Quote: "Hayes Nicholls ta manifestá ku hopi biaha ta kritiká ulandes europeonan, pero ta nèt nan ta esnan ku ta duna silensiosamente. E grupo di penshonado ta yudando hopi mucha pa nan por haña algu di kome na skol i inkluso pa nan tin paña i sapatu. Muchanan di skolnan avansá tambe ta wòrdu di spònser i ulandesnan ta invertí den proyektonan pa tene muchanan for di kaya. Esaki ta nifiká ku e yudansa di mas grandi ta bin di e grupo di ulandes penshonado aki, tabata deklarashon di Hayes Nicholls den su presentashon." End of Quote. 

Ta un gesto noble ora hende ta dispuesto di yuda, ora ta tratá di "wantoestand"nan den sosiedat, kaminda bo por bisá ku t'e totalidat ku su konsenshi òf sin konsenshi ta responsabel p'e kosnan akí.

Manera nos por mirá den e quote akí riba ta parsé ku no tin mag di kritiká djis pasobra aparentemente tin un asina yamá "bondat" den un wega ta tumando lugá.

Aparentemente ta tipifiká nos, ku nunka no por kedá  "zakelijk" riba niun asuntu den diskushon, peró ta mirá i tresé tur asuntu ku ta sklamá pa solushonnan, ketu bai den un konteksto pèrsonal i hasiendo esakí  nos no ta profundisá i progresá riba niun problema den sosiedat, pa asina por jegá na solushonnan kaminda al fin al kabo tin ganashi pa un i tur.

Hopi bia ora ku krítikanan ta biní riba aktonan òf pensamentunan robes, sea otronan ta buská pa konektá tal krítikanan pèrsonalmente ku individuonan òf gruponan, sea k'e últimonan akí ta pèrtenesé na interesnan ètniko òf otro interesnan, òf ta buská moda di pará krítika rib'e manera konosí "onsportief" ku kangamentunan di saya, zundramentu òf insultonan pèrsonal sin base.

Diferente di nos ketu bai ta desaroyándo nos mes komó individuonan, ku ketu bai ta purbá di uzá otro pa nos mes interesnan pèrsonal pa saká lo máksimo probechonan material i ímaterial pa nos mes komó individuo, despresiando konsientemente i kontinuamente e balor di otronan ku també a kontribuí pa realisá, lokual nos pèrsonalmente ta salí pretendé ku ta esfuersonan di nos só, pa asina por salí pronká ku nan pèrsonalmente pa mas gloria di nos pèrsona, pa sigurá status i kosnan material pa nos pèrsonal.

Tristu, peró un realidat amargo. Punto. Si nos ke rabiá, mordé nos rabu mal mordé numá. Peró e ta kedá un kos tristu.

Un "schijnbaar" bondat por wòrdu mirá també komó resultado di remordishonnan di konsenshi i esakí ta hasí e asina yamá bondat ei, un akto pa bin "in het reine" ku bo konsenshi.

Si nos miré dje banda eí, nos por bisá k'e estilo di bida "westers" ku t'e "verzachtende term" pa kapitalista, a okashoná rònt mundu su víktimanan, antó awor ku e peso di pobresa a birá mas ku bisto p'esnan probechadónan dje sistema, nan a jegá n'e "inzicht" i birá al mismo tiempo konsiente dje lokual nan probechamentu a okashoná p'esnan ku mester a kontribuí tur tempu pa gran parti na nan  estilo di bida.

Pa hasí nan entrada mas grandi posibel, esnan k'e estilo di bida "westers" akí mester a oprimí esnan den e asina yamá paísnan pober, pero ku potensialnan grandi pa loké ta tratá forsanan laboral i/òf materianan primo, den nan entrada finansiero, pero hasiendo e produktonan k'esnan oprimí també tin ku kumprá ímpagabel pa nan. Mundu ta pèstá di moralnan dòbel.

Ta pesei no ta nada straño ku awendía nos tin penshonadonan riku, kendenan sindikatonan a sòru pa nan por pèrmití nan mes mas ku otro, naturalmente a kosto di otronan den propio país, a kosto di desempleadonan den propio país òf den paísnan di otronan.

Ta pesei també e penshonadonan ku ke batí riba nan pechu bisá ku ta nan t'esnan ku ta yuda, tin ku "dim", yudá ku nan boka kayao, pasobra a jegá nan bürt pa rib'un manera digno i sinsero, nan duná nan apoyo na lokual nan mes també a kontribuí na lagá kresé "scheef" den mundu. Punto.

Stòp ku buskamentu di gloria konstantemente pa nos propio pèrsona. Stòp di buská gloria pa nos mes pa "status" i kosnan material. Trahá den silensio na bienestar di un i tur. Ta basta ku buskamentu kontinuamente di rekonosementu pèrsonal pa kada kos ku nos tin mas ku e gran deber, di hasí pa nos sosiedat. 

I akí no ta kestion di ta kontrá makamba òf no, òf ta kritiká makamba òf nò, sinó simplemente kestion di loké un parti di nos komó partisipante na un sosiedat mundial òf no, a kontribuí na lagá jegá asina leu, pues ta nos mes també tin e deber sagrado di solushoná nan. Niun otro.

No siguí den nos pretenshonnan di "sabínan" bobo. Den e mundu akí nos ta pèstá di nan kabá.