Laprensa Newspaper - Boneiru

Polis ta hañando sierto indikashon, pero nada konkreto: Misterio ta sigui reina den kaso Van der Kouwe!

Sat, 04 Oct 2008 06:01:37 -0700

WILLEMSTAD /KRALENDIJK - E situashon misterioso di desaparishon di Marlies van der Kouwe, un studiante ku tabata kore stazje na Botica Bonaire komo botikario te ainda ta sin solushon, no opstante tur búskeda, no opstante e diferente pistanan ku a subi mesa. No tin nada konkreto te ainda i e wikènt aki ta hasi dos siman ku e damita a disparsé. Polis mes no ta dunando masha informashon último dianan aki riba e kaso, pendiente desaroyo di e kaso mes.
Polis ta buskando e tas di Marlies van der Kouwe ku e lo mester tabatin huntu kuné e anochi en kuestion. Ta trata di un tas di paña ku riba dje e palabranan “Bonaire Divers’ Paradise”. Ta pidiendo tur hende ku por sa algu di e tas,pa drenta den kontakto ku polis. E tas posiblemente por kondusí na mas klaridat.
Tin un batayon di polis, reshèrshi i otro funshonarionan hudisial riba e kaso awor aki, tantu di Boneiru mes komo di Kòrsou i di Ulanda. Anteriormente, sekretario di Estado pa Relashon den Reino Ank Bijleveld a bisa ku e kaso di desaparishon di e dama ulandes Marlies van der Kouwe i e nesesidat pa Ulanda pa manda eksperto pa yuda den su búskeda, ta un ehèmpel klásiko pakiko ta asina importante pa kuerponan polisial di paisnan den Reino traha huntu.
Bijleveld, manera ta konosí anteriormente e siman aki a papia ku outoridatnan hudisial di e isla, responsabel pa e investigashon. El a papia ku loke el a yama e “driehoek” ku ta kondusiendo e investigashon, ku ta gezaghèber di Boneiru Herbert Domacasse, fiskal David van Delft i hefe di kuerpo polisial di Boneiru John Schagen.

Score: 0.0, Votes: 0

Polis na Boneiru ta bou di preshon enorme: Polis a prohibí tur hende na Boneiru di papia di sekuestro!

Tue, 30 Sep 2008 15:56:32 -0700

WILLEMSTAD/ KRALENDIJK - Polis na Boneiru tin algun dia awor aki ku e no ta dunando informashon riba e kaso di desaparishon di Marlies van der Kouwe. E úniko kos ku portabos Enny de Wit kier a divulgá ta, ku e akshonnan di búskeda ta sigui.
“Nos ta buskando den un área di un kilometer i mei rondó di e lugá, kaminda Van der Kouwe a disparsé. Ademas tin akshonnan di búskeda spesífiko dirigí”, el a agregá.
Un akshon dirigí asin’aki ta e hecho, ku a buska na un lugá di tira sushi na Antriol. Polis tabata na e lugá presente ku kachó spesialmente pa e tipo di kasonan asin’aki, kachó ku a manda buska for di Ulanda. A koba un buraku, pero si a haña algu, anto kiko a haña, no ta konosí.
Polis na Boneiru a neglishá e informashon ku a sali públikamente djabièrnè siman pasá di un persona ku por tabata un testigu interesante den e kaso di sekuestro i desaparishon di Marlies van der Kouwe riba e isla. Esta, e informashon ku e sekuestradornan, reportadamente a yama e persona aki i eksigí un suma di reskate.
Wouter van Kouwen a konfirmá ku niun hende di polis no a aserk’é enkuanto e yamada ku el a risibí djamars siman pasá, eksigiendo un reskate di mei mion euro.
“Niun hende no a yamami”, asina Van Kouwen konfirmá. Van Kouwen ta konosí komo un persona ku ta alkansabel riba mas ku un telefon. Ta evidente ku hefe di polis na Boneiru John Schagen, kende por sierto no tin masha hopi tempu den e funshon ei, ta bou di preshon enorme awor aki.

Score: 0.0, Votes: 0

Polis na Boneiru ta bou di preshon enorme: Polis no a investigá eksigensia pa reskate!

Mon, 29 Sep 2008 19:33:08 -0700

WILLEMSTAD/ KRALENDIJK - Polis na Boneiru a neglishá e informashon ku a sali públikamente djabièrnè siman pasá di un persona ku por tabata un testigu interesante den e kaso di sekuestro i desaparishon di Marlies van der Kouwe riba e isla. Esta, e informashon ku e sekuestradornan, reportadamente a yama e persona aki i eksigí un suma di reskate.
Manera LA PRENSA a informá den su edishon di djasabra último, korto tempu despues ku Marlies van der Kouwe di 24 aña di edat a disparsé, a drenta un eksigensia pa un suma di reskate di mei mion euro. E eksigensia aki sinembargo a bai den direkshon di Wouter van Kouwen, un figura ku nan a yega di huzga pa trafikashon di droga i kende alabes tabata un testigu importante di hustisia.
“Nos tin bo yu muhé i bo ta wet’é bèk solamente si bo paga mei mion euro,” asina Wouter van Kouwen a bisa e korant ulandes De Telegraaf, sitando un hende ku a yam’é ku un stèm kamuflá.
Wouter van Kouwen a bisa, ku e yamada ei a drenta riba su telefon selular for di djamars siman pasá, pero ku e no a tuma e yamada na serio.
“M’a bisa nan ku mi yu muhé no a ser sekuestrá, anto ku mi no konosé Marlies van der Kouwe mes,” asina Van Kouwen a bisa.
Den pasado, Wouter van Kouwen a yega di spièrta hustisia ku mafia tabata planeando un atake ku raket riba fiskal Koos Plooij.
E atvertensia aki a kondusí na medidanan masha fuerte mes di siguridat pa Plooij i su famia.

Score: 0.0, Votes: 0

Den diskurso nashonal dramátiko awe mainta: Gezaghèber ta garantisá ku lo solushoná situashon na Boneiru!

Fri, 26 Sep 2008 16:50:21 -0700

KRALENDIJK/WILLEMSTAD – Gezaghèber saliente di Boneiru Herbert Domacasse a hasi un yamada dramátiko awe mainta na pueblo di Boneiru, pa mantené trankilidat den e situashon ku e isla ta pasando aden. E mandatario den un diskurso nashonal a konfirmá, ku tin un detenshon den loke e mes a yama “kaso di sekuestro” ku a shòk Boneiru. E nota aki den un diskurso nashonal ta indikativo ku outoridatnan na Boneiru ta tuma e kaso di Marlies van der Kouwe masha na serio i ku tin indikashon konkreto ku e dama ta víktima di sekuestro. “Nos lo sigui traha intensivamente pa solushoná e kaso aki”, asina gezaghèber Domacasse a bisa awor ku e kaso tin atenshon kompleto den reino ulandes i poko poko a kuminsá haña publisidat internashonal. E dama di orígen ulandes a disparsé den e mardugá di djasabra pa djadumingu último.
Gezaghèber Domacasse a bisa, ku e siman aki, Boneiru a bai den un shòk, na momentu ku a bira konosí, ku un mucha muhé di 24 aña ta wòrdu sekuestrá violentamente. “Polis, despues di hasi un evaluashon ta bati alarma grandi djaluna último i ta sigui un búskeda intenso. Un insidente ku pa nos aki na Boneiru ta inusual i ku por kousa bastante intrankilidat den nos pueblo. Polis ta disidí mesora, ku lo hasi tur esfuerso pa por logra solushoná e kaso i a mobilisá kuerpo di polis kompleto ku a kuminsá ku nan trabou di investigashon. Di tur banda ta kuminsá buska ayudo i tur instansia ta reakshoná pa duna nan asistensia. Tambe ta drenta rápidamente den kontakto ku suidadanonan via di prensa i ta sigui hasi esaki tur dia pa mantené henter pueblo bon informá di e último desaroyonan. Nos kuerpo polisial ta risibiendo koperashon di ekspertonan for di Kòrsou, Aruba i Ulanda. Mi kier gradisí tur e instansianan aki pa nan kolaborashon. Na e momentonan aki e investigashon ta sigui su kurso i nos por konfirmá, ku un detenshon a tuma lugá; mas informashon lo ta disponibel mas despues i ban konfia ku esaki ta trese un buèlta positivo den e kaso aki. Ta e intenshon pa sigui informá pueblo regularmente di e investigashon su progreso”, asina gezaghèber Domacasse a bisa.

Score: 0.0, Votes: 0

Bonerianonan ta den estado di shòk: Ken ta hinka den su kabes pa kore baiskel mardugá?

Thu, 25 Sep 2008 17:51:11 -0700

WILLEMSTAD /KRALENDIJK - Hopi hende na Boneiru ta puntrando nan mes, ta kon por ta posibel ku Marlies van der Kouwe tabata kore baiskel su so den oranan di mardugá riba e isla. Kore baiskel den oranan di anochi no ta algu usual. Kore baiskel den dia mes, ta hopi peligroso i difísil, mirando e hecho ku kayanan ta hopi smal i apénas dos outo por pasa banda di otro, pa no papia mes ora un baiskel tambe ta riba kaminda.
Pero habitantenan di Boneiru ta puntrando nan mes, ta kon por ta posibel ku un kos asin’aki por a sosodé riba e isla, un isla chikitu kaminda kasi tur hende konosé otro i sa tur kos di otro.
Manera LA PRENSA a relatá kaba, tin un investigashon profundo i ekstenso ta tumando lugá na Boneiru awor aki, riba desaparishon di Marlies van der Kouwe di 24 aña di edat, un studiante ku tabata koriendo stazje na un botika na Boneiru. Manera tambe nos a indiká kaba, polis ta tene kuenta seriamente ku e senario di mas grave den e kaso aki, esta ku posiblemente a asesiná e damita ulandes Marlies van der Kouwe. Komo ku no a haña su kurpa ainda, ofisialmente polis ta sali for di punto d bista, ku ta trata aki di un kaso di sekuestro.
Marlies van der Kouwe a disparsé, despues di tabata na un fiesta ku amigunan na playa, na Karen’s Beach. Reportadamente a mira Van der Kouwe subi su baiskel i kue rumbo nort, direkshon di e bario Hato. E ora ei ya tabata mardugá grandi.
Djadumingu mainta, a haña su baiskel i su dos sandalianan. Segun testigunan, ta dos hòmber riba un skuter a sigui e damita aki i na altura di e kompania di awa i koriente di Boneiru WEB, un hòmber di estatura haltu lo a ranka e damita ku violensia for di su baiskel i a bai kuné. A haña e skuter bentá den mondi.

Score: 0.0, Votes: 0

Ramonsito Booi: “No ta loke nos a kere” Boneiru a spanta di supervishon di Ulanda!

Mon, 04 Jun 2007 19:08:38 -0700

WILLEMSTAD/ KRALENDIJK - Boneiru literalmente a spanta di e fórmula ku Ulanda ke introdusí komo supervishon (finansiero) di Ulanda. E proposishonnan ku Ulanda a lansa pa supervisá tantu Boneiru, Saba komo Statia a krea reakshonnan masha fuerte.
Lider di partido UPB di Boneiru Ramonsito Booi ta di opinion ku e medida skerpi di supervishon ku Ulanda ke introdusí, de fakto ta saka Konseho Insular di e isla for di wega.
“E proposishon ulandes pa yega na un supervishon skerpi di Ulanda riba e islanan Boneiru, Saba i Statia ta bai mas leu ku originalmente tabata e intenshon. E kos aki a kuminsá haña un karakter permanente,” asina Booi a bisa den un entrevista pa Radio Nederland Wereldomroep.
Boneiru a ferwaktu ku saliendo for di konstelashon antiano, su futuro lo tabata un futuro sigurá. E argumento semper tabata ku e isla ku mas ta stroba Boneiru den su desaroyo ta Kòrsou. Pero e loke e isla a spera di e kombenio ku el a sera ku Ulanda pa logra e futuro briante aki, tòg ta birando un desapunto grandi.
I si konsiderá e komentario di diferente polítiko riba e materia aki, anto enbèrdat ta surgi pregunta riba e intenshon real di Ulanda.
Na òktober di aña pasa, Boneiru, Saba i Statia a firma un kombenio ku gobièrnu ulandes pa bai forma parti teritorial di Ulanda.
Kiko esaki ta enserá eksaktamente no tabata konosí na e momentu ei ainda, komo ku mester a kaba di detayá hopi punto den e akuerdo.
Esei a tuma lugá den e lunanan ku a pasa, pero e produkto no ta loke Boneiru a spera. E punto mas kardinal ta ku riba tereno finansiero, Boneiru práktikamente no tin nada mas di bisa.

Score: 7.5, Votes: 6

Chippie a malkriá hopi kliente den kampaña “Nos ke malkria’bo”

Sat, 28 Apr 2007 19:45:57 -0700

KRALENDIJK – Ta un gran kantidat di kliente a keda malkriá durante di e luna ku ta tras di lomba, den e kampaña “Nos ke Malkriá’bo” di Chippie. Anto tur esaki nèt promé ku saka e gran premio ku ta un Suzuki Grand Vitara nobo nobo. Klientenan di Chippie a respondé en grande na e kampaña aki di Chippie na Boneiru.

Chippie di su parti a sa di balorá e konfiansa aki dor di sigui ofresé su servisio kustumbrá i tambe saka semanalmente premionan pa honra esnan ku ta hasi uso di su servisio. Kada siman tabatin tres felis ganadó den e kampaña aki.
Durante di e último simannan Hans van Hese a bira felis ganadó di un Motorola Razor V3, Brian Kenepa a bai ku un kámara digital, Estrella Nicolaas a risibí un pasashi pa bai keiru na Aruba i Oscar Martijn a gana un Laptop Acer. Rosa Aguilar, Shannon Pinto, Rosemarie Thode i Edelda de Jongh tur tabata ganadó di 150 florin na krédito pa hasi yamada ku nan Chippie. Miéntras Leonard Hart, Roosje Pietersz i Henk Abdul a risibí 100 florin na krédito pa hasi yamada ku nan Chippie.
Tur atenshon ta dirigí riba e gran rifa pa e Suzuki Grand Vitara ku lo tuma lugá djaluna dia 30 di aprel próksimo riba Dia di Rincon. Un i tur ta keda kordialmente invitá pa sintonisá TeleCuraçao, kanal 8, pa 9’or di anochi ora ku e rifa tuma lugá bibu i direkto den bista di un i tur. E famia di Chippie ke yama tur su klientenan danki pa e akohida grandi ku e kampaña aki tabatin. Pueblo boneriano mester keda pendiente pa mas kos bon di Chippie.

Score: 7.0, Votes: 2

Shòròmbu riba Ròndu kier a pidi diskulpa na promé lugá na e famia di DIGICEL riba un loke ku a sali djaluna den e kolumna a

Wed, 10 Jan 2007 18:35:53 -0800

E loke ku a keda skirbí tokante ku tabatin dunamentu di plaka na un par di hende pa ku e kompra di e sistema di UTS dor di DIGICEL no ta kuadra ku bèrdat.

Shòròmbu kier a rektifiká e asuntu aki públikamente den e mesun kolumna kaminda nos a skirbi esaki. E asuntu aki ta algu ku no por keda probá pa Shòròmbu ni tampoko tabatin indikashon ku esaki lo a tuma lugá tampoko. Un biaha mas nos diskulpa pa esaki.

Gobièrnu tin na su disposishon empleadonan ku mester yuda den dunamentu di konseho riba diferente proyektonan i tambe diferente kos ku ta pasa den komunidat. E empleadonan aki ta wòrdu tambe bon pagá pa hasi e trabou aki.

Ora un konseho ta negativo ta pasó e hendenan aki a studia e proyekto òf tereno òf kualke kaso bon promé nan duna nan konseho i komo empleado públiko semper nan ta mira interes di Boneiru na promé lugá.

Awor gobièrnu di Boneiru ta manda e konsehonan aki bek ora nan ta negativo i fòrsa e empleadonan pa hasi e konseho positivo ya e proyekto òf tereno por pasa i ya BC ta di dek si kualke kos bai malu.

Ta esaki ta loke a pasa den dunamentu di tereno aya na Sorobon i ta esaki a pasa ku dunamentu di pèrmit pa konstrukshon. E konsehonan tabata negativo a laga hasi nan positivo pasó e mandatarionan tabata wak benefisio personal i pa nan amigunan.

Gezaghebber ku ta na kabes di gobièrnu i ku mester mira e interes di e pueblo aki ta sera wowo pa e kosnan aki i ta bon ku nos tin un gouverneur ku konosé Monchitu bon i sa kiko su intenshon nan ta i e si a wak interes di Boneiru i a laga para kos.

Score: 6.0, Votes: 2

Boneiru kompletu ta bai buska nan SIM di Digicel

Tue, 19 Dec 2006 10:10:47 -0800

KRALENDIJK- Ta for di momento ku TELBO a anunsiá na tur su klientenan ku desde promé di yanüari próksimo ku nan lo drenta un aliansa ku Digicel, mesora e akohida den e pueblo Boneriano a bira masha grandi. Tur hende ta pendiente pa buska nan SIM nobo pa asina nan por konservá nan number.

Nan tur ta konsiente ku esaki ta e úniko forma pa keda ku bo mesun number, di otro forma lo mester haña un number kompletamente di nobo. Ta bisto tambe ku e pueblo Boneriano kier para riba su mes i ku e plannan nobo di TELBO ta kuadra ku e vishon di e pueblo di Boneiru.
Durante e último simannan e pueblo di Boneiru a akudí den masa na Sentro di Bario Antriol, na unda ku por a presentá ku bo selular aktivo di TELBO i risibí un SIM di Digicel mesora ku e mesun number ku nan tin aktualmente. Tambe tabatin oportunidat pa hasi tur tipo di pregunta riba servisio, paketenan, tarifanan i muchu mas. Tin di e usuarionan ku a opta pa oumentá nan pakete mensual di yamada, miéntras ku otronan a preferá pa kambia nan telefon pa un BlackBerry. Nan tur ta konsiente tambe ku despues di e fecha di 1 di yanüari, ta Digicel ta e úniko kompania di selular den e region aki ku ta uniendo Aruba, Boneiru i Kòrsou ku otro, sin ku mester sera akuerdo aki aya ku otro kompanianan kompetidor.
Pa mustra e akohida grandi ku Digicel tin den e pueblo Boneriano, por mira momentonan na unda ku por ehèmpel e konosido sr. Richard Hart, miembro di e direktiva di Bonaire Holding Maatschappij huntu ku sr. Stijn Jansen tambe di e direktiva di BHM ta buskando nan SIM nobo serka sr. Jersey Marshall di Digicel. Ayera tambe sr. Bert Schreuders, Gerente General di Digicel Bonaire a risibí bishita di sr. Ramoncito Booi huntu ku sr. Riginald Dortalina, ámbos figuranan prominente den Gobièrnu di Boneiru ku tambe a bin buska nan SIM nobo pa asina nan ta kla pa dia promé di yanüari nan tambe ta riba e mihó ret di henter Karibe.

Score: 6.0, Votes: 5