BRIANCON, FRANCIA -- E kolombiano Juan Mauricio Soler Hernandez a gana ayera un di e etapanan mas duru di Tour de France. Durante e di tres i último etapa den Alpen, konsiderá e etapa reina di Tour de France, e kolombiano a wanta su eskapada for di Galibier te na e desenso final na Briançon pa gana den un tempu di 4 ora, 14 minüt i 24 sekònde.
“Danki Dios mi pianan a respondé. Mi a yega mi meta”, asina Soler a bisa.
E etapa di 159,5 kilometer a kuminsá na e stashon di invierno Val d'Isere te Briançon, ku e arenanan kompliká di seru Iseran i Galibier. “Mi no kier a bai for di e Tour aki sin trata di hasi algu”, asina e siklista di 22 aña a duna di konosé. El a rekonosé ku e tabatin kalamber den su pianan den e etapa di ayera.
Soler, di e ekipo Barloworld, a skapa for di Galibier i e peloton, no opstante esfuersonan pa kontrarestá su ritmo, nunka por a alkanse. Awor aki e kolombiano, di e suidat Boyacá, ta di 14 den e klasifikashon general.
Soler a bisa Radio Caracol ku el a sali manera un loko, pero el a a bisa mesora ku sin un hende no tuma riesgo, un hende no ta gana nada.
Presidente di Fransia, Nicolas Sarkozy a duna Soler pabien riba e podio.
Den e klasifikashon general, e danes Michael Rasmussen ta sigui na promé lugá ku un tempu di 43:52,48, siguí pa e spañónan Alejandro Valverde na 2 minüt i 36 sekònde i Iban Mayo, na 2 minüt i 39 sekònde. Rasmussen a drenta 42 sekònde despues di e kolombiano. Miéntras tantu e kazakistano Alexandre Vinokourov, ku a sali komo un di e faboritonan ta na 8 minüt di Rasmussen.
E viktoria di Soler ta bin serka di esnan lográ pa su kompatriotanan Lucho Herrera, Fabio Parra, Chepe González i Santiago Botero, entre otro. Ta di 13 etapa ku un kolombiano ta gana den historia di Tour de France. Presidente Sarkozy a presensiá e etapa den un vehíkulo di kareda huntu ku direktor di e evento Christian Prudhomme.
E di 10 etapa lo ta 229,5 kilometer entre Tallard i Marseille, un trayekto un poko mas plat pa duna deskanso na e siklistanan despues di tres buèlta den Alpen promé ku nan drenta e áreanan mas montañoso di Pirineo den e parti zùit di e pais.