Segun inbestigashonnan a salí na kla ku riba internet prostitushon, wega di plaka, pidimentu di limosna i estafa ketu bai ta subí drastikamente.
Pa loké ta tratá prostitushon hopi bia tin organisashonnan internashonal, dirigí pa hòmbernan i muhénan sin eskrúpulo ku ta èksplotá yunan muhé di otro hende pa por yená nan propio saku ku sumanan gigantesko.
Hopi bia e organisashonnan akí ta enmaskará nan mes riba otro websitenan ku no direktamente tin di haber ku nan aktividatnan.
Por ehèmpel nos ta hañá websitenan ku e karakter di "date", está kaminda esnan interesá por buská amistat (serio òf nò) òf penpals pa por korespondé ku nan.
Dje websitenan akí tin bia, sin k'e doñonan djesakinan sá mes, figuranan sin eskrúpulo, ta hasí uzo dje fasilidatnan ku nan ta brindá pa por será amistat ku otro.
E figuranan akí mayoría parti ta hendenan ku ta trafiká den eksplotashonnan di mayoría parti di hendenan muhé di koló blanku i kabeinan blond, pa por yená nan saku ku plaka ké muhénan akí ta generá, siendo merkansía djesnan pará tras di nan.
Bo por bisá trankil un fòrma modèrno di sklabitut. Aunké ku tin e "sabinan" bobo sin sufisiente konosementu dje mundu aktual den kuá nan ta bibá, ku ta bisá òf mihó bisá, ta pretendé ketu bai ku sklabitut a wòrdu abolí masha ten i ku no tin asuntu di sklabitut mas. Ta bon p'e último kategoríanan di hende akí buská konosementu dje mundu den kuá nan ta bibá promé ku nan riská hasí sorto di eskpreshonnan bobo asina òf duná sorto di opinionnan asin'akí.
Mayoría parti esnan ku ta prostitituá òf lagá nan wòrdu prostitituá nan mes riba internet ta muchanan ku gustá un bida di luho ku nan no por pèrmití nan mes òf ku pa aparensha nan por, peró tras di e aparensha akí tin un koas total den maneho di nan bida, lokual ta hasí nan bida un "schone schijn" gigante.
Mulá foi den nan hubentut den mentiranan komèrsial pa medionan di komunikashon, nan no ke kedá atras di també ke bistí, komé i ekspresá nan mes enkuantu kosnan dje markanan mas karu ku ta èksistí pa nan por kontá serka otronan mesun kos, aunké bo por bisá ku nan ta disponé di un abnegashon (zelfverloochening) enorme di nan mes ku nan postura optené.
Grasia na inbentonan tègniko e figuranan sin eskrúpulo akí ku ta èksplotá yunan muhé di otro hende, ta kué e muchanan akí butá nan tras di un webcam (camera) pa entregá nan mes na aktonan inmoral, ku segun nan, un gran parti di mundu ta sintá wardá riba òf tin nesesidat di nan aktonan inmoral pa k'e muchanan akí.
Un otro kategoría ku ta disfrasá drentá e websitenan akí komó hendenan ku ta en buska di un "date" normal pa amistat (serio òf nò) òf pa penpals, ta estafadónan Afrikano, speshalmente esnan di desendensia Nigeriano, peró també di Europa Oriental.
Esnan Afrikano hopi bia ta biní k'e kuenta tan konosí ku un di nan famíanan riku a fayesé na Afrika i ku nan ke pasá e plaka over den eksterior pasó pa motibu dje turbulenshanan na Afrika nan ke wardá nan sèn temporalmente den eskterior i ta pesei nan ta puntrá esnan ku nan a fihá nan bista ariba pa nan por hañá nan number di kuenta di banko pa nan por pasá e plaka fiktivo akí ariba pa nan por sigurá e plaka di nan herenshanan fiktivo akí.
Komó danki p'e gesto djesnan ku nan ta pidí e fabor akí, nan lo duná nan un porsentahe di nan herensha fiktivo. Ora k'e víktimanan akí trapá den nan trikinan, alkontrario di por hañá un rekompensa, nan kuentanan di banko ta wòrdu robá kruelmente i sin pordón, lagando atras nan muestra i karchi di bishita di nan falta di integridat i moralidat.
Pa lokual ta tratá e Europeanonan di Europa Oriental esakínan, bou dje preteksto di muhénan blanku i blònd ku ta buskando amistat (sea serio òf nò), ku no sa papiá Ingles, peró ta korespondé via di un terser servisio di tradukshon, ta resultá despues ku ta negoshinan pa saká sèn foí djesnan ku inosentemente ta en buska di nan "date" pa amistat òf penpals.
Akínan esnan ku a lagá sa es k'e otro foi nan, lo wòrdu di "spam" ku Dios di ta basta.
Un advertensha fuerte n'esnan ku ta riba intenet ku no opstante ku internet a wòrdu inbentá k'e intenshon pa mundu por será konosí ku konosementu i pa kontribuí n'e konosementu i/òf komunikashonnan akí, manera ku tur kos, kriminalidat ke kue e inbentonan akí també den nan gara.
I ora kriminalidat apoderá di plaka, konosementunan tègniko, polítika i poder, aunké hopi "sabínan" bobo no ta realisá nan mes esakínan, pasobra nan ta di opinion òf nan ke hasí komosifuera nan ta hendenan liber pa nan bèrguensa di sklabitut, ku sklabitut no ta èksistí mas, djis pa falta di konosementu, e sklabitut modèrnu lo siguí ku trapamentu di derechonan humano ketu bai, no solamente djesnan diréktamente enbolbí den e trapamentunan akí, peró també esnan ku pa falta di konosementu ta ningá ku sklabitut den nos tempu modèrnu ta èksistí. Nan t'e mes un kulpabel pa èksistensha di eksplotashonnnan humano i sklabitut, k'esnan ku ta enbolbí direktamente den e eksplotashonnan akí kontra di derechonan humano internashonal.
Ta di sperá k'e "sabínan" bobo, djis pasobra nan tin bèrguensa di ku nan tin ku wòrdu yamá katibu òf di otro manera, nan mes tin un interes den maldat, no tratá atrobé di demonisá esnan ku ta mustrá rib'e kosnan malu òf robesnan, òf kon ku un hende ke yamá nan, akí.
