Korsou, bo yunan di puru sepa ke sá si den Kòrsou nobo lo tin lugá pa bombanan moderno ku ta dispuesto di ser inhustu kontra nan kompañeronan katibu, pa nan propio hamber pa kos i plaka.

Korsou, bo yunan di puru sepa ke sá ku bo tin di kedá "opgescheept" ku hendenan ku ta wòrdu yamá "Tòp" , pero sin kalidat ni talento pa por meresé e kalifikashon di "Tòp".

Korsou, bo yunan di puru sepa ke sá ku bo tin di kedá "opgescheept" ku e "Tòpnan" direktor ku no por manehá ni un òuto té pa nan por manehá un organisashon.

Korsou, bo yunan di puru sepa ke sá ku bo tin di kedá "opgescheept" k'e "Tòpnan" ku ora nan wòrdu èksiguí pa nan manehá, nan ta birá manera vruminga loko, buská katibunan pa despatjá di nan pa nan por duná e "schijn" di ku no ta nan mes t'esnan ku ta ínkapasitá, sino otronan, manera nan struktura pèrsonal di tirá falta di nan fayo riba otronan ta konseguí nan pa hasí.

Korsou, bo yunan di puru sepa ke sá si bo ta despatjá djesnan hipókritá, brutu, agresivo den nan dunamentu di "leiding", e abuzadónan, esnan di moral dòbel, esnan falsu pa plaka i kos, e kobardenan insultadó djesnan ku nan ta konsiderá menos i e adoradónan djesnan ku nan ta konsiderá mas.

Korsou, bo yunan di puru sepa ke sá ku pa ínkapasidat di bombanan, nan tin ku kedá trá te lat pa krea e "schijn" di ku nan ta tradónan duru.

Korsou, bo yunan di puru sepa ke sá k'e bombanan modèrno huntu ku nan muchanan mandá yen di miedu, lo siguí strobá katibunan pa por desaroyá nan mes pa bienestar di bo barika, k'e bombanan modèrno lo siguí yudá benefisiá i previligiá e (neo)kolonisadó den su chouvinismo (neo)kolonial ku ta surpasá frontera pa apoderá di fronteranan di katibunan pa por hasí i deshasí den suela di katibunan, k'e bombanan modèrno lo siguí sintí un goso sadístiko pa oprimí i kometé inhustisia kontra nan propio kompañeronan katibu den nan desaroyo, k'e speransa dje bombanan modèrno akí di por wòrdu rekompensá  despues dor di (neo)kolonisadónan ku plaka i kos, pa nan maldatnan kometé kontra di katibunan kompañeronan, k'e bombanan modèrno akí lo siguí distinguí entre e (neo)kolonisadó i e katibu pa por siguí previligiá e (neo)kolonisadó i oprimí e katibunan pa añanan largu, ku òf sin ayudo di nan mannan largu di miembronan di nan nètwèrknan òf di nan muchanan mandá, ku nan ta hungá bòu di un "hoedje" kuné, ku nan weganan di Kompa Nanzí i nan faltanan di integridat i nan maluzonan di poder ku nan a hañá komó amtenar, asina yamá haltu.

Korsou, bo yunan di puru sepa ke sá k'e bombanan modèrno pa falta di nan "self esteem" y pa nan kompleho di inferioridat y nan mentalidat di bromadónan, lo siguí apliká na un manera inadekuá i limitá leynan inadekuá i (neo)kolonial pa puramente hungamentu di sabí den kara di pueblo y pa hungamentu di sabí kontra otro i kontra esnan di kendenan nan no sá mes ku nan ta mas sabí ku nan.

Korsou, bo yunan di puru sepa ke sá k'e bombanan modèrno lo kedá demonstrá poder kontra di pueblo pa pèrhudiká i intimidá pueblo mas tantu posibel pa kreá e impreshon di ser poderoso y espantoso ku nan "operette"nan diktatorial i nan líonan di ínkompetensia, kreando (in)konsientemente "concentratiekamp"nan spiritual i mental den sosiedat.

Korsou, bo yunan di puru sepa ke sá, k'e bombanan modèrno lo kedá uzá Kompa Nanzi den nan inkapasidat i miedu, pa apliká nan trikinan maligno pa siguí oprimí otronan hasiendo maluzo dje poder ku nan a hañá komo amtenar, asina yamá haltu òf nò.

Korsou, bo yunan di puru sepa ke sá k'e bombanan modèrno lo kedá hasí distinshon entre yunan di Korsou.

Korsou, bo yunan di puru sepa ke sá k'e bombanan modèrno lo siguí papiá di Portugues, Chines, Arabir, Afrikano, Boneriano, Rubiano, Bedjí, Kulí, nanishi hanchu, nanishi smal/fini, "lip" diki, "lip" smal/fini, kabayero nèchi delegá koló di kòfi ku lechi, Colombiano, Venesolano, Panameo, Dominikano, Hudiw, pretu, blanku, kòfi ku lechi, menos kòfi ku lechi, mas kòfi ku lechi, tjukulati, mas lechi ku tjukulati, mas tjukulati ku lechi, etc., enbes di papia di "Yu di Korsou di puru sepa".

Korsou, bo yunan di puru sepa ke sá si bombanan modèrno lo kedá balotá otro riba nan fam, sospechá sin niun base ken su fam nan ta suponé ta kumprá òf nò, kiko nan a hasí, di kuá famía nan ta biní etc. 

Korsou, bo yunan di puru sepa ke sá si, meskos ku na suelanan friw lo desaroyá "enterpreneur"nan i amtenarnan asina yamá "haltu" ku falta di tur lokual ta moral, integridat y étikanan kultural, pa buská argumentunan nó plòusibel pa nan por yená nan saku ku entradanan "Brutu Nashonal" ku tur tradó den sosiedat a sòru pa por wòrdu realisá.

Korsou, bo yunan di puru sepa ke sá si meskos ku na otro paísnan di suelanan friw òf nò, lo lanta un generashon di Marianan ku blusanan floriá y sapatunan ku diseñonan di barbulètè "rose" ku karsonnan floriá, lo presentá nan mes komó María pa despues resultá ku nan ta Mario i no Maria.

Korsou, bo yunan di puru sepa ke sá si sierto katibunan lo siguí kaná trá yunan akí i ayá, yunan ku nan no por ni kría, i demonstrando e konduktonan akí nan ta transmití malkonduktonan pa e yunan akí, ku na nan turno lo praktiká e malkonduktonan akí ku nan a kué for di nan "role modèl"nan robes òf for di nan amigunan ku a influensiá nan robes, ku sierto katibunan ta preferá di ta fló i skohé pa ganá sèn fasil ku maldat, enbes di desaroyá nan pèrsonalidat den un bon sentido di balor- i normanan bon promé, pa por ganá nan pan na un manera honesto i ku un bon konsenshi.

Korsou, bo yunan di puru sepa ke sá si bombanan modèrno lo realisá, ku nan kedá koré trei plaka i kos sin niun kapasidat òf talento, a lo largo ta tur hende ta pèrdí pasobra no tin aktividatnan produktivo den sosiedat, ma puru sinbèrguensería di hendenan ku poko integridat i falta di balornan i normanan moral i étika.

Korsou bo yunan di puru sepa ke sá si e bombanan modèrno lo por siñá dominá nan sinbèrguenseríanan pèrhudikante den  Korsou nobo, pa adelanto di Korsou den tur su potensialnan i ku lo bo koré ku nan promé ku ta lat.

Korsou, bo yunan di puru sepa ke sá si bo métodonan di terapíanan tradishonal kontra di ADHD, di "zelfopgelegde" stressnan i di neurotismo (neo)kolonial etc., ku ta enserá kué de bes en kuando un paso riba un wawankó, un salsa Antiyana, un rumba, un bolero, un merengue, un son, un montuno, un tambú, un tumba etc., lo kedá èksistí òf ku riba bo barika lo wòrdu introdusí pa bombanan modèrno teoríanan di suelanan friw ku no tin niun laso kultural ku bo barika i ku ta tresé esnan temporalmente malu i den un "trip", den un siguiente "trip"mas pío, pa motibu k'e terapíanan akí mas bien ta straño p'e mundu kultural dje pashèntnan temporal katibu, lokual ta "belast" nan selebralmente mas ku ta nesesario.

Korsou, bo yunan di puru sepa ke sá si hobennan ku ta bibá un bida superfisial ku poko "bagage" spiritual pa motibunan materialista, lo siguí fihá nan mes riba nan "uiterlijk", pa falta di guíanan spiritual, pèrdidánan di nan "self esteem" i pa yená nan bashínan mental, ku al fin al kabo ta hibá nan den mal kamindanan pa motibu di tentashonnan na kuá nan ta "blootgesteld" na dje den e mundu materialista kuá ta rondoná nan y pa faltanan dje Balor- i normanan ku mester por frená nan den nan dwaalmentunan den nan conceptonan di libèrtat sin final.