Kòrsou, bo yunan di puru sepa ke sá si sierto amtenarnan riba bo barika lo siguí demostrá nan arogansia i nan narcismo pa ku pueblo, siguí mir'abòu rib'e pueblo pa kende nan a wòrdu apuntá pa sirbí, sea k'e konduktonan akí ta un "voortzetting" di konduktonan (kolonialmente) heredá fo'i suelanan friw, pues influensia dor di otro, òf ku nan ta konduktonan aíslá fo'i historia i ta originá fo'i e pèrsonanan mes su struktura di pèrsonalidat.

Kòrsou, bo yunan di puru sepa ke sá, si nètwèrknan di grupitonan di amtenarnan den nan nèshinan di arañan di maldat, lo siguí ku nan trikinan i nan oportunismo i abuzu pa despues bulá pipa pa nan responsabilidat ora ku nan ta meté ku derechonan di suidadanonan, saliendo pafó di nan buki, dor di malinterpretá  derechonan di sernan humano den sosiedat ku sierto "ijdelheid", sin ku nan ta aptó pa por tin e profundidat necesario pa por hasí esakínan.

Kòrsou, bo yunan di puru sepa ke sá si den Kòrsou òutónomo de Reino, lo bo siguí tolerá grosería, mal espina, falsedat, skondementu di kos pa propio interes di sierto amtenarnan kontra e pueblo di bo barika òf ku lo bo limpiá mal konduktonan djesnan ku ta participá den e mal konduktonan akí pa despues n'e momento oportuno nan labá nan man di nobo pa nan propio interes.

Kòrsou, bo yunan di puru sepa ke sá si lo bo pèrmití ku bo ta wòrdu manipulá pa tin enemistad ku bo pueblonan bisiñanan ku ta en buska di bo amistat i hermandat.

Kòrsou, bo yunan di puru sepa ke sá si lo bo pèrmití bo hubentut materialisá di mas i akulturisá pa influensianan materialista di influensianan di suelanan friw.

Kòrsou, bo yunan di puru sepa ke sá  si un grupito goloso pa kos lo siguí "verneder" bo masa grandi ku nan sinbèrguensería dor di plumá bo i bo entradanan i pa falta di balornan i normanan, nan lo siguí buská hustifikashonnan pa nan maldatnan den mustramentu na otro ku e mesun falta di balor- i normanan ku nan.

Kòrsou, bo yunan di puru sepa ke sá si parti di bo hubentut lo kedá sin okupá nan mes mas ku nan desaroyo mental i spiritual pa desaroyo di personalidatnan korekto riba bo barika i pa por resistí nan mes kontra di maldatnan pa plaka i kos p'asina hinká nan mes den pèrtá pa despues por subí internèt pa pidí limosna, manera t'e kaso ku sosiedatnan friw, asina yamá, riku, na kosnan material peró pober na kosnan spiritual i kultural.

Kòrsou, bo yunan di puru sepa ke sá si lo bo ta atento p'esnan ku ta kaná prediká bondat ku segun nan,  palabranan di Dios, peró ku den profundidat di nan ser nan ta adorá maldat.

Kòrsou, bo yunan di puru sepa ku sá si bo ta alerto pa traishon djesnan ku ta matá tur bo kosnan bon pa plaka i kos.

Kòrsou, bo yunan di puru sepa ke sá si lo bo sá di evitá ku hubentut pa puru falta di sèn di mayornan, lo kometé atrako pa por buská enseñansa i edukashon pa nan pèrsona.

Kòrsou, bo yunan di puru sepa ke sá ku bo yunan tin ku skondé maldat pa puru miedu di pèrdida di interesnan pèrsonal i pa oportunismo i pa siguí trastòrná bo pueblo òf ku lo bo limpiá bakamundería pa por tin adelanto di normanan i balornan, konduktonan spiritual sano, amor i hermandat pa bo pueblo i pa bo pueblonan bisiña i un kondukto dediká na adelanto di un i tur.

Kòrsou, bo yunan di puru sepa ke bo kontesta.