Laprensa Newspaper - Hulanda

A rekordá tambe e héroe “Pa Sem”: Pa di 16 biaha a rekordá tragedia di Bijlmer

Mon, 06 Oct 2008 22:41:52 -0700

AMSTERDAM / WILLEMSTAD - Mas o ménos dos shen hende djasabra anochi a rekòrdá pa di 16 biaha e tragedia ku a tuma lugá dia 4 di òktober 1992 ora un avion di karga di e tipo Boeing di e kompania israelí El Al a bora den e edifisionan di flèt Groeneberg I Kleine Kruitberg.
Na e okashon ei 43 persona a pèrdè nan bida, entre nan vários antiano.
Pa di promé biaha den e 16 añanan aki e konmemorashon a tuma lugá sin representashon di gobièrnu federal ulandes. E organisashon a bisa di a preferá un konmemorashon mas simpel, ménos grandi i ménos formal ku e añanan anterior.
Famianan di víktima, bisiña, invitado i otronan ku tabata interesá, a reuní djasabra atardi na e Groeiend Monument, “e palu ku a mira tur kos”, ku nan a kombertí den e monumento di konmemorashon.
Den kareda di mitar di shete, esnan presente a tene un minüt di silensio, despues di kua tabatin ponementu di krans na e monumento di konmemorashon.
Freek Ossel, wethouder di Amsterdam a tene un diskurso kòrtiku.
El a bisa djasabra último, di ke bolbe para ketu na loke el a yama e “tragedia teribel” aki.
Nos ta rekòrdá awe loke a sosodé, pero en realidat nos ta kòrda riba e víktimanan tur dia di nobo. Pone oloshi para ketu ta bira un kos difísil, ni maske kuantu gana bo tin pa hasi esei.
Nos mester sigui padilanti. Ta e ferdrit grandi aki nos ta rekòrdá awe,” Ossel a bisa.

Score: 0.0, Votes: 0

Segun Ministerio pa Relashon Eksterior ulandes: Ulanda preokupá pa kompra di arma ruso na Venezuela!

Mon, 06 Oct 2008 22:41:29 -0700

DEN HAAG / WILLEMSTAD - Ulanda ta preokupá pa e gran kantidat di arma ku Venezuela ta kumprando serka Rusia. Un portabos di minister di Relashon Eksterior di Ulanda Maxime Verhagen a bisa esaki den entrevista ku Radio Nederland Wereldomroep.
Segun e korant ulandes De Telegraaf, Ulanda entretantu a imponé un bòikòt di arma kontra Venezuela, pero e bosero di Verhagen a rechasá esaki enérgikamente.
“Pa Ulanda por hasi un kos asin’aki, mester tin un desishon di un organisashon internashonal manera Nashonnan Uní òf Union Oropeo. Un desishon asina simplemente no ta eksistí,” asina e bosero a agregá.
Segun e portabos, Verhagen a anunsiá aña pasá kaba de Tweede Kamer ku e lo wak den forma “krítiko” ora Venezuela hasi petishon nobo pa kompra di arma na Ulanda.
Banda di kompra di arma na Rusia, un otro faktor ku tambe ta hungando un papel ta e tenshon ku a krese den region di Karibe.
T’asina ku ora Venezuela hasi petishon pa kompra di arma na Ulanda, ta Ministerio di Asuntunan Ekonómiko ta esun ku ta duna pèrmit di eksportashon, miéntras ku Ministerio di Asuntunan Eksterior ta duna un konseho polítiko.
Venezuela a yega di kumpra ekipo anteriormente na Ulanda. Tabata trata aki di ekipo elektróniko di e kompania Thales pa marina venezolano.
Verhagen por sierto a enfatisá loke el a yama e bon relashon amikal ku ta eksistí entre Caracas i Den Haag.

Score: 0.0, Votes: 0

Nan ta keda peligroso pa damitanan inosente: Loverboys awor ta buska víktima atraves di Internèt!

Sat, 04 Oct 2008 20:03:46 -0700

UTRECHT / WILLEMSTAD - E fenómeno “loverboys”, un fenómeno ku ta motibu di preokupashon aki na Kòrsou tambe mirando nos hóbennan ku tur aña ta bai Ulanda pa sigui studia, awor a haña un dimenshon nobo.
Loverboys awor ta buska nan víktima atraves di vários sait riba Internèt, manera Hyves i Sugababe.
Un “loverboy”, manera ta konosí ta un mucha hòmber ku atraves di tur sorto di aktividat sosial ta purba di sedusí damitanan hóben pa bira nan amante. E hòmbernan aki ta kumpra regalu, nan ta sali i keiru ku e damitanan i ta hasi tur loke ta agradabel pa e damitanan kai den nan gara. Unabes den nan gara, e damita ta ser obligá di kuminsá traha komo prostituta i produsí plaka pa e “loverboy”.
Inisialmente por a topa “loverboys” ta kologá den kaya, en buska di víktima, pero kos aparentemente ta kambiando. Tantu polis regional di Utrecht komo tambe e organisashon ku ta duna yudansa Pretty Woman a konstatá ku “loverboys” ta subiendo kaya ménos, pero ta buskando mucha muhé awor atraves di Internèt.
“Si bo tin un nanishi pa e kos aki, anto bo ta nota tambe riba Internèt ta kua ta e muchanan muhé ku ta buskando atenshon,” asina un funshonario polisial di Utrecht a bisa den un entrevista den Volkskrant.
“Loverboys” ta hasi uso hopi biaha tambe di Messengers (MSN, Yahoo, etc) pa asina konkistá nan víktima. Bregie Spaans di e organisashon Pretty Woman a bisa ku e forma di operá ta hopi variá.

Score: 0.0, Votes: 0

Partido SP a trata, pero no a logra: Mester prohibí benta liber di Paracetamol!

Sat, 04 Oct 2008 19:59:46 -0700

DEN HAAG/ WILLEMSTAD - Socialistische Partij (SP) ta haña ku mester stòp benta liber di e kalmante Paracetamol. Di e forma aki bo ta redusí tambe e posibilidat di suisidio serka esnan ku ta kana rònt ku e idea, asina e partido a trese dilanti den Tweede Kamer, pero e no a haña sosten, pa e pensamentu aki.
Paracetamol ta un remedi pa fria doló ku ta optenibel tur kaminda aki na Kòrsou tambe. E representante di SP a trese esaki dilanti den Tweede Kamer durante un debate riba e fenómeno suisidio.
Marianne Langkamp di SP a bisa, ku su partido ta haña ku no por t’asina, ku un hende ta kana drenta un lugá i kumpra Paracetamol pa loko, na e kantidat ku e ke.
Langkamp a rekonosé ku un dósil grandi di Paracetamol no ta direktamente mortal, pero si por kousa daño serio ku al final por kondusí tòg na morto di esun ku a us’é.
“Tin biaha esun ku kier a kometé suisidio ta haña remordimentu di loke e kier a hasi. Pero ta konosí ku e efekto final tòg por resultá den morto. Ta konosí por ehèmpel ku un kantidat grandi di Paracetamol ta masha malu pa igra di hende,” el a bisa.
P’esei mes Langkamp tabata kier a bin ku e medida kaminda por haña e remedi aki kumpra solamente na botika, òf si ta den un otro lugá, mester bende esaki tras di tonbank.
Pero Langkamp i su partido no a haña sosten den Tweede Kamer. Partido GroenLinks a papia di un “proposishon istériko.”

Score: 0.0, Votes: 0

‘Kledingvoorschrift’ nobo di minister Ter Horst ; Polis ulandes no por tin tatuahe, piercing ni kabei largu

Sat, 04 Oct 2008 05:55:48 -0700

WILLEMSTAD/ DEN HAAG – Un reglamentu pa vestuario temporal (kledingvoorschrift) pa polis, ku minister pa Asuntunan Interior Guusje Ter Horst a traha, ta prohibí renchi, piercing, tatuahe, kabei largu i kabes mará. Akí na Kòrsou polisnan no ta ni bisti nan plachi di nòmber, manera nan ‘kledingvoorschrift’ ta stipulá.
E medida di Ter Horst ta pa yega na un kuerpo neutral i no partidario. Polisnan a reakshoná rabiá riba e idea di Ter Horst. Nan ta haña e plan ridíkulo. “Nada no tin mag mas. E minister a pèrdè kabes kompletamente”, segun un bosero di e bònt di polis ACP. “Ta mas importante ku un hende ta hasi su trabou bon i ku nos ta un refleho di komunidat. Aweró bo tin ku rekonstruí bo kara pa bo por traha komo polis.”

Kòrsou

Polisnan na Kòrsou por lo general no ta mantené nan mes na e reglamentu pa vestuario ku ta konta pa nan. Kasi niun polis no ta bisti su plachi di nòmber i diferente di nan ta bisti un T-shirt bou di nan kamisa, loke ta kontra di e reglamentu di vestuario. Meskos ta konta tambe pa e flùit ku ta forma parti di nan unifòrm. Bistimentu di pèchi tambe ta manera un problema den Kuerpo Polisial di Kòrsou. Polisnan ta kana riba kaya sin pèchi manera ta algu normal. No papia mes di tatuahe i renchi di orea. Diferente polis ta kana rònt ku tatuahe grandi riba nan brasa i mannan. Meskos ta konta tambe pa bistimentu di renchi na orea. Tin un gran kantidat di polis ta bisti renchi di orea bou di ora di trabou. Den nan tempu liber ta pió. Na e warda di polis na Molenplein tabatin un polis sintá tras di e bali na entrada, ku un renchi di oro na kada orea. E tabata e promé polis ku bo ta topa ora bo drenta e warda di polis.

Score: 0.0, Votes: 0

Brassband kondená pa transporte di droga

Sat, 04 Oct 2008 05:55:21 -0700

WILLEMSTAD/ SCHIPHOL – Korte di Schiphol a kondená awe 3 miembro di Parbo Brassband pa transporte di droga for di Sürnam pa Ulanda. Ta trata di un lote di 3,5 kilo transportá dor di shete miembro di e banda. E kastigu di mas haltu tabata 22 luna.
Marechaussee a detené e sospechosonan dia 29 mart e aña akí. Tabata trata di shete miembro di e brassband ku tabatin bolita gulí. Fiskal a eksihí kastigunan ku a alkansá 40 luna. E kastigu di mas haltu tabata pa e sospechoso prinsipal Naomi D. di 28 aña di edat. E tabatin un ròl prinsipal den e transportashon segun fiskal. E otro dos sospechosonan Dorine E. (28) i Rachel D. (25) a haña un aña i mei di kastigu. E kastigunan tabata mas haltu ku normal ora ta trata gulidónan di bolita. Esaki tabata pa motibu ku Korte a tene e tres sospechosonan responsabel pa e totalidat ku nan a transportá partí bou di nan shete. Anteriormente e kuater otro miembronan di e brassband a haña un aña i mei di kastigu.

Score: 0.0, Votes: 0

Nan tabata okashoná hopi molèster: A kore ku trafikantenan di droga na Eindhoven!

Wed, 01 Oct 2008 20:46:08 -0700

WILLEMSTAD - Polis a kore ku un grupo grandi di antiano trafikante di droga ku durante basta luna tabata okashoná molèster na Stationsplein na Eindhoven.
Iluminashon skèrpi riba sitionan ku tabata hopi skur, instalashon di kámara di vigilansia i tambe kòntròl èkstra di patruyanan polisial a hasi nan trabou, asina Rob van Gijzel, alkalde di Eindhoven a bisa, kontestando preguntanan di miembronan di konseho municipal di e siudat.
Algun luna pasá, un grupo di antiano a yega Eindhoven prosedente di Rotterdam. E grupo aki, prinsipalmente den oranan di anochi i mardugá tabata okashoná hopi molèster, tabata kulpabel na aktonan kriminal i tabata krea un esfera di insiguridat den e área na Stationsplein. T’asina ku e plèki aki ya tabata konosí komo un lugá notorio, kaminda bo ta haña trafikante di droga, adiktonan, hendenan ku ta kana rònt sin pariba ni pabou i otro klase di delinkuente.
“Dado momentu, kos tabata parse manera kos tabata bai sali for di man”, asina Van Gijzel a bisa. E kos a bira asina alarmante, ku mester a laga funshonarionan ku ta atendé ku e lei di enseñansa obligatorio atendé ku vários hóben menor di edat ku tabata meskla den e grupo aki.
Por sierto ku a detené i sera tres trafikante di droga mayor di edat, pa un periodo mas largu. E grupo di mas o ménos 30 antiano a ser señalá un tempu kaba na Brabant. Ta parse awor ku e aktividatnan di trafikashon di droga a muda pa Helmond, asina Van Gijzel a indiká.

Score: 0.0, Votes: 0

Huntu ku dos hóben antiano ku ta preparando pa bira pastor na Ulanda

Mon, 29 Sep 2008 19:34:46 -0700

Selebrashon Hubileo di Oro di Obispado di Willemstad
na Den Haag

WILLEMSTAD - Durante di e promé santu sakrifisio di misa ku Mgr. Luis Secco a selebrá na Ulanda dia 30 di sèptèmber aña pasá, Mgr. Luis Secco a konta di e selebrashonnan ku lo bai tin na Kòrsou e aña aki, esta 2008. Obispado a haña hopi importante pa selebrá e Hubileo di Oro di Obispado di Willemstad na Ulanda tambe.
Esaki a sosedé ayera 28 di sèptèmber na Martha Kerk, Den Haag ora e komunidat katóliko Antiano i Arubano a kompartí un bunita santu sakrifisio di misa. E tabata un atardi hopi bendishoná ku presensia di dos obispu. Mgr. Adriaan van Luyn Obispu di Rotterdam i tambe nos Obispu di Willemstad Mgr. Luis Secco. Un grupo di seis pastor a konselebrá huntu ku e Obispunan. Tambe tabatin dos hóben semenarista Antiano ku ta preparando pa bira pastor aki na Ulanda. Un kantidat di mas o ménos mil fiel a uni den un selebrashon alegre i festivo, animá pa kor Talentonan Uni, esaki ta konsistí di diferente miembro di kornan na Ulanda.
Ta di remarká, ku e preparashon di e Hubileo aki tabata na enkargo di Desiree Martina i Grupo di orashon “Yunan di Dios”, ku no a laga niun detaye afó.
Den su predikashi Mgr. Luis Secco a bisa: “Nos ta un pueblo ku tin fe, ku ke mantené i transmití e fe aki i un pueblo ku ta disfrutá di legria, di fiesta i ku ta sinti Dios su presensia. I ku ora nos ta leu for di kas, nos ta sinti deseo di uni nos mes ku Dios i nos próhimo, superando bareranan di rasa, idioma i nashonalidat. Mgr. a dirigí na e hóbennan un palabra chikí di animashon pa no tene miedu di sigui Kristu ku ta hasi nos bida mas liber, mas bunita i mas grandi.”

Score: 0.0, Votes: 0

No ta konosí ki konsekuensia esei tin pa Kòrsou” ; A nashonalisá Fortis pa skap’é di krísis finansiero!

Mon, 29 Sep 2008 19:29:51 -0700

AMSTERDAM/ WILLEMSTAD - E negosiashonnan na Brussel den kuadro di esfuersonan pa skapa Fortisbank di un krísis finansiero, a yega na un akuerdo. E instituto a ser nashonalisá pa diferente pais. Ku esaki, gobièrnunan a skohe pa nashonalisashon di e banko.
Ayera nochi nan a anunsiá e desishon aki, despues di dos dia di deliberashon intensivo.
E desishon ta ku Ulanda, Bèlgika i Luxemburg lo tuma un minoria di 49 porshento di e akshonnan di e banko. En total nan ta invertí 11.2 mil mion euro den e instituto. Pa Ulanda esei ta nifiká ku lo mester pone 3 mil mion euro riba mesa.
Fortis a nase na aña 1990, na momentu ku e kompania di seguro AMEV i e banko VSB a uni forsa. Komo konsekuensia di atkisishon di vários banko i otro instituto finansiero, entre nan MeesPierson, Fortis a kombèrtí su mes den un dje institutonan di mas grandi ku ta duna servisio finansiero na Oropa.
Minister di Finansa di Ulanda Wouter Bos a bisa ku Fortis lo keda un banko kaminda sèn di hende ta sigur.
“Nos ta sinti nos mes obligá di yuda un banko manera Fortis pasa den e tempunan turbulento ku tin awor aki,” asina Bos a agregá.
Bèlgika ta invertí 3.7 mil mion euro den e banko miéntras ku Luxemburg lo hasi esei pa e montante di 2.5 mil mion euro.
Fortis a sorprendé amigu i enemigu aña pasá, ora el a drenta den e lucha pa atkirí ABN-Amro. Fortis a logra tambe di pone man riba partinan grandi di e banko ulandes aki pero komo konsekuensha di e krísis finansiero, e no por a wanta esei mas.

Score: 0.0, Votes: 0

E problema ta kresiente: Na Rotterdam tin problema ku hòrtamentu plachi number!

Fri, 26 Sep 2008 16:54:55 -0700

ROTTERDAM/ WILLEMSTAD - Rotterdam ta konfrontando un problema ferfelu, pero ku pa nos aki na Kòrsou no ta nada nobo: hòrtamentu di plachi di number di outo. Mas i mas plachi di number di outo ta disparsiendo na Rotterdam i besindario. E aña aki so, nan a registrá den e promé sinku lunanan un total di 725 plachi di number ku deskonosínan a hòrta.
Den e mesun periodo aki aña pasá, a hòrta 638 plachi di number, asina polis di Rotterdam-Rijnmond a informá. En total t’asina, ku doñonan di outo den e region aki ta hasi keho un 1700 biaha pa aña di plachi di number ku a disparsé. Na Kòrsou tambe konosé e fenómeno aki, ounke hopi biaha e ladronisia ta konsentrá riba e plachi di kòntròl ku bo ta pega riba e number di outo mes.
Polis ta bisa, ku e no tin niun idea, unda e plachinan di number aki ta bai. Por lo general, polis ta logra haña solamente un 10 porshento asina bèk. Outoridatnan ta sospechá, ku sea nan ta usa e plachinan pa asina tènk gasolin sin paga òf ta usa e plachinan di number aki pa aktonan kriminal mas pisá.
Manera LA PRENSA a relatá resientemente, na Ulanda ta eksperimentando ku e idea pa traha un plachi di number di un material ku na momentu ku bo pensa di kita esaki for di e vehíkulo, e ta kibra. E idea aki ta den un fase di eksperimentu aki. Ta e intenshon pa pronto kuminsá ku un kampaña grandi pa trata di e forma aki di redusí hòrtamentu di plachi di number.

Score: 2.0, Votes: 1

Den kuadro di problemanan na Den Haag; Enkuentro tokante violensia doméstiko bou di antianonan

Fri, 26 Sep 2008 16:52:47 -0700

WILLEMSTAD/ DEN HAAG – Pa haña un bista riba e problema di violensia doméstiko bou di antianonan, munisipio Den Haag ta organisá un enkuentro spesial ku e tema ‘violensia doméstiko bou di famianan antiano’.
Ta trata di un enkuentro interaktivo ku partisipashon di organisashonnan ehekutivo den kuadro di e ‘Antillendossier’. Sentral durante e enkuentro ta e temanan; Malechor-Víktima, Mucha i violensia doméstiko, Ayudo sosial i aspektonan kultural, Legislashon i koperashon. Ta diskutí e temanan na un mesa rondó ku partisipantenan ku ta kambia konstantemente. E meta di e enkuentro ta pa señalá opstákulonan, hasi e koperashon mas fuerte i fortifiká e nètwèrk rondó di violensia doméstiko.
Resientemente minister di Hustisia Ernst Hirsch Ballin a manda e Plan di maneho Violensia doméstiko 2011 ‘E segunda fase’ pa Tweede Kamer. Hirsch Ballin ta tambe e mandatario ku ta kordiná violensia doméstiko. Ta e intenshon pa atendé mas serio ku e maneho penal di violensia doméstiko. E meta ta pa oumentá e denunsianan te 45% di tur insidente registrá dor di polis na 2011 (38% na 2006).
Ku stimulashon pa hasi denunsia i detenshonnan ta engrandesé e posibilidat pa persiguí esnan ku kometé violensia doméstiko. Asina ta pone mas ku anteriormente tabata e kaso e aksènt riba e maneho penal di violensia doméstiko. Tambe lo ekspandé e ekspertisio serka Ministerio Públiko. Ya pa fin di 2008 reclassering lo tin un oferta di reclassering balansá pa tur kaso di violensia doméstiko den kuadro penal. Ku esaki ke logra na baha e kantidat di residivistanan bou di esnan ku ta kometé violensia doméstiko te ku 25% na 2011 (30% na 2006). E periodo te ku 2011 lo ta den e lus di introdukshon di prohibishon di kas (huisverbod). Lo trata e Lei prohibishon di kas temporal fin di sèptèmber den Eerste Kamer i konsekuentemente e lo drenta na vigor na kuminsamentu di 2009. E ayudo sosial ta keda esensial den e maneho di violensia doméstiko.

Score: 5.0, Votes: 1

Segun buki di istoria na skol: Ta un deskonosí a tira Pim Fortuyn mata!

Wed, 24 Sep 2008 19:19:59 -0700

GRONINGEN/ WILLEMSTAD - Pa sorpresa di tantu frakshon di VVD den Tweede Kamer na Ulanda komo mayornan di studiantenan di skol, e buki di istoria “Indigo” ta bisa ku no ta Volkert van der Graaf, e persona kondená pa asesinato riba Pim Fortuyn na Ulanda a tira e polítiko mata, pero un otro persona deskonosí. E buki ta bin di e kas editor Noordhoff.
E kaso di asesinato aki manera ta konosí a tuma lugá dia 6 di mei 2002. Fortuyn tabata kanando den Mediapark na Hilversum ora un persona deskonosí ta aserk’é, loke tabata parse un hende ku ke un firma di dje. Anto direpente, e persona aki ta saka un pistol i lòs tiru riba Fortuyn, ku a resultá despues den su morto.
Asesinato di Fortuyn, sigur den e promé oranan ku a sigui kaminda no tabata sa ainda ta ken tabata e outor, a okashoná tenshon tambe den komunidat antiano na Ulanda. Tabatin rumornan fuerte ta kore ku kisas por ta un hende di koló, lo a tira Fortuyn mata, algu ku afortunadamente a resultá despues di no ta e kaso.
Den un dje kapítulonan di e buki aki ku ta trata sierto situashon den sosiedat, e outor ta relatá e kaso di asesinato ampliamente i e opinion i krítika di Fortuyn riba un sosiedat ku ta kuida su hendenan, riba e aspekto multicultural di estado ulandes i riba islam. Segun e buki, ta e opinionnan skèrpi aki finalmente a bira fatal pa Fortuyn.
“Pakiko mi yu mester siña tur kos di Pim Fortuyn, siña asta ta kiko ta e motibunan ku a kondusí na su morto anto e buki no ta bisa ku ta Van der Graaf tabata e asesino? E kos aki no ta korekto. Mi ta haña e kos aki informashon falsu,” asina mama di un studiante a opiná.

Score: 0.0, Votes: 0

Di tantísimo intento pa hasi tráfiko mas sigur ; Partido CDA ke introdusí aparato pa outomobilista asosial

Wed, 24 Sep 2008 19:17:53 -0700

WILLEMSTAD/ BOLSWARD – E partido polítiko ulandes CDA ke introdusí un aparato ku mester instalá den vehíkulo di outomobilistanan asosial. E aparato, ‘aso-slot’, mester registrá komportashon di outomobilistanan ku ya a yega di kometé infrakshonnan grave.
Miembro di Tweede Kamer Sander de Rouwe a tuma e inisiativa i entretantu a haña sosten di e partidonan PvdA i ChristenUnie. “Mi tin e sentimentu ku minister Camile Eurlings lo tuma e inisiativa akí”, Rouwe a bisa. E aparato ta destiná den promé instante pa outomobilistanan ku a kaba di kumpli ke periodo durante kua nan no tabatin mag di stür. Na momentu ku nan regresá riba kaminda, ta instalá e aparato den nan vehíkulo i ta sigui nan durante un periodo. E krítika ku gobièrnu ta komportá su mes manera ‘Big Brother’, De Rouwe ta pone un banda. “Ta bai hustamente pa e grupo chikí di piratanan di kaminda ku konstantemente ta tacha libertat di otro hende riba kaminda.”
VVD tabatin hopi krítika riba e plan. Miembro di Tweede Kamer pa VVD Paul de Krom, a yama e idea idiot. VVD ta kere ku despues di e periodo di prueba e pirata di kaminda ta bolbe faya. Ta p’esei e ta haña ku minister di Tráfiko Eurlings (CDA) mester hasi e chèns pa gara e outomobilistanan akí mas grandi. “Esei ta e motivashon prinsipal pa e outomobilista kalkuladó. Ta p’esei mester bin mas polis riba kaya. Muchu mas ku e 125 ku a primintí siman pasá. Esaki ta 1/3 polis pa kada munisipio.”

Score: 4.0, Votes: 1

Pero e tin mas delito riba su nòmber: Fiskal a pidi bida largu pa antiano pa kaso asesinato!

Sat, 20 Sep 2008 21:18:32 -0700

WILLEMSTAD - Fiskal den korte di Rotterdam a pidi bida largu pa e antiano Brian R.
Ministerio Públiko ta akusá e sospechoso di asesinato, un òf mas intento di asesinato i tambe un kaso di violashon.
E tiroteo a tuma lugá den luna di yanüari 2007 na Katendrecht, pegá ku Rotterdam. Na e okashon ei, un hòmber a bira víktima i a pèrdè su bida.
Ministerio Públiko ta papia di un kaso, kaminda “un persona totalmente inosente a bira víktima di e rabia sin frontera di e sospechoso”.
Aparentemente lo a bati R. formalmente den un bar un ratu promé ku e insidente.
Pero segun Ministerio Públiko, ounke e víktima tambe tabata den e bar na momentu ku nan tabata batiendo R., e mes no tabatin nada di aber ku e asuntu.
Ministerio Públiko ta sospechá R. ademas di a violá un dama na Leeuwarden 2 luna despues. R. aparentemente a hasi algun deklarashon superfisial riba e kaso aki.
E sospechoso a ser kondená den pasado na diferente okashon kaba pa aktonan di violensha.
Asina por ehèmpel nan a kondená R. na 1991 aki na Kòrsou pa atrako ku violensia na 3 aña di kastigu di prizòn. E tempu ei e tabata ainda menor di edat.
Na 1996 i 1997 korte na Ulanda a sentensi’é na respektivamente 2 aña i 30 luna di kastigu di prizòn, den tur dos kaso pa motibu di a hòrta tas di hende.
Na 2005 R. mester a sinta 2 aña, pa motibu di un kaso di sekuestro.

Score: 6.0, Votes: 1

Pa lokalisá kriminal den skuridat ; Polis ulandes tin aparato pa detektá hende via temperatura

Sat, 13 Sep 2008 17:37:56 -0700

WILLEMSTAD/ UTRECHT – Polis di Utrecht ta usando un arma nobo pa lokalisá kriminalnan ku skonde ora ta skur. E arma ta señalá diferensia den temperatura i asina por distinguí un opheto kayente for di un opheto friu.
Despues di un periodo di prueba di 1 aña, tur e wardanan di polis den e diferente distriktonan a kuminsá usa e arma. Tur loke ta produsí kayente e aparato ta señalá. No solamente e kriminal ku ta skondé den skuridat, sino tambe animalnan den besindario. E téknika ta bai dje leu ei, ku si un persona a tene un arma di kandela den su man, e kayente di su man ta keda pa algun ratu riba e arma. Den kaso ku e tira e arma afó den skuridat, e aparato ta señalá esaki.
Polis di Utrecht ta usa e arma tambe den áreanan kaminda tin hopi kiebro den vehíkulonan. Ladronnan tin e kustumber pa pone nan mannan na e glas di un vehíkulo ora nan ta lur den dje pa wak mas mihó kiko tin den dje. Dor di esaki ta keda riba e glas dos mancha ku ta produsí kayente. Un polis ku nota diferente vehíkulo den e mesun área ku e manchanan akí, ta komprondé mes ora ku tin un ladron ta kana rònt ta buska kos di hòrta.
E aparato no ta solamente importante pa lokalisá un kriminal, pero tambe ekskluí e posibilidat ku por tin un kriminal den e área. Si tin sospecho ku un ladron a kore bai den direkshon di un tereno grandi, no mester sera e área mas i buska tur kaminda ku un kantidat grandi di polis. Ku e aparato ku ta detektá temperatura di kurpa, por wak den un bia si e ladron ta skondé un kaminda.

Score: 7.0, Votes: 1