Laprensa Newspaper - General

Sürnam a prohibí tur produkto: No tin nesesidat pa tuma medida kontra lechi kontaminá for di China na Kòrsou

Mon, 06 Oct 2008 22:47:42 -0700

WILLEMSTAD – No tin nesesidat pa tuma medida kontra lechi i produktonan di lechi kontaminá for di China na Kòrsou. Asina un bosero di Inspekshon pa Protekshon di Salú a bisa LA PRENSA awe mainta relashoná ku e desishon di outoridatnan di Sürnam. Gobièrnu di Sürnam a prohibí importashon di produktonan di lechi for di China entrante awe.
Inspekshon di Protekshon di Salú ta sintá ku e situashon ku su medidanan ta konta pa tur isla antiano komo ku ainda Antia ta kai bou di un régimen. Pa loke ta trata Kòrsou, GGD (ku ta un entidat insular) a hasi diferente sondeo i a determiná ku e kantidat di produkto di lechi for di China importá na Kòrsou ta mínimo.
Loke si a pasa ta ku Duana a wanta un kònteiner ku produkto for di China, pero despues ku a determiná ku no tabata trata di produktonan dañino a kita e embargo riba e kònteiner. Outoridatnan antiano di tur manera ta sigui vigilá e situashon di serka, asina nan a garantisá awe. Un di e produktonan ku nan ta vigilando ta un tipo di mangel chines ku lo ta kontaminá. Te awor aki no a konstatá e mangel aki riba merkado lokal.

Score: 7.0, Votes: 1

Shofùr probablemente bou di influensia di alkohòl: Damita di 19 aña a muri den tráfiko

Sat, 04 Oct 2008 20:17:18 -0700

WILLEMSTAD – Un mucha muhé di 19 aña di edat a muri awe mardugá despues ku un outo a alkans’é riba F.D. Rooseveltweg. E víktima Louine Colette Pop tabata krusando kaya na altura di e edifisio di Baas, nèt na momentu ku e vehíkulo tabata aserkando. E choke tabata inevitabel.
Tabata den kareda di 2’or di mardugá, ora ku e damita huntu ku algun otro hende a kaba di sali un ambiente di tambú. Tin indikashon, ku konosínan di e damita lo a bin busk’é pa hib’é kas i el a kuminsá krusa kaya pa bai na e outo. No ta konosí si e outomobilista, un empleado di Centrale Politie Dienst (CPD), tabata manehando su vehíkulo duru ni tampoko si el a mira e damita ta krusa kaya. Tin indikashon ku e tabata bou di influensia di alkohòl i tabata koriendo su outo riba e banda kontrali di kaminda. Testigunan a informá, ku despues di e aksidente, e outomobilista a bai pidi algun hende ku tabata na e sitio despensa. E personanan lo a agredié i herid’é. Informashonnan no ofisial ta bisa ku ta amigunan di e víktima ku a mira eksaktamente kon e aksidente a tuma lugá. Mester a yama un ambulans pa transportá e outomobilista pa Poli.
Bosero di polis a konfirmá awe mainta ku a ordená e polis pa mèldu su mes na warda di polis awe mainta pa mas investigashon i tambe pa hasi un tèst di alkohòl. E víktima Pop a bira e di diestres morto di tráfiko pa e aña akí. El a bira tambe e di sinku hóben ku a muri den tráfiko e aña akí. Anteriormente Audrey Chacon (12), Jaleesa Asiedu (19) ,Keesje Lake (20) i Beatrix Geraldo (24) tambe a muri dor di un aksidente di tráfiko. E hobensita Chacon a muri na altura di Tera Kòrá ora un shofùr di bùs ku tabata koriendo duru a alkans’é. E damita Asiedu a muri den un hòspital na Merka despues ku algun dia promé e tabata sintá den un vehíkulo ku a dal den un kurá di kas di blòki riba Weg naar Bullenbaai. E no tabatin su faha di seguridat bistí. E aksidente akí tambe a sosodé dor di ekseso di velosidat. E hóben Lake tambe a muri despues ku e outo ku e tabata sintá aden a dal den un kurá di kas di blòki. E tampoko tabatin su faha di seguridat bistí. Finalmente tin e kaso di e dama Geraldo ku a muri ora e outo ku e tabata sintá aden a kai for di un pir na Caracasbaai. Tin indikashon ku e shofùr di e outo tabata bou di influensia di alkohòl.

Score: 0.0, Votes: 0

Impacto i Securitas a krusa kaya ku 1400 empleado

Sat, 04 Oct 2008 05:52:05 -0700

WILLEMSTAD – E kompania di seguridat Securitas Antias i Grupo Impacto a krusa kaya pa drenta un ofisina nobo den e edifisio monumental renová na Scharlooweg 19. Ku un duelo di dos trompetista, un riba e bòrdèshi di e ofisina anterior na Scharlooweg 104 i un riba esun di e ofisina nobo na Scharlooweg 19, a simbolisá e mudansa aki. Gezaghèber Lisa Dindial a duna señal na e sinku yunan di e rumannan Guido i Jeroen Kibbelaar pa hisa un kòrtina, di moda ku e porta a habrí pa e ofisina nobo bira bisto pa un i tur. Na 1981 defuntu èks gezaghèber Anno Kibbelaar a lanta Securitas i na 1987 Uitzendbureau Impacto.

Score: 0.0, Votes: 0

Diputado Anthony Godett: Basha edifisio St. Thomas ta kosta 800 mil florin!

Thu, 02 Oct 2008 19:16:15 -0700

WILLEMSTAD – Konseho di Domein i AJZ mester drenta pa mira ken ta karga e gastunan di bashamentu di edifisio St. Thomas abou. E trabounan aki lo kosta 800 mil florin i ta un asuntu ku mester atendé promé ku kuminsá. Den kombersashon ku diputado Anthony Godett ta splika LA PRENSA, ku for di momentu ku a risibí e petishon di gerensia di Sehos a manda buska konseho di tantu Domein komo AJZ pa mira kon e bashamentu di edifisio di St. Thomas ta bai. Diputado Godett ta splika, ku mester duna gobièrnu tempu pa atendé e asuntu aki, si gerensia di Sehos mes ke kubri e gastunan aki. Edifisio St. Thomas no ta un edifisio protehá, pues mester buska un forma pa basha abou.
Den tur e diskushonnan ku tin pa un hospital nobo, a keda demostrá ku e mihó úbikashon ta Otrabanda i por a evitá e diskushonnan aki si a atendé e asuntu aki basta tempu pasá. E mandatario ta konsiente ku tin peliger ku e edifisio aki ta kousa pa e hospital, ya ku e parti higiéniko sigur no por pèrdè for di bista, pero tambe peliger pa bishitantenan. Di otro banda, e historia ku tin tras di e edifisio aki kaminda hopi di persona importante den komunidat a pasa nan kareda estudiantil na e skol aki, meskos e trabou importante ku fraternan a aportá na komunidat.
Den e diskushonnan pa ekspandé awe no tin nodi si a pèrkurá pa solushoná e problemanan aki dor di duna Sehos e edifisio aki. Diputado Godett ta kere pa duna espasio pa mira kiko ta e konseho i ken lo bai karga e gastunan aki pa basha edifisio St. Thomas abou.

Score: 0.0, Votes: 0

Rekonosimentu na Grandinan di Fundashon 60+

Wed, 01 Oct 2008 20:58:37 -0700

WILLEMSTAD – Diputado Humphrey Davelaar na nòmber di Gobièrnu di Kòrsou a hasi entrega di un rekonosimentu na Fundashon 60+ pa nan trabou bou di grandinan. Awe riba Dia Internashonal di Grandinan, selebrashon rònt e isla a tuma lugá prinsipalmente na institutonan ku ta duna servisio na grandinan pa pèrmití grandinan selebrá. Eksperensia ta sinta serka nan grandi i ku orguyo semper grandinan lo ta di vital importansia pa e pais. Den su diskurso diputado Davelaar a splika ku grandinan tin un balor importante, ya ku ta serka grandinan el a lanta i ku awe e por ta un diputado pa sirbi su pais ku integridat. Riba e foto por mira diputado Humphrey Davelaar ta hasi entrega di e plaka di rekonosimentu na Fundashon 60+. (Foto: Norwin Josepa).

Score: 0.0, Votes: 0

Vernon Isabella tambe a bira víktima; Bòrchi di tráfiko hinká den betòn ta peligroso

Tue, 30 Sep 2008 15:41:57 -0700

WILLEMSTAD – Un bòrchi di tráfiko di kua e staka ta hinká den betòn ta forma un peliger grandi den tráfiko. E asina yamá ‘fixed hazardous objects’ nan akí ta pone, ku ora un vehíkulo dal den nan, e okupantenan por keda gravemente heridá. Anteriormente esaki tabata e kaso ku e pelotero Vernon Isabella.
Un ‘fixed hazardous object’ ta un opheto òf konstrukshon kantu di kaminda, ku no ta dobla òf kibra ora un vehíkulo dal den dje. Esakinan por ta stakanan di billboard, murayanan di betòn na rantnan di roi, palunan di lus ku no ta dobla ni kibra i bòrchinan di tráfiko hinká den betòn. Internashonalmente ta propagá pa basta tempu kaba pa usa stakanan di aluminio ku ta kibra òf dobla fásil ora un vehíkulo dal den nan. Meskos ku un vangrail ku ta kita for di su lugá ora un vehíkulo dal den dje.
E aksidente ku a sosodé djadumingu mainta na altura di W.I. Compagniestraat, ta un bon ehèmpel kaminda un ‘fixed hazardous object’ a kousa heridanan serio serka un okupante den e vehíkulo ku a dal den e bòrchi di tráfiko ku ta indiká direkshon. E staka tabata hinká den betòn i a keda pará riba su kurpa despues ku e vehíkulo a dal den dje. Esaki a kousa daño material kuantioso na e vehíkulo i heridanan serio serka un di e víktimanan.
Algun tempu pasá tabatin un aksidente na altura di Nijlweg, kaminda un outo a dal den un mesun tipo di bòrchi di tráfiko ku ta indiká direkshon. Den e aksidente akí e pelotero Vernon Isabella a keda gravemente heridá. Sinembargo no tin niun intento pa remplasá e bòrchinan akí i pone stakanan di aluminio òf otro material ku ta dobla òf kibra mes ora.

Score: 5.0, Votes: 1

Ekipo balioso di NAAM a somentá

Mon, 29 Sep 2008 19:43:09 -0700

WILLEMSTAD – Awe mardugá den kareda di mitar di 3, deskonosínan a kibra un heru di porta i drenta edifisio di NAAM na Johan van Walbeeckplein. A bai ku un gran flatscreen (Plasmascherm) di 110 meter hanchu i 60 cm. di altura ku e number DDPTCC 02091. Tambe a bai ku un Sony DVD Player. Tur dos tabata forma un parti esensial di e eksposishon Freeports of the Caribbean, Curaçao and St. Eustatius i pa skucha sonido, papiamentu i musik di ántes i imágennan di bida na Curaçao i St. Eustatius dos siglo pasá. Esnan ku por tin mas informashon por yama NAAM na: 4621933/ 4621934. Por mira e flatscreen na e parti drechi abou.

Score: 0.0, Votes: 0

Volkano di awa i pieda

Fri, 26 Sep 2008 16:42:12 -0700

WILLEMSTAD – Un kantidat grandi di awa i pieda a spùit sali ku furia for di bou di tera awe mainta riba Piscaderaweg. Un pipa prinsipal ku a kibra tabata kousa di e erupshon di pieda ku a keda plamá riba kaminda. Entretantu trabounan di rekonstrukshon di e pipa a tuma lugá i habitantenan den e área mester tene kuenta ku e awa di kranchi por ta maron den transkurso di awe. (Foto: Yves Cooper)

Score: 7.0, Votes: 1

Vèlt di basket Teofilo Cuales inougurá

Thu, 25 Sep 2008 17:39:41 -0700

WILLEMSTAD – Diputado di Deporte, sra. Marilyn Alcalá-Wallé den oranan di awe mainta, mester a kore kancha den un partido inougural di e vèlt di basket Teofilo Cuales na Mundu Nobo. Den su esfuerso a logra di anotá riba e muchanan di skol ku tabata presente na e inougurashon di e vèlt di basket aki. Tambe tabata presente diputado Zita Jesus-Leito ku a inougurá e proyekto di Quickwins. E bario di Mundu Nobo un biaha mas por kuminsá disfrutá di e vèlt di basket pa praktiká e deporte. Riba e foto por mira diputado Alcalá-Wallé ku e lansamentu di bala den e nèt awe mainta. (Foto: Ronny Schmidt)

Score: 0.0, Votes: 0

Siman di Turismo a saka muchanan pa entregá regalo na Megapir!

Wed, 24 Sep 2008 19:02:11 -0700

WILLEMSTAD – Den kuadro di Siman di Turismo, CTB huntu ku diferente skolnan a organisá un mainta di enkuentro di turistanan na diferente sitio di e isla. Awe mainta, huntu ku diputado di Turismo, Eugène Rhuggenaath, alumnonan di skol básiko Santa Familia, a bishitá Megapir pa entregá regalo na turistanan ku tabata baha for di e krusero Royal Caribbean. Tabata un forma pa enbolbí e muchanan ku turista, ku sigur a kai den bon tera. Por a mira klaramente ku e muchanan tabata disfrutá di e mainta, miéntras ku e turistanan mes tabata gosa di e forma ku CTB a skohe pa hasi turismo awe mainta. Riba e foto por mira un grupo grandi di mucha den kompania di diputado di Turismo Rhuggenaath, funshonario di CTB Dino Daal, maestranan di skol durante e entrega di regalo na Megapir. (foto Norwin Josepa)

Score: 7.0, Votes: 1

Prezu ku kastigu di bida largu asesiná den Bon Futuro!

Tue, 23 Sep 2008 21:18:04 -0700

WILLEMSTAD – Outoridatnan a konfirmá awe mainta ku den un kaso di tiramentu ku tabatin den Bon Futuro un prezu a resultá morto. Ta trata di Cornelis Walker nasé na Sint Maarten. E tabata sintando un kastigu di bida largu den e instituto. ( sigui lesa Polisial )

Score: 5.0, Votes: 1

Espektativa

Sat, 20 Sep 2008 21:30:17 -0700

WILLEMSTAD – Tur hende ta pendiente pa otro siman pa haña sa kiko eksaktamente investigadornan a deskubrí den e kaso di hasimentu di negoshi den Curoil, kaso ku a haña e nòmber Toko den Toko. Niun hende no ta lagando masha kos slèk te awor aki. Informashonnan ku LA PRENSA a haña ta bisa ku e informe final lo ta kla djamars awor. E rapòrt a tarda un poko, pasobra no por a haña tur dokumentu mesora. Despues ku e rapòrt ta kla, lo someté na gerensia i STIP ku tin e desishon final kiko ta hasi ku e rapòrt. Pendiente di e rapòrt e banderanan na Curoil ta wayando ku masha alegria.

Score: 5.5, Votes: 2

LA PRENSA tambe aktivo den Siman di Kultura 2008

Sat, 20 Sep 2008 00:18:28 -0700

WILLEMSTAD – Manera a keda publiká ayera ku koleganan di LA PRENSA no solamente ta relatá eventonan den kuadro di Siman di Kultura, pero a partisipá. Gerensia a regalá kada empleado un lantèrna yená ku pasa boka. E lantèrna lo sirbi despues pa ora koriente bai. Tambe vários kosnan dushi i kuminda di ántes a keda sirbí durante oranan di trabou. Riba e foto por mira empleadonan di LA PRENSA a tuma nota di un impakto grandi ku Siman di Kultura a pèrkurá pa mobilisá e pueblo pa pensa, buska i partisipá aktivamente den e selebrashon aki. Siman di Kultura selebrando e promé lustro sin duda lo keda un di e eventonan ku mas grandi ku a pèrkurá pa unidat di e isla. (foto Norwin Josepa)

Score: 6.0, Votes: 1

Baiskel ta parti di tráfiko!

Wed, 17 Sep 2008 18:39:04 -0700

WILLEMSTAD – Tur dia di nobo tin aksidente ku baiskel na Kòrsou. Esei ta hustifiká e pensamentu ku a bira tempu pa hasi diferente kos. Un di nan ta pa traha un infrastruktura adekuá pa koredónan di baiskel. Un otro punto ta ku mester bin un konsientisashon, prinsipalmente bou di hóbennan, ku korementu di baiskel no ta algu ku por tuma lugá pa loko i ku si bo ta hasi esei, bo tambe ta suheto na reglanan di tráfiko. Ta bon pa bisa ku tin diferente outomobilista a keda ku trouma, pasobra nan ta dal un siklista (iresponsabel) siendo ku no ta nan falta. Mayornan tambe tin un responsabilidat den e kasonan aki, prinsipalmente ora ta trata di mucha. Pendiente di kambio den infrastruktura, lo ta bon tambe pa outomobilistanan tene mas tantu kuenta ku siklistanan. Riba e pòrtrèt por mira un di e tantísimo kasonan di último lunanan. Den e kaso aki un mucha a sali for di un kaya prohibí bai topa ku un outo ku tur e konsekuenshanan. (Foto: Rudney Vrutaal).

Score: 7.5, Votes: 2

AutoCity ta djòin GM Next pa otro 10 aña!

Tue, 16 Sep 2008 21:28:07 -0700

WILLEMSTAD – Awe un selebrashon grandi na AutoCity pa e aniversario di 100 aña di GM. Un aktividat tur afó pa duna kliente i interesadonan un kareda di prueba, ademas di otro ofertanan manera deskuento riba piesa, servisio for di 8’or di mainta te 8’or di anochi. GM ta anunsiá su lema nobo GM Next, ku ta bai pa otro 100 aña i ta introdusí tambe oferta di interes spesial pa tur esnan ku kumpra un di e vehíkulonan ku AutoCity ta representá di GM. Tambe ta krea un ambiente pa muchanan ku hamburger i refresko grátis, ademas bouncernan pa muchanan, miéntras ku e mayornan ta hasi nan kareda di prueba. Riba e foto por mira un di e Hummer nobo i un grupo di trahadó di Auto City. Di parti di LA PRENSA palabra di felisitashon na staf i personal di AutoCity pa e selebrashon 100 GM.

Score: 6.5, Votes: 2