WILLEMSTAD/ KRALENDIJK - Boneiru literalmente a spanta di e fórmula ku Ulanda ke introdusí komo supervishon (finansiero) di Ulanda. E proposishonnan ku Ulanda a lansa pa supervisá tantu Boneiru, Saba komo Statia a krea reakshonnan masha fuerte.
Lider di partido UPB di Boneiru Ramonsito Booi ta di opinion ku e medida skerpi di supervishon ku Ulanda ke introdusí, de fakto ta saka Konseho Insular di e isla for di wega.
“E proposishon ulandes pa yega na un supervishon skerpi di Ulanda riba e islanan Boneiru, Saba i Statia ta bai mas leu ku originalmente tabata e intenshon. E kos aki a kuminsá haña un karakter permanente,” asina Booi a bisa den un entrevista pa Radio Nederland Wereldomroep.
Boneiru a ferwaktu ku saliendo for di konstelashon antiano, su futuro lo tabata un futuro sigurá. E argumento semper tabata ku e isla ku mas ta stroba Boneiru den su desaroyo ta Kòrsou. Pero e loke e isla a spera di e kombenio ku el a sera ku Ulanda pa logra e futuro briante aki, tòg ta birando un desapunto grandi.
I si konsiderá e komentario di diferente polítiko riba e materia aki, anto enbèrdat ta surgi pregunta riba e intenshon real di Ulanda.
Na òktober di aña pasa, Boneiru, Saba i Statia a firma un kombenio ku gobièrnu ulandes pa bai forma parti teritorial di Ulanda.
Kiko esaki ta enserá eksaktamente no tabata konosí na e momentu ei ainda, komo ku mester a kaba di detayá hopi punto den e akuerdo.
Esei a tuma lugá den e lunanan ku a pasa, pero e produkto no ta loke Boneiru a spera. E punto mas kardinal ta ku riba tereno finansiero, Boneiru práktikamente no tin nada mas di bisa.
Manera e proposishon ta fórmula, ta Ulanda práktikamente ta stipulá presupuesto di e isla. E isla en realidat a pèrdè su outonomia, si implementá e akuerdo ku básikamente ta enserá un sorto di medida general di supervishon imponé pa Ulanda.
Ta Ulanda ta disidí kuantu plaka e isla ta gasta, ki momentu ta saka e plaka aki i bou di kua kondishon.
Aki na Kòrsou vários lider polítiko a kuminsá reakshoná riba e desaroyo aki. Lider di PLKP Errol Cova a bisa ku aki por papia di un desishon pa rekolonisa Boneiru. “Aki nos ta weta e intenshonnan berdadero di Ulanda. Boneiru ta bira asta ménos ku un munisipio di Ulanda,” el a bisa.
Miguel Pourier, eks promé minister di Antia ta hopi prekupá pa e desaroyo aki. Den un presentashon ku el a tene siman pasa durante un akto ofishal na Boneiru, e eks mandatario a puntra su mes si e proposishon ku tin riba mesa no ta un forma pa horka outonomia i demokrasia na Boneiru.
“Mi tabata masha kontentu ora ma kuminsá lesa e dokumento, pero ora ma kaba, mi tabata hopi indigna,” el a bisa.
Segun Miguel Pourier, e proposishon a mustra e kara berdadero di Ulanda, esta di eliminá Gobiernu Sentral i pone e islanan bou di kuratela.
Pourier a rekonosé si, ku konsiderando ku Ulanda ta eliminá e debe ku pais Boneiru tin, esei lo nifiká un alivio pa e isla i ku poko poko nivel di bida di e habitantenan lo oumentá.
Boneiru, meskos ku esei ta e kaso ku Saba i Statia ta papiando ku Ulanda kon ta duna kontenido real na e palabrashon ku a yega na dje na òktober aña pasa. E islanan mester bira un sorto di munisipio partikular di Ulanda entrante 15 di desèmber 2008.
Aworakí ta papiando riba kon ta duna kontenido eksakto na e supervishon finansiero den e periodo di transishon. Boneiru ta haña ku loke tin riba mesa aworakí ta pone Boneiru bou di kuratela pasobra Ulanda lo tuma e tarea di supervishon ku aworakí ta den man di Gobièrnu Sentral miéntras ku Ulanda ta tuma tambe e kompetensha di politikonan boneriano pa atende ku presupuesto di e isla.
Den kaso di Statia, por a tende sonidonan similar ku e krítika di Boneiru ounke ku Saba si, ta parse di tin pas ku e akuerdo, a lo ménos, no tabatin komentarionan atverso te ku awor.
Dianan 5 i 6 di yüni awó lo tin e próksimo ronda di konsulta entre Ulanda i e tres islanan chikitu. E konsulta ta tuma lugá na Boneiru mes.