dia 26 di mei ora Marc Anthony yega Kòrsou lo tin un konferensha di prensa. E konsierto lo ta 1 ora i 45 minüt. Marc Anthony su orkesta pa e gira aki lo konsistí di 16 músiko profeshonal ku ta bin di diferente parti di Merka. E repertorio lo konsistí di hopi kantika di su último produkshon diskográfiko “Valió la pena”. Pero ta sigur ku e lo no keda sin kanta kantikanan ku mas ku un dékada pasá a pone e públiko lokal bisa ku e ta un artista grandi.
Preis pa e evento lo ta fl. 95.- (sin OB) pa sekshon general i fl. 300,- (sin OB) pa VIP. Pa karchi di platinum por tuma kontakto ku sra. Mijanou Bolivar na tel. 569-1969.
