Laprensa Newspaper - Skina di Sorti

Skina di Sorti, awe djaweps 28 di ougùstùs di 2008

Thu, 28 Aug 2008 17:50:15 -0700

Skina di Sorti, awe djaweps 28 di ougùstùs di 2008, ta kuminsá ku deseá tur hende un bon dia. Kaminda tin un tendensia generalisá pa mira tur kos den kuadro di e blòki den kual ta kere ku un persona ta, bo tin di hasi ekstra esfuerso pa splika konklushonnan ku bo ta formulá. Den polítika e tendensia te hasta tin dimenshon molestioso òf mas bien iritante. Un ponensia no ta wòrdu investigá den lus di e argumentashon pero ta wòrdu hinka den kuadro di e rivalidatnan ku tin ta biba entre e polítikonan mes.
****
Mi ta ripití ku ta un realidat angustioso pasobra di e elenko ku tin di atendé maneho di pais, un bista asina meskino i limitá no ta representá un base for di kual por derivá speransa pa un maneho asertá. “Bekrompenheid van geest in plaats van grensverleggend denken”. “Thinking within a very small box where thinking out of the box is required”.
****
Pues den lus di e realidat amargo di pensamentu meskino mi ta kere ta bon pa splika ku e deterioro den e práktika polítiko no a aselerá ku entrada di PAR den polítika i tampoko ku presensia di e aktual koalishon. Lokual si a pasa ta ku na momentu ku PAR komo mobilisashon korektivo (kòrda e gritunan pa “ruime op de boel”) básikamente a noufragá (ku hopi aktor di momentu adoptando e práktika tradishonal), e proseso degerativo a kue un siguiente fase. Spesialmente na nivel insular e tendensia di kopia kosnan malu en bes di hasi e diferensia ta remarkabel.

Score: 0.0, Votes: 0

Skina di Sorti, awe djamars 26 di ougùstùs di 2008

Tue, 26 Aug 2008 17:35:32 -0700

Skina di Sorti, awe djamars 26 di ougùstùs di 2008, ta kuminsá ku deseá un i tur un bon dia. Den mundu di futbòl bo ta topa e fenómeno di hungadónan ku ta hunga kabes abou i konsekuentemente ta pèrdè e posishonamentu di demas hungadó riba e tereno di wega for di bista. Komo tal nan por hasi un hugada fenomenal den e bista limitá ku nan ta krea pa nan mes pero desastroso den kuadro di desaroyo di e wega. Den kestion di maneho i spesialmente den maneho di organisashonnan polítiko, bo ta topa e mesun sorto di fenómeno aki.
****
Den maneho di organisashonnan polítiko e bista ekstremadamente limitá ku ta karakterisá e dirigentenan (indikashon di esaki ta e rivalidat innesesario i e peso eksagerá di kestionnan gubernamental den desishonnan interno) ta pone ku e mayoria di organisashon polítiko ta drenta e proseso elektoral den posishon di desbentaha. Nan tin masha trabou di korekshon di hasi i ta sumamente vulnerabel pa un eventual mobilisashon nobo.
****
Un partido tin di wak desishonnan gubernamental komo akshon ku posibel impakto riba e posishon elektoral di partido. E alternativanan di desishon gubernamental ta bira un asuntu di partido na momentu ku e tin implikashon elektoral. Un partido meskos ku kualke organisashon tin di wak e aspekto di kontinuidat i esei ta mará na su atraktividat ante elektorado i fasilitadornan.
****
Atraktividat di un partido polítiko ta den su profiliamentu i eróneamente hopi ta kere ku esei ta dependé di e intensidat i dimenshon di su partisipashon den aspektonan di rivalidat polítiko. En realidat e profiliamentu tin di ta esun di krea i mantené bo mes komo un alternativa pa akomodá e inkomodidatnan di gruponan den komunidat. Ku otro palabra bo mester tin un vishon di gobernashon (no brua esaki ku posishon riba “issue”) i e postura di organisashon ku por entrega lokual e ta pretendé.

Score: 6.0, Votes: 1

Skina di Sorti, awe djaluna 25 di ougùstùs di 2008

Mon, 25 Aug 2008 15:04:25 -0700

Skina di Sorti, awe djaluna 25 di ougùstùs di 2008, ta kuminsá ku deseá un i tur un bon dia. Aparentemente e tendensia di desafiá konosementu ku siensia ta brinda ta mas grandi den sektor polítiko ku den otro sektornan. Te hasta kaminda tin hendenan, ku pa nan preparashon, mester por fèrwagt un aserkamentu mas rashonal, e forsa degenerativo ku posishon di poder tin riba e fakultat pa rasoná ta keda detrimental. Desishonnan ta wòrdu impaktá pa influensianan sosio sikológiko entre kual miedu i ambishon pa kosnan mundano (“greed”). Un situashon ku den polítika ta sirbi komo un faktor katalisador pa e proseso degenerativo aki ta un koalishon di 11 asiento.
****
Esnan ku ta dirigí koalishon a laga un oportunidat di oro bai pèrdí pa atendé ku e reto aki na momentu ku FK i DP a mustra disponibilidat pa sostené e koalishon. FK a duna indikashon ku e porta tabata habri i ku un invitashon di parti di dirigentenan di koalishon pa sondiá e posibilidat di partisipá na e koalishon lo no a keda rechasá. Tal bes pa un sentido eksagerá di konfiansa den hende (di kual nan konosé únikamente e persepshon kreá), dirigentenan a ignorá e riesgonan enorme ku e reto (“koalishon di 11 asiento) ta trese.
****
Den un koalishon di 11 e tendensia di sensashon di poder individual ta haña un dimenshon peligroso. Na momentu ku konflikto di interes presentá, e aserkamentu di strategia di poder ta mas usual ku bou di sirkunstansia di un koalishon di sosten mas amplio. Historia ta brinda sufisiente material di sosten pa e realidat polítiko aki. Ta un realidat históriko repetitivo tambe ku fulamentu di pènchi denter di un partido ta habri porta pa desrupshon. E fulamentu di pènchi ta “ontwakening” di zumbi ku no ta retorná den tumba.

Score: 6.0, Votes: 1

Skina di Sorti, awe djasabra 23 di ougùstùs di 2008

Sat, 23 Aug 2008 18:13:48 -0700

Skina di Sorti, awe djasabra 23 di ougùstùs di 2008, ta kuminsá ku deseá tur hende un bon dia. Polítika ta un fenómeno ku apesar ku hopi akshonamentu ta aparentá di ta karesé di lógika (e formulashon korekto ta ku e no ta pas den e kuadro di pensa di e evaluador) ta konforme e reglanan ku ta splika komportashon humano. E base ta keda motivashon individual, interes ku ta trese hende huntu den un grupo i forsanan ku ta influensia e proseso interaktivo na kual e aktornan ta partisipá.
****
Komo ku e interesnan i e faktornan ku ta influensia e prosesonan tin sierto aspektonan general (mas general bo pone e bista, mas gròf e kriterionan i konsekuentemente mas grandi e kongruensia) bo por yega na sierto ponensianan generalisá riba tendensia di komportashon den respektivo áreanan di bida. Ta p’esei por ehèmpel un Nikita Khrushchev tabata tin sierto grado di rason ku su ponensia:"Politicians are the same all over. They promise to build a bridge even where there is no river."
****
Bo por reformulá e ponensia bisando ku rònt mundu elektorado ta laga su mes wòrdu manipulá pa aktor polítiko ku ta bende su mes ku kosnan ku no ta relevante pero ku ta alimentá riba imaginashon i deseo di un grupo grandi. Kosnan ku ta mas bien “too good to be true”, òf mas bien konseptonan válido pero sin konotashon ku e realidat di pais. Promesa di desaroyonan fabuloso den sektornan di turismo, aviashon, i atministrashon públiko na nivel insular ku nunka a kristalisá ta kai den e kategoria aki.

Score: 5.0, Votes: 1

Skina di Sorti, awe djabièrnè 22 di ougùstùs di 2008

Fri, 22 Aug 2008 18:39:35 -0700

Skina di Sorti, awe djabièrnè 22 di ougùstùs di 2008, ta kuminsá ku deseá tur hende un bon dia. Un “spin doctor” ta un profeshonal ku ta utilisá tur rekurso na su disposishon pa bira un persepshon ku no ta kumbiniente pa interes di su kliente den unu ku ta mas benefisioso pa e kliente. Por lo general esaki ta un kontra atake ku ta afektá un otro. Den henter e asuntu di nombramentu na DOK, nos tin un proseso polítiko ku yen di buèlta estilo “spin doctor” ku no ta engañá ningun konosedó, pero ku al final di kuenta lo konosé hopi pèrdèdó.
****
No tin ningun manera ku e prinsipal aktornan den e tragi komedia ku a tuma lugá na DOK ta sali bon for di e asuntu. Ki banda ku e desishon final pa lokual ta e nombramentu kai, nos ta bai tin hendenan lastimá i un gerensia ku ta sinta ku un défisit den outoridat moral pa e manera ku e proseso a wòrdu interumpí pa diputado Eugène Rhuggenaath MBA. Un intervenshon ku tantu gubernamentalmente (“bestuurlijk”) komo polítikamente ta totalmente robes.
****
Manera mi a eksponé na vários okashon kaba e intervenshon a krea problema den seno polítiko (ku partner di koalishon i apesar ku esei ta wòrdu ninga naturalmente denter di PAR mes) ku Hunta di Komisario, e profeshonalnan enkargá ku e proseso di selekshon i esnan ku a partisipá na e proseso i den esaki prinsipalmente esun ku a wòrdu skohé komo mihó kandidato. Ta bon pa remarka ku te hasta den un vespertino kaminda e diputado sa gosa di bon apresiashon e proseder a keda repudiá.

Score: 5.0, Votes: 1

Skina di Sorti, awe djarason 13 di ougùstùs di 2008

Wed, 20 Aug 2008 20:25:14 -0700

Skina di Sorti, awe djarason 13 di ougùstùs di 2008, ta kuminsá ku deseá tur hende un bon dia. Pa sigui ku e tema di aserkamentu gubernamental, mi ke ripití un biaha mas ku maneho (“beleid”) ta responsabilidat di e gabinete (“des kabinet”) i no di minister di Finansa. Ta p’esei un presupuesto su resultado final tin di wòrdu buská den e fayo kolektivo pa keda den kuadro di lokual a keda palabra. Den nos kultura polítiko koleganan den gabinete tin e tendensia di skonde tras di lomba di e minister di Finansa i na nivel insular e diputado di Finansa.
****
E poko biahanan ku un gobièrnu a logra di ehersé kòntròl riba e presupuesto e situashon tabata unu di karteranan di mas riesgo ku tabata bou di esfera di influensia di e partido di esun enkargá ku e kartera finansiero. E ora ei bo ta haña ku e responsabilidat kolektivo ku bo mester pa ehersé kòntròl ta wòrdu aserka (“proximity of critical norm of a success factor”). Ku karteranan ku ta representá e faktor mayó di riesgo den man di partidonan ku tin propio agènda di profilashon, esun enkargá ku e kartera finansiero tin loke nan ta yama un “ondankbare taak”.
****
Na un okashon e aktual minister di Finansa drs. Ersilia de Lannooy a reta kultura polítiko tradishonal ku un invitashon na Parlamento pa interkambiá di idea riba e problema finansiero di pais. E reakshon konforme e tendensia polítiko reinante di laga kada ken stoba den su problema tabata ku ta e minister tin ku aserká parlamento ku un maneho. Minister di Finansa drs. Ersilia de Lannooy no a pèrsistí den e pensamentu lokual ta indikativo pa un barera polítiko ku e lider polítiko di PNP no a logra di pasa ainda.

Score: 4.0, Votes: 1

Skina di Sorti, awe djamars 19 di ougùstùs di 2008

Tue, 19 Aug 2008 16:51:03 -0700

Skina di Sorti, awe djamars 19 di ougùstùs di 2008, ta kuminsá ku deseá un i tur un bon dia. E manera ku nos (ta trata di un tendensia generalisá, ku karakterístika di patronchi kultural) ta atendé ku asuntunan di gobernashon ta duna poko speransa di kambionan signifikativo ku lo por pone nos den e posishon di pais kompetitivo en bes di esun di pais ku ta akomodá su mes konforme e realidat di momentu.
****
Naturalmente no ta realista pa pretendé ku nos lo por ta den e kategoria stratégiko di esnan ku ta “setters”, esta determinadó di e direkshon, dinámika i dimenshon di e faktornan relevante i signifikante den un determinado fase di desaroyo (nivel di teknologia, struktura di merkado, etc, etc) global òf regional. Pero por lo muy ménos nos lo mester aspirá di ta entre esnan ku den e grupo di “takers” (esnan ku tin di saka mayor benefisio for di e faktornan relevante i signifikante (manera esnan ku por a determiná nan) ta mas efektivo i efisiente pa lokual ta e posibilidatnan ku presentá.
****
E ta rekerí di un aserkamentu di krea i mantené fleksibilidat (“resiliency”). Bo tin di analisá, proyektá i visualisá kos. Bo tin di fiha ophetivonan (“smart targets”, esta spesífiko, kuantifiká, ambisioso, realisabel i mara den tempu) i traha plan pa alkansá nan. Ta realmente tristu pa konstatá ku e proyekshon ku gobièrnu pa medio di gobernadó a presentá na inisio di e aña parlamentario 2008 no a kondusí na un debate signifikante denter di Parlamento.

Score: 5.0, Votes: 1

Skina di Sòrti, awe djaluna 18 di ougùstùs di 2008

Mon, 18 Aug 2008 18:46:45 -0700

Skina di Sòrti, awe djaluna 18 di ougùstùs di 2008, ta kuminsá ku deseá un i tur un bon dia. Tin sierto moveshon ta tumando lugá na Kòrsou ku pasobra esnan ku tin “regie” ta keda sin mira e kuadro sosio polítiko general, por kondusí na un tsunami polítiko den e próksimo elekshon. Mi ta bolbe ripití pa di tantísimo bia ku poder polítiko grandi tin un tradishon di implodá (kai aparatosamente den otro) na momentu ku un insidente sosial propulsá un kondukta elektoral ku ta manifestashon di un mobilisashon sosial.
****
Ku entrada abierto di un lider sindikal ku pia di influensia denter di un mobilisashon polítiko i kuater empresa estatal denter di kual tin turbulensia, esta CPA, DOK, Refineria Isla i Curoil, esnan ku tin “regie” su wowo mester habri pa komprondé ku e “geklungel” na DOK, fuera ku e no tin nada di haber ku “finding the right man for the job”, ta surpasá e barera di diferensia di pensamentu denter di partido i òf koalishon. Tin interesnan di “netwerk” pafó di PAR ku ta resultando den akshonamentu ku ta “bestuurlijk en politiek onaanvaardbaar”.
****
E fenómeno “netwerk” i gruponan di interes no ta deseabel pero manera mi a trata di splika den algun kolumna anterior un realidat inevitabel. Ku e ta kondusí na inhustisia sosial tambe ta inevitabel. Pero ku e ta resultá den un peliger polítiko pa esnan ku ta forma e “ruling coalition” ta algu ku esnan ku ta forma e “ruling coalition” tin di reprochá nan mes. Ta un “ongeschreven wet” den polítika ku bo no ta kologá òf laga kologá un hende di bo.

Score: 5.0, Votes: 1

Skina di Sorti, awe djasabra 16 di ougùstùs di 2008

Sat, 16 Aug 2008 17:37:50 -0700

Skina di Sorti, awe djasabra 16 di ougùstùs di 2008, ta kuminsá ku deseá tur hende un bon dia. Den polítika tin algun kos ku bo tin di siña lihé si bo ke profilá komo progresivo, kombatiente i inovador. Un di nan ta ku bo akshonamentu no mester krea e persepshon di un intento pa trese kambio den struktura di poder denter di partido. Na momentu ku e persepshon ei visualisá serka esnan den posishon di poder, bo a hinka bo mes den un lucha di poder ku pa definishon konosé pèrdèdó i ganadó. Lucha di poder no konosé otro resultado. E pèrdèdó tin ku dobla rabu i move.
****
Ta un realidat universal den práktika polítiko. Apesar ku partidonan polítiko ta un instrumento den kuadro di e proseso di gobernashon demokrátiko, e organisashon mes ta unu ku ta funshoná mas tantu segun e modelo klásiko di liña di outoridat, señoridat i struktura di “netwerk”. Kaminda un partido su posishon di poder ta determiná pa forsa elektoral di e lider di tendensia karismátiko, e aspekto di struktura di “netwerk” ta haña mas forsa. Pa buena marcha mi ke ripití ku ta un fenómeno universal.
****
Laga sita atrobe for di “Politieke filosofie en westerse democratie” di S.W. Couwenberg. “De morele imperfectie van de mens, zijn neiging tot het kwade, manifesteert zich in het bijzonder zodra machtsposities in het geding zijn. Macht werkt als een harddrug. Men raakt er meer aan verslaafd naarmate men er meer en langer van proeft. Ook een democratisch bestel is in de praktijk geen afdoende remedie tegen dit alles en ontaardt eveneens in meer of mindere mate in politieke corruptie en feodalisering van de staatsmacht”.

Score: 6.0, Votes: 1

Skina di Sorti, awe djabièrnè 15 di ougùstùs di 2008

Fri, 15 Aug 2008 18:09:38 -0700

Skina di Sorti, awe djabièrnè 15 di ougùstùs di 2008, ta kuminsá ku deseá tur hende un bon dia. Komo studioso di e fenómeno “gobernashon polítiko” e kuadro for di kual mi ta aserka prosesonan di gobernashon (den esei e akshonamentu polítiko i gubernamental) ta diferensia for di esun ku spesialmente aktornan polítiko i nan respektivo fanatikada ta kontemplá i relatá nan akshonnan. Dor di un elevashon di makiavelismo (kreamentu di persepshon falsu pa intenshon real por pasa inatvertí) na patronchi kultural, hopi konsepto a haña un interpretashon ku mester wòrdu konsiderá un blasfemia.
****
For di un trabou sientífiko titulá “Politieke filosofie en westerse democratie” di S.W. Couwenberg, mi ke trese algun parti pa sirbi komo kuadro di reflekshon i kontemplashon di algun asuntu ku a bini ta sosodé den práktika polítiko lokal. Pa buena marcha ta bon pa komprondé ku e echo ku ta trata di un proseso di deterioro universal no ta kita ku e ta robes i ku mester kontené pa evitá ku bo ta haña bo ku tirania moderno.
****
E promé parti ku mi ke sita ta bisa: ”In westerse democratieën is er in principe wel sprake van een open competitie bij de verdeling van publieke functies op allerlei terrein. Maar tegelijk is er een sterke neiging tot beperking van die competitie door de vorming van netwerken en kartels om zodoende de belangrijkste publieke functies te reserveren voor degenen die tot het eigen politieke netwerk behoren”.

Score: 5.0, Votes: 1

Skina di Sorti, awe djaweps 14 di ougùstùs di 2008

Thu, 14 Aug 2008 17:14:50 -0700

Skina di Sorti, awe djaweps 14 di ougùstùs di 2008, ta kuminsá ku deseá tur hende un bon dia. Hende por diferensia ku otro den apresiashon di echonan, pasobra semper ta keda espasio den interpretashon di echonan den un gama di kuadro denter di kual e echonan ta bira un realidat. E mesun echo ta representá por ehèmpel un realidat religioso, un realidat polítiko, un realidat sosial kultural òf un realidat sosio ekonómiko. Ta p’esei e kuadro for di kual sierto apresiashon ta wòrdu hasí ta un informashon relevante.
****
Na momentu ku un asuntu, ku mi a hasi ekspreshon kritiko riba dje, bolbe presentá komo un tema riba kual tin desaroyonan interesante, mi ta revaluá opservashon kritiko ku mi a hasi. Den kuadro di e aserkamentu aki, mi a repasá komo 2 aña di kolumna ku mi a skirbi den Skina di Sorti. Ku aki aya un par di ahuste pa ta al tantu di dia, mi a ripití algun posishon skèrpi riba e kalidat di gobernashon i na okashon akshonamentu erátiko i “bestuurlijk” inkorekto i te hasta “onbehoorlijk” di algun gobernante en partikular.
****
Na momentu ku mi skirbi ku akshonamentu di un determinado gobernante ta makiavelista, mi ta hasi esei pasobra mi ta disponé di informashon verídiko i devastador pa sostené e ponensia kategóriko ei. Den e kestion di nombramentu na DOK mi a evitá di pone nòmber spesífiko di algun persona ku den un eventual kaso den Korte lo bai bini dilanti pa proba ku tabata tin aplikashon di “willekeur” i no akshonamentu a base di prinsipio.

Score: 5.0, Votes: 1

Skina di Sorti, awe djarason 13 di ougùstùs di 2008

Wed, 13 Aug 2008 18:45:58 -0700

Skina di Sorti, awe djarason 13 di ougùstùs di 2008, ta kuminsá ku deseá tur hende un bon dia. Algun dia atras ma skirbi riba e tendensia di akshonamentu reakshonario ku ta dominá den nos práktika polítiko. Awe mi ke mustra riba un di e konsekuensianan mas molestioso di e tendensia ki ku ta esun di krea mas struktura en bes di atendé ku e foko di problemanan. Ku otro palabra, e tendensia reakshonario ta kondusí na mas gastu, ku masha poko probabilidat di yega na un situashon ku ta mihó di esun di momentu. Ku e tipo di maneho aki, kosnan lo bai di malu pa pió. Ta manera e lei di Murphy ta bisa, esta ku “things left to themselves, will go from bad to worst”.
****
Ora ku e direkshon general ta unu di deterioro, i bo no ta hasi nada pa kontené e deterioro, e probabilidat di empeoramentu ta evidente. Krea mas struktura, miéntras bo resultadonan no ta satisfaktorio, pa definishon no ta akshon di korekshon. E por ta unu pa kontrolá situashon riba tèrmino korto, ku mester wòrdu kompañá ku akshon di korekshon. Ta e ora ei por konsiderá e akshon, si e ta pa kontrolá e situashon temporalmente, un invershon den lus di e korekshon ku lo tin resultado riba tèrmino mas largu.
****
Si bo analisá e manera kon gastunan gubernamental a keda subi, miéntras dimenshon di e malestarnan sosio ekonómiko i sosio kultural a krese, básikamente bo ta topa ku evidensia di e sistema di manehá inadekuado ku nos tin. Masha hopi akshon gubernamental ta wòrdu propulsá pa e nesesidat pa kontrarestá mobilisashon polítiko. Nan no ta konsekuensia di un proseso metódiko pa yega na formulashon, planifikashon i ehekushon di maneho.

Score: 6.0, Votes: 1

Skina di Sorti, awe djamars 12 di ougùstùs di 2008

Tue, 12 Aug 2008 16:52:58 -0700

Skina di Sorti, awe djamars 12 di ougùstùs di 2008, ta kuminsá ku deseá un i tur un bon dia. Despues di 5 luna ku mi a splika dikon e akshonamentu di diputado Rhuggenaath MBA no por pasa e “toets” di regla di bon gobernashon, no a bini ningun echo relevante nobo ku ta motivá un kambio den mi konklushon. Mas bien tin mas akshonamentu ku ta fortifiká e persepshon di “gekronkel en gekonkel” pa mantené un posishon ku rashonalmente no ta sostenibel. Komo ku e medio ambiente polítiko ta malamente kontaminá, kosnan lo sigui nan kurso. Ta kestion di “you scratch my back and I will scratch yours”!
****
Laga mi repasá e puntonan ku te ainda no a keda kontradesí i ku a pone ku ami a yega na e konklushon ku den e asuntu di nombramentu na DOK, diputado pa PAR, Eugène Rhuggenaath MBA, su aserkamentu di e asuntu, en realidat no ta konforme di reglanan di bon gobernashon. E aspekto di reglanan di bon gobernashon ta e punto di salida komo e diputado en kestion ta afichá su mes komo polítiko di prinsipio ku tin aplikashon di reglanan di bon gobernashon na pechu.
****
E manera ku e kosnan a kana na DOK, kontrali na e lokual ke laga hende kere no ta kestion di siguimentu di un prosedura ku a keda palabra, pero kestion di redresá un resultado indeseá òf tal bes inesperá, na un manera ku ta afektá un famia den un forma grave. Ku e diputado despues a ekspresá su lamento pa e implikashon di su hasí pa e famianan ta konfirmá e manera poko kuidadoso ku kual ela akshoná den e asuntu.

Score: 4.0, Votes: 1

Skina di Sorti, awe djaluna 11 di ougùstùs di 2008

Mon, 11 Aug 2008 20:19:29 -0700

Skina di Sorti, awe djaluna 11 di ougùstùs di 2008, ta kuminsá ku deseá un i tur un bon dia. Apesar di krònkel i buèlta e kaso di nombramentu na DOK ta keda nada mas ku un intervenshon polítiko na kual e diputado konserní no ke mara konklushon polítiko, pero si ta mantené preshon polítiko riba direkshon den kual desishon denter di DOK tin di tuma lugá. Lokual ta pasando tin mas e karakter di akshonamentu makiavelista ku e tin di haber ku preparashon i ehekushon huisioso di maneho (“zorgvuldige beleidsvoorbereiding en besluitvorming”).
****
Akshonamentu makiavelista ta karakterisá su mes pa krea i mantenshon e persepshon di ta aktua ku un interes mayó den mente, miéntras ku tras di e akshonamentu tin un interes partikular. Ora bo tin preparashon i ehekushon huisioso di maneho, kosnan ta transparente, sin krònkel i buèlta i kontrolabel. Por lo demas demokrasia ta eksigí responsabilisashon (“accountability”) ora ku fayonan ku implikashon serio tuma lugá.
****
Ta insólito ku despues di asina tantu reunion i investigashon i intervenshon denter di DOK (ku entre otro retiru di Hernandez komo direktor despues di basta investigashon di aspektonan hurídiko) un reunion ku a keda posponé pa basta dia tin ku resultá den partisipashon ku a komprondé ku e reunion di akshonista no tin e kompetensia pa nombra un direktor pa DOK. Ta dikon e asuntu tabata un punto di diskushon anto? Ta a base di kiko diputado a haña ta bon di intervení den e proseso di nombramentu anto?

Score: 4.0, Votes: 1

Skina di Sorti, awe djasabra 9 di ougùstùs di 2008

Sat, 09 Aug 2008 16:35:47 -0700

Skina di Sorti, awe djasabra 9 di ougùstùs di 2008, ta kuminsá ku deseá tur hende un bon dia. Un presupuesto ta un instrumento pa yega na ehekushon efektivo di un plan stratégiko (un manera pa konektá presente ku futuro). Sin un vishon pa futuro bo no por tin un plan stratégiko. Sin vishon e lokual bo ta yega na dje ta e “default strategy” di reakshoná riba lokual bini riba bo. Den un “default strategy” ku pa definishon ta reakshonario, bo ta trese ahuste pasobra nan ta parse bo inevitabel. Bo ta desvia for di lokual bo tabata hasi no pasobra esei ta bo deseo, pero pasobra bo ta sinti ku bo no por otro.
****
Un di e determinantenan di e strategia ku un aktor (sea individuo òf grupo di individuo òf aliansa di organisashon) ta apliká ta e kuadro di balor i norma di esnan ku tin mas peso den e elenko ku ta tuma desishon. E lokual nan ta yama “the strategic apex”. Manera mi a bini ta apuntá, e echo ku nos no ta yega mas leu ku un “default strategy” ta indikativo di e strukturanan di personalidat denter di nos elenko polítiko. Tin demasiado poko hende ku ta aserka e konsepto di “free and authentic”. E mayoria tin muchu zumbi den kabes ku ta limitá nan kuadro di pensa.
****
Pa por komprondé dikon mi ta pèrsistí ku nos ta karesé di un kultura di gobernashon stratégiko, mi ta trese un biaha mas definishon di kiko ta un aserkamentu stratégiko. Komo ku e proseso estatal tin e mayoria den e ambiente ulandes un definishon ulandes ta pas den e onda. “Strategie is de manier waarop, en het geheel van middelen waarmee, vooraf vastgestelde doelen kunnen worden bereikt. Het is het actieplan van de organisatie. Veel organisaties trekken hun cijfers van voorgaande jaren door naar de toekomst, en noemen dat hun 'strategisch plan'. Zo'n plan kan succesvol zijn, maar is in wezen geen strategie.”

Score: 4.0, Votes: 1