Laprensa Newspaper - Internashonal

Nobel di Medisina pa deskubridónan di vírùs di papiloma humano i AIDS

Mon, 06 Oct 2008 22:37:20 -0700

STOCKHOLM, Suesia, - E aleman Herald zur Hausen i e fransesnan Francoise Barré-Sinoussi i Luc Montagnier ta e ganadónan di Premio Nobel di Medisina 2008.
Hausen a keda premiá pa deskubrí e vírùs di papiloma humano, motibu prinsipal di kanser na boka di matris.
Miéntras ku e fransesnan Barré-Sinoussi i Montagnier a keda premiá pa nan investigashonnan riba e vírùs di HIV ku ta kousa AIDS.
E anunsio di e premio di Medisina, realisá na Stockholm, Suesia, i transmití direkto pa e página web di Fundashon Nobel, ta esun promé, i den dianan benidero lo anunsiá esnan premiá den e otro kategorianan.
Dia 10 di desèmber lo bai tin entrega di premio Nobel, aniversario di morto di su fundadó, Alfred Nobel, inventor di dinamit.
Alfred Nobel a krea e galardonnan den Medisina, Físika, Kímiko, Literatura i Pas, miéntras ku e di seis, esun di Ekonomia, a keda establesé na 1968 pa Banko Sentral Sueko.
Despues di e anunsio ken ta esnan ku a gana premio Nobel di Medisina, djamars lo anunsiá esun di Físika, Kímiko (djarason), Literatura (djaweps), Pas (djabièrnè), Ekonomia (djaluna 13 di òktober).

Foto: Francoise Barre-Sinoussi 0610

Francoise Barré-Sinoussi, ko-deskubridó di vírùs di HIV.

Foto: Luc Montagnier 0610

Luc Montagnier, sientífiko franses ku a deskubrí e vírùs di HIV huntu ku e tambe franses Francoise Barré-Sinoussi.

Score: 0.0, Votes: 0

Simpson i ko-akusado a ser deklará kulpabel

Mon, 06 Oct 2008 22:34:01 -0700

LAS VEGAS – Na e siudat kaminda suerte ta tur kos. O.J. Simpson a ser deklará kulpabel, i 13 tabata su number di mala suerte den un kaso ku tabatin kambionan inesperá.
Simpson a keda kondená pa un robo ku arma ku a tuma lugá 13 di sèptèmber i a ser deklará riba e di 13 aniversario di su apsolushon pa un asesinato na Los Angeles. E hurado di su kaso na Las Vegas a deliberá 13 ora despues di un huisio di 13 dia.
Djabièrnè anochi, ora e úniko kos ku tabata skucha tabata e yoramentu di e ruman muhé di e eks strea di NFL, e lusnan di korte a paga.
E guardianan a sende lusnan di seguridat i a grita tur hende pa nan keda na nan lugá. Solamente e wes muhé tabata sa loke ta pasando, tabata diesun’or di anochi i e lusnan di e edifisio a paga outomátikamente.
Sim,pson, di 61 aña i un dje streanan di Salòn di Fama, a ser deklará kulpabel pa sekuestro, robo armá i 10 otro akusashon pa a reuní sinku hòmber i drenta den un kamber di un hotèl kasino di Las Vegas kaminda e grupo a hòrta diferente kos, plakat i fotonanan mas ku un aña pasá. E investigadónan a afirmá ku dos dje hòmbernan tabata armá, un di esnan impliká a afirmá ku Simpson mes a pidié pa e bai ku un pistol.
Asina ku el a ser deklará kulpabel a pone bui riba dje i a sak’é di korte huntu ku e otro akusado, Clarence “C.J.” Stewart. Tur dos lo por haña un kastigu di asta bida largu.

Score: 0.0, Votes: 0

O.J. Simpson, kulpabel

Sat, 04 Oct 2008 20:40:11 -0700

LAS VEGAS, Nevada, Merka, - E eks hungadó di futbòl amerikano i aktor O.J. Simpson a keda deklará kulpabel di 12 kargo di atrako arma, intento di sekuestro i atrako ku un arma mortal, pa un Tribunal di Las Vegas, Merka.
O.J. Simpson, di 61 aña di edat, a keda akusá di atraká dos bendedó di piesanan di kolekshon, mas ku un aña pasá, den un kamber di un hotèl di e kasino Palace Station di Las Vegas.
Inisialmente, Simpson a bisa ku su úniko intenshon tabata rekuperá su propiedatnan.
Su kómplise, Clarence “C.J.” Steward, tambe a enkontré kulpabel di tur akusashon.
E hurado di nuebe dama i tres hòmber a deliberá durante mas ku 13 ora, ayera.
Simpson lo por pasa sobrá di su bida tras di trali, ya ku e kargonan di atrako armá ta impliká un sentensia di prizòn obligatorio i pa e intento di sekuestro e eks estrea deportivo lo por konfrontá un kondena di kadena perpetua.
Despues di e lektura di su veredikto, Simpson, kende a ninga e akusashonnan, a keda di bui i kondusí pa prizòn sin fiansa.
E lo keda sentensiá 5 di desèmber.
13 aña pasá
Ta hasi eksaktamente 13 aña pasá, 3 di òktober 1995, a deklará Simpson inosente di asesinato di su eks esposa, Nicole Brown, i di un amigu di Nicole, Ronald Goldman.
Sin embargo, un tempu despues a enkontr’é kulpabel den un huisio sivil i a dun’é òrdu pa paga 33.5 mion dollar den dañonan, algu ku e no a hasi.

Score: 0.0, Votes: 0

Lidernan europeo ta analisando e krísis finansiero

Sat, 04 Oct 2008 20:18:10 -0700

PARIS, Fransia, - Ku e reseshon gòlpiando su portanan, Europa ta tene su promé kumbre di alto nivel na Paris awe, pa konfrontá e krísis finansiero, sin un plan di akshon na bista i ku notorio divishonnan interno.
Konvoká di urgensia pa e presidente anfitrion, Nicolas Sarkozy, e lidernan di Alemania, Italia i Reino Uní, tambe e máksimo herarkianan europeo, lo buska mehorá nan kordinashon pa salba e bankonan for di bankarota i reformá e regulashon kontabel.
E intenshon ta logra un konsenso europeo promé ku e reunion di ministernan di Finansa i gobernadornan di Bankonan Sentral di G8, siman benidero, na Washington, Merka.
No opstante, e idea di krea un fondo europeo di reskate bankario similar ku esun aprobá na Merka, ventilá pa Fransia, a keda deskartá frente oposishon di Alemania i di Reino Uní.
“Nos tur mester ta di akuerdo pa intervení ora ta hasi falta, pa evitá kualke riesgo sistémiko”, e sekretario di Estado franses di Asuntunan Europeo, Jean-Pierre Jouyet a bisa oranan promé ku e reunion.
Vários banko grandi europeo ta na rant di kiebro, debí n’e krísis di kréditonan hipotekario di alto riesgo na Merka (“subprime”), i ta’tin ku nashonalisá nan parsial òf totalmente den último dianan.
Entre e bankonan asistí ta figura e banko belgo-ulandes Fortis, e banko franko-belgo Dexia i e banko britániko Bradford & Bingley.

Score: 0.0, Votes: 0

Chávez reakshonando riba plan finansiero: Merka algun dia lo yega sosialismo

Sat, 04 Oct 2008 19:51:19 -0700

CARACAS, Venezuela, - E presidente di Venezuela, Hugo Chávez, a ekspresá ku e plan di reskate finansiero di Gobièrnu di Merka lo no faboresé e pueblo merikano sino e hendenan riku i el a afirmá ku “algun dia” e sosialismo lo yega Merka.
E mandatario venezolano a hasi un komentario sarkástiko riba e plan di reskate p’e bankonan pa e krísis finansiero aprobá pa Senado di e pais aki, indikando ku awor presidente George W. Bush ta tuma medidanan ku e lider soviétiko Vladimir Lenin lo a aprobá.
“Awor Bush a tuma desishonnan propio di Lenin. Ta pasobra Merka ta bayendo sosialismo? Ami ta bisa: Si, yes, Sir! Algu dia Merka lo yega sosialismo, mi no tin e menor duda, pasobra e pueblonan no ta kometé suisidio”, asina e lider venezolano a bisa na apertura di un feria turístiko na estado di Bolívar.
Chávez a señalá ku e empresanan grandi kapitalista ta afektá pa e kolapso di e modelo neoliberal i ku ta skondiendo e realidat aki pa pueblo merikano, “ku no por keda informá verazmente”.
Ademas Chávez a indiká ku e plan di reskate aprobá den Kongreso merikano no ta “un reskate pa pueblo, sino pa hendenan riku, pa e bankonan grandi di senk”.
Chávez a rekòrdá ku na 1994 Venezuela a biba un krísis bankario di amplio proporshon ku a afektá míles di famia, miéntras ta’tin bankeronan kapitalista kendenan a huí bai ku e ousilio nan finansiero.

Score: 0.0, Votes: 0

A libra Raúl Baduel despues di akus’é pa supuesto maneho iregular di rekursonan

Sat, 04 Oct 2008 19:50:06 -0700

CARACAS, Venezuela, - E eks general Raúl Isaías Baduel, eks minister di Defensa di aktual opositor, a keda librá ayera despues di a keda detené pa interog’é pa supuesto maneho iregular i fondonan durante su gestion ministerial (2002-2007) i efektonan pertenesiente na Fuerza Armada Nacional pa mas ku 31 mion bolívar fuerte, ekivalente na 14.4 mion dollar, su abogado defensor a informá.
E militar ta den libertat i ku medidanan koutelar, pa kua ta prohibié sali for di e pais i e mester presentá kada 15 dia dilanti Fiskalia militar, e abogado Rafael Tosta a señalá.
Baduel, di kende hustisia a atvertié ku e no por hasi deklarashonnan riba e proseso den kurso, a bisa di ta “dispuesto” pa aklará tur kos”, segun un mensahe kòrtiku ku el a ofresé na prensa, despues di a keda librá.
E alto ofisial a keda detené ayera na Maracay pa funshonarionan di ‘Dirección de Inteligencia Militar’, pa Fiskalia interog’é na Caracas.
Raúl Isaías Baduel tabata e mayó aliado militar di presidente Hugo Chávez.
Baduel tabata minister di Defensa te yüli 2007.
E ta pertenesé na e mesun promoshon militar ku Hugo Chávez.
El a integrá huntu ku Chávez na e movementu konspirativo dentro di Fuerzas Armadas, ounke e no a partisipá den e intentonan ku a tumba e Gobièrnu na 1992.
Na aprel 1992, ora Baduel tabata hefe militar na Maracay, el a logra neutralisá e gòlpi di estado ku a saka presidente Chávez brevemente for di poder, loke a kombèrtié den “héroe di revolushon bolivariano”.

Score: 0.0, Votes: 0

Merka: A enkontrá restunan humano den avioneta di Steve Fossett

Sat, 04 Oct 2008 06:04:11 -0700

CALIFORNIA, - E outoridatnan californiano a enkontrá restunan humano den avioneta di e aventurero mionario Steve Fossett, deskubrí djarason último na mas o ménos 3.200 meter di haltura den serunan di Sierra Nevada, situá pegá ku lagonan di Mammoth (California).
Mark Rosenker, presidente di Hunta Nashonal di Seguridat den Transporte di Merka, a indiká ku e restunan humano enkontrá ta tiki, ounke sufisiente pa e wes di instrukshon di e kaso por saminá e DNA.
Ophetonan personal
Djarason último polisnan di lokalidat di Mammoth Lakes a informá ku un ekskurshonista di e zona a enkontrá dokumentonan di Fossett, un T-shirt i 100 dollar kèsh na serunan di Sierra Nevada.
Tur señal ta indiká ku e material tabata pertenesé na Fossett i ku a bira den pruebanan, despues ku outoridatnan a enkontrá sobrá di avion di e aventurero, apénas mei kilometer di e zona kaminda a haña e dokumentonan.
E avioneta, aparentemente a dal di forma frontal kontra e seru.
E Hunta Nashonal di Seguridat den Transporte lo trata determiná e sirkunstansianan durante kua e aksidente a okurí.
Opseshon pa optené rèkòrt
Steve Fossett, kende su opseshon tabata konsistí den bati tur rèkòrt mundial na su alkanse, a lanta buelo parti mainta dia 3 di sèptèmber 2007, ku e intenshon di enkontrá un lago seku pa realisá su siguiente desafio.
E tabata kier a kibra e rèkòrt di velosidat riba tera ku un avioneta propulsá pa un motor kapas di alkansá kasi 1.300 kilometer pa ora.

Score: 0.0, Votes: 0

Plan di reskate finansiero a bai bèk Kámara di Representante

Sat, 04 Oct 2008 05:58:47 -0700

WASHINGTON, Merka, - E Kámara di Representante di Merka awe tin ku bolbe konsiderá aprobashon di e vershon revisá di e plan di reskate finansiero di 700.000 mion dollar, despues ku nan a rechasá e plan original djaluna último.
E rechaso a pone e merkadonan di balor na mundu kompletu tambaliá, pero Kámara di Representante a ekspresá optimismo di ku nan lo sigui e ehèmpel di Senado, ku a aprobá e proyekto di lei ku vários enmienda.
E lider di mayoria demókrata, Steny Hoyer, a bisa ku ta spera un mayoria bipartidista.
Sin embargo, durante e debate inisiá ayera nochi, vários kongresista demókrata a kuestioná e rekortenan di 150 mion dollar añadí n’e plan aprobá pa e senadornan.
Di otro banda, un grupo di representante republikano ke inkluí nan propio enmienda, ounke un alto pènel di Kámara Abou ya a sigurá ku lo no pèrmití variantenan.
Ounke a logra mas apoyo pa e plan, e presidente dama di Kámara di Representante, e demókrata Nancy Pelosi, a ekspresá ku lo no someté e plan na un votashon, si no tin e seguridat di keda aprobá.
E presidente merikano George W. Bush a urgí e legisladornan pa nan apoyá e plan revisá, dor di bisa ku e kréditonan ta di fris i e pakete ta representá e mihó oportunidat pa koregí e situashon.
“Esaki ta un proyekto di lei ku ta ofresé mihó oportunidat pa proveé likides, krédito, sèn pa negoshinan chikitu i mediano por funshoná”, Bush a afirmá despues di a reuní ku lidernan empresarial.

Score: 0.0, Votes: 0

Tormenta tropikal “Higos” ta aserkando sùit di China

Thu, 02 Oct 2008 18:47:45 -0700

HAINAN, China, - E tormenta tropikal “Higos”, e di 17 di e aña aki, ta aserkando e provinsia meridional chines di Hainan, e stashon meteorológiko provinsial a informá awe.
Aktualmente e tormenta aki ta hañando fòrsa, i ta moviendo den direkshon nortwèst na un velosidat di 20 kilometer pa ora.
Despues di a afektá míles di persona na Filipinas, e fenómeno, segun e pronóstikonan di e stashon meteorológiko, lo asotá Laman Sùit di China ku bientunan fuerte i Hainan ku áwaserunan torensial.
A registrá “Higos” nèt despues di paso di tormentanan Jangmi i Hagupit, ku a kousa mas o ménos 20 morto na China.

Score: 0.0, Votes: 0

Kore kore na tèmpel na India a kousa 150 morto

Tue, 30 Sep 2008 15:56:12 -0700

NEW DELHI, India, - Un kore-kore na un tèmpel hindú na siudat di Jodhpur, estado indio di Rajasthan, a kousa 150 morto, na inisio di e festividat hindú di Navratri, outoridatnan lokal a informá.
Den un prinsipio, polisnan informá ku tin 78 morto i a atvertí ku e saldo por oumentá komo resultado di e kore kore na tèmpel di Chamunda Devi, kaminda a reuní 10 mil kreyente, inkluyendo un kantidat grandi di hende muhé ku muchanan.
Despues, Times Now i portalnan digital di korantnan The Times of India i The Hindu a sita un funshonario gubernamental, kende a bisa ku e saldo ta 150 morto i ku esaki por pasa 200.
Ademas, a informá di mas o ménos un sentenar di herido den e insidente, miéntras tantu outoridatnan di hospitalnan di e lokalidat tabata reklamá ku tin falta di zürstòf pa trata esnan leshoná.
Testigunan sitá pa e korantnan a bisa ku aparentemente e rumor di un bòm a motivá e desesperashon i e pániko, ku a bira un kore kore, un di e pió susesonan di e tipo aki na India.
E korant Times Now a indiká ku parse un di e murayanan di e tèmpel di siglo XV tambe a kòlèps pa preshon di e hendenan.
E sifra di morto por oumentá segun ku ta reskatando e víktimanan bou di e ruinanan.
E tèmpel ta situá den un fòrti di siglo XV riba tòp di un seru.
For di mainta trempan e debotonan a kuminsá subi e tèmpel pa selebrá e promé di nuebe dia di e festival hindú di Navratri.

Score: 0.0, Votes: 0

Janet Jackson hospitalisá

Tue, 30 Sep 2008 15:55:44 -0700

MONTREAL, - E kantante Janet Jackson, di 42 aña, a keda hospitalisá ora el a bira malu poko despues di un konsierto, su representante a bisa.
Di akuerdo ku un komunikado di e empresa W&W Public Relations, Janet Jackson a kanselá e konsierto di djaluna na Montreal, despues ku el a bira malu repentino ora e tabata revisá e sistema akústiko i inmediatamente a hib’é hospital.
Na ofisinanan di W&W no a kontestá e yamada di telefòn en buska di informashon.
Un representante tampoko a kontestá e e-mail.
Janet Jackson ta realisando un gira na Merka.

Foto; Janet Jackson 3009

Janet Jackson

Score: 0.0, Votes: 0

Obama i McCain ta kulpa otro p’e frakaso di plan di reskate finansiero di Merka

Tue, 30 Sep 2008 15:44:29 -0700

WASHINGTON, Merka, - Frente a debilitá liderazgo di George W. Bush, e kandidatonan presidensial pa Kas Blanku, e demókrata Barack Obama i e republikano John McCain, a kuminsá ataká otro i ta kulpando otro pa e frakaso di e plan di reskate finansiero na Capitol Hill.
E faktor elektoral tin un peso relevante den e krísis finansiero merikano, ya ku niun hende ta dispuesto pèrdè votonan pa respaldá un programa di reskate ku no ta garantisá konfiansa di e elektornan merikano.
Den e elekshonnan di 4 di novèmber benidero lo renobá e 435 asientonan di Kámara di Representante i 34 di 100 di Senado, p’esei e legisladornan ta kuidando nan permanensia p’e impopularidat di e reskate.

Foto: John McCain i Barack Obama 3009

John McCain i Barack Obama

Score: 0.0, Votes: 0

Kaida históriko di Wall Street despues di rechaso di plan den Kongreso

Tue, 30 Sep 2008 15:43:02 -0700

MERKA, - E Bolsa di New York a registrá un kaida históriko ayera despues di rechaso di e plan di reskate di e bankonan di parti di Kámara di Representante.
Dow Jones a pèrdè 6.98%, un pèrdida hamas registrá di mas o ménos 800 punto i Nasdaq 9.14%.
E Dow Jones Industrial Average a pèrdè 777.68 punto.
Den tèrminonan di puntonan, e anterior kaida di índise (684.81 punto a keda registrá dia 17 di sèptèmber 2001, dia di reanudashon di e operashonnan, despues di e atentadonan di 11 di sèptèmber.
E índise Nasdaq, di alto komponente teknológiko, a baha 199.61 punto.
Ya deprimí na kuminsamentu di e seshon, Wall Street a senk despues di e inesperá rechaso di e plan di reskate di e bankonan, di parti di Kámara di Representante, ku lo mester a stabilisá e merkadonan finansiero.
E Kámara Abou a rechasá e plan di sekretario di Tesoro, Henry Paulson, pa 228 voto kontra 205 na fabor.
Mas o ménos dos di kada tres republikano a rechasá e proyekto.

Score: 0.0, Votes: 0

Antonini a deklará: A ofresé mi mitar sèn di maletin si mi atmití ku e ta mi propiedat

Fri, 26 Sep 2008 16:59:12 -0700

MIAMI, Merka, - Durante e oudiensia di ayera, Guido Alejandro Antonini Wilson a bisa Diego Uzcátegui, vise presidente di PDVSA Sur, a ofres’é p’e keda ku mitar di e sèn di maletin si e atmití dilanti outoridatnan di e aeropuerto ku e maletin ta su propiedat.
Segun Antonini, e funshonario argentino Claudio Uberti, un dia despues di e insidente, a gradisié, pasobra e no a bisa di ken e maletin ta, i a proponé ku lo dun’é loke e pidi, inkluso lisensia pa eksportá karni.
E persona prinsipal involukrá den e kaso di un supuesto mandamentu di fondonan elektoral di Venezuela pa Argentina a bisa ayera, ku ora Duana na Buenos Aires a enkontrá ku e sèn, el a keda atvertí ku e mester bisa ku ta di dje òf e lo hañ’é ku problemanan.
Antonini a relatá, ku despues ku a konfiská e maletin ku 800.000 dollar, ku e ta’tin huntu kuné, ora esaki a keda rekirí pa outoridatnan, un dama a presentá na ofisina di Duana, a bis’é ku lo solushoná e problema i ku e mester firma un akta ku e ta deklará ku e sèn ta di dje.
“Mi a bisa nan, ku e sèn no ta di mi. E dama a bisa mi: Sera bo boka, a manda mi aki pa solushoná e problema”, Antonini a deklará dilanti hurado.
E dama tabata María Cristina Galli, aparentemente un funshonario na e aeropuerto di Buenos Aires, ounke e no a keda identifiká pa su kargo.
Antonini a bisa, ku un empleado a kompletá e akta, ku el a firma indikando ku t’e ta e doño.

Score: 0.0, Votes: 0

Republikanonan a stroba un akuerdo riba Plan di Reskate di Bush ...Bush a reuní ku McCain, Obama i otro legisladornan...

Fri, 26 Sep 2008 16:58:29 -0700

WASHINGTON, Merka, - E lidernan di e Kongreso a suspendé un último intento di negosiashon di e pakete di reskate ku a kaba sin akuerdo.
E estorbo prinsipal pa Bush tabata e miembronan di su propio partido, un grupo di republikano ku ta kontra e plan ku ta bai kosta 700.000 mion euro.
E kontaktonan lo reanudá mèrdia.
E resultado ku sali for di e reunion nobo aki por dependé si John McCain ta akudí n’e debate ku e lo mantené ku su kontrinkante Barack Obama oranan despues.
Na salida di e último reunion den Kongreso, e lider di mayoria di Senado, e demókrata Harry Reid, a lamentá di e tiki progreso lográ i a afirmá ku “sinseramente, nada a keda produsí den último oranan ku por yuda nos den e proseso”.
E reunion lo reanudá awe mèrdia.
E Kongreso ta drenta djabièrnè den un reseso te e elekshonnan presidensial di 4 di novèmber, pero lo prolongá su trabounan pa trata di saka padilanti un inisiativa pa suavisá e krísis finansiero.
Oposishon republikano
E proposishon ku Gobièrnu a pone riba mesa ta konta ku oposishon fuerte di un grupo di republikano, kendenan ta kontra e intervenshon estatal di e kaliber aki, ku segun nan opinion, ta mas serkano ku un régimen sosialista ku di un ekonomia ku ta brasa merkado liber.
E aparishon repentino di e grupo aki di republikano a stroba tur optimismo ku a aparesé djaweps ku firmamentu di un prinsipio di akuerdo entre un grupo di lider di e dos partidonan i ku a kombèrtí e reunion den un frakaso, ku e presidente di e pais, George W. Bush, a ouspisiá na Kas Blanku.

Score: 0.0, Votes: 0