Laprensa Newspaper - Kolumna Bob Harms

Awakati

Mon, 18 Aug 2008 18:26:55 -0700

Tin un dicho ku ta bisa: “Awakati tin un problema di identidat. E no sa si e ke ta fruta òf vegetal”. Mi kier sa ku e dicho aki ta aplikabel pa hopi yu di Kòrsou ku dia aden, dia afó ta hiba un lucha tenas ku nan mes pa loke ta nan identidat. I realidat ta ku 99.9% di e hendenan aki ta di desendiente afrikano. Mi ta afrikano òf latino? Mi tin nashonalidat ulandes òf mi ta makamba? Mi ta mulato òf mi ta un mestiso? Mi ta pretu òf mi ta neger? Mi tin koló kla òf mi ta un djuku? Mi tin kabei krin òf kabei las? Mi ta fruta òf vegetal?

Poko dia ei mi a tuma nota di deklarashon di direktor di Kas di Kultura, dòkter Rene Rosalia, enkuanto identidat. Segun e erudito aki, nos ta un pueblo ku ta den un krísis di identidat. Rason parsial! Dikon parsial, pasobra si tira un bista riba e diferente nashonalidatnan ku ta biba na Kòrsou, kasi tur, ku eksepshon di e asina yamá ‘afro-kurasoleñonan’ sa presis kiko ta nan identidat i desendensia ètniko. E indio ku nos ta yama hindú sa bon bon di unda e ta bini, ken e ta i unda e ta. Meskos pa e hudiu sefardiko òf askenazi, e ingles di islanan karibense (esnan ku nos ta yama ‘bedji’), e ulandes oropeo (ku nos ta yama ‘makamba’), e dominikano, e haitiano, e colombiano, e ‘paisa’ di Venezuela, e boneriano, e arubiano i tur sobrá di e ochenti’piku nashonalidatnan ku ta biba na Kòrsou. E úniko ku no sa, no ta interesá pa sa òf tin bèrgwensa di sa di unda e ta bini, ken e ta i na unda e ta, ta e afro-kurasoleño.

Score: 0.0, Votes: 0

Curoil, imágen i reputashon

Thu, 07 Aug 2008 19:48:46 -0700

Algun aña pasá, Bill Clinton, e tempu ei presidente di e nashon mas poderoso di mundu, a hañ’é den un labatiba formalmente. Un skandal di marka mayor, ku a drenta historia komo e “skandal Lewenski”. Ora ku e skandal aki a kue dimenshonnan ku kasi a kosta su presidensia, Clinton a buska yudansa di Lanny Davis, kende banda di ta un tremendo abogado, ta un berdadero “guru” riba tereno di relashon públiko i komunikashon den momentunan di krísis. Su eksperensianan di e skandal aki el a skibi den un buki ku el a yama “Truth to Tell: Tell It Early, Tell It All, Tell It Yourself: Notes from My White House Education”. E dianan aki mi no por yuda di pensa riba Lanny Davis. Sigur ora mi mira mi amigu direktor di Curoil, Gensley Capella su reputashon spat na wèrki. Esaki danki na un situashon ku den tur sentido di palabra, e por a kontrolá for di kuminsamentu.

E título di e buki di Lanny Davis ta deskribí e promé regla ku kapitannan di industria, direktor di empresanan grandi òf dirigentenan institushonal òf polítiko MESTER apliká ora nan haña nan den un situashon di potensial krísis. Bisa e bèrdat, bis’é tempran, bisa tur kos i bis’é bo mes! Lamentablemente nos den e huki di mundu aki ta sigui kere ku skonde kos, tapa kos òf purba duna bèrdat un “koló propio” ta e mihó manera pa atendé un situashon di krísis. Nada ta mas leu di bèrdat!

Score: 0.0, Votes: 0

Magnate di sapatu

Thu, 31 Jul 2008 16:25:33 -0700

Despues di kasi 9 aña ta skibi un kolumna den e prestigioso korant aki, m’a kuminsá puntra mi mes si tabata mihó pa en bes di ta kolumnista, m’a bira trahadó di sapatu. Pasobra, no ta pasa un siman, un kolumna, ku hendenan unda ku ta na mundu, ta kue e loke mi a skibi bisti, tum’é asina personal i kue bistié manera e proverbial sapatu. Ta manera un sapaté, ku kua sapatu k’e traha, ta pas “de eerste de beste” ku kue bistié. Inkreibel. Si en realidat ta sapatu mi tabata traha, masha dia lo mi a bira un magnate di sapatu. Un “Prada”, “Florscheim”, “Bali” of “Nike”.

Mi ta paga masha atenshon ora mi ta skibi mi kolumna pa mi no ofendé niun hende. Sigur pa mi no bira personal. Ora mi menshoná nòmber mes, ta pa mi indiká un persona embolbí den e sirkunstansia riba kua mi ta skibi. Ku otro palabra, e persona no ta importámi. T’e sirkunstansia ta konta. Kiko mi ta gana dor di bira personal? Ki benefisio un persona ku ta tuma e molèster di lesa mi kolumna tin, di lesa kosnan personal di otro hende? Niun. Banda di esei, m’a haña sufisiente edukashon di mi mama Shon Me i mi tata Fenton (tur dos den felis memoria!) pa sa ku den un diskushon, no ta e hende ta importante, sino e tópiko, e “issue” riba kua ta debatiendo. Un kos si! Mi no tin miedu di skohe ni señalá tópikonan ku otronan lo preferá pa laga un banda. Kolumna ku un kontenido tribi? Si. Kontroversial? No! Chupa for di dede? Hamas.

Score: 0.0, Votes: 0

Bienestar na rudia

Tue, 15 Jul 2008 19:23:46 -0700

Mi ta kòrda novèmber 15 aña pasá, tempu ku tabata hasiendo gestionnan pa lanta Partido Antia Restrukturá. Ounke tur esnan presente tabatin mil i un motibu personal pakiko nan kier a drenta polítika (bèk), tur tabata uni den un solo pensamentu polítiko: kon kibra e poder polítiko di Partido Nashonal di Pueblo, ku e tempu ei, dirigí pa señora Maria Liberia-Peters, tabatin e poder polítiko kasi apsoluto na Kòrsou.

Prinsipalmente despues di e referèndem di ’93, ora ku e órden polítiko na mando e tempu ei a mustra bon kla, ku no tabata nan intenshon pa duna kontenido na e deseo di pueblo di Kòrsou pa e islanan antiano keda huntu den Antia di 5. “Referèndem ta referèndem, elekshon ta elekshon” tabata e kontesta di señora Liberia-Peters kada biaha ku prensa puntr’é si e lo “respetá” resultado di e referèndem ei. Pues ku otro palabra, Partido Nashonal tabata e “nemesis” polítiko di PAR. E “enemigu” ku PAR a usa semper komo referensha pa mustra kon diferente e si ta for di “polítika tradishonal”.

E enemistat polítiko aki a perdurá te na 1998, kulminando den pitu di elekshon ku un kaso den korte di hustisia ku lider polítiko di Nashonal di e tempu ei, señora Suzy Camelia-Römer a entamá kontra PAR, pasobra PAR a referí na su persona den un spòt di televishon ku el a “sufri” un kantidat di skandal tempu e tabata minister di Hustisia.

Score: 10.0, Votes: 1

Ku tur rèspèt

Wed, 18 Jun 2008 07:57:14 -0700

Mi kurason a dal un salto di legria, ora ku mi a lesa den korant ku Bestuurscollege di Kòrsou a disidí pa lanta un komishon ku lo karga e nòmber di e gran i inolvidabel outor i benefaktor, Boeli van Leeuwen. Mas legria a drenta mi alma ora mi ta tuma nota di e enkargo di e komishon ku a haña, esta pa determiná kriterionan ku mester sirbi komo base pa otorgá un premio “Boeli van Leeuwen” na personanan den komunidat ku hasi nan mes meritorio pa tal premio.

Mi tin un sugerensia. En bes di hasi e premio aki unu literario, por fabor hasié unu periodístiko. Mi ta kere ku Boeli van Leeuwen lo keda masha kontentu si e sa ku ta usa su nòmber i su espíritu literario pa premiá personanan ku destaká den mundu periodístiko.

Boeli lo ta kontentu si e sa ku lo premiá e periodista ku durante aña a destaká pa su ophetividat; pa su rèspèt pa e kódigo profeshonal di periodismo; pa su sentido di investigashon na nòmber di esnan ku no ta kapas pa hasi esaki nan mes; pa su defensa den prinsipionan demokrátiko; pa su estilo prosaiko di skibi i hopi importante, pa su uso respetuoso i leal di nos idioma PAPIAMENTU!

Boeli ta progenitor di un di mihó periodistanan ku Kòrsou a konosé, Anna van Leeuwen. Un periodista ku a destaká su mes pa su sentido investigativo i su afan pa, apesar di ta krítiko, semper pone ophetividat dilanti. Mi mes a konosé Boeli semper komo un persona ku a stimulámi pa ta kritiko den mi trabou komo periodista. “Puntra, puntra i sigui puntra, te ora ku “e bèrdat” di e asuntu sali na kla” tabata su mantra. “I ora “e bèrdat” ei revelá su mes, skibié ku ophetividat i hustisia”.

Score: 6.0, Votes: 1

Míles di bobolongo

Wed, 18 Jun 2008 07:56:27 -0700

No tin awa pa laba. E loke tur hende ku un tiki noshon di gobernashon por a spera, a bira realidat. A aplasá e fecha riba kua e kambionan estatal pa Kòrsou i St. Maarten mester drenta na vigor i ku esei, e saneamentu di debe eksterno di Kòrsou tambe. Di un forma masha “Nanzi”, Ulanda a kore firma e akuerdo di SEI (Inisiativa Sosial Ekonómiko) ku gobièrnu di Antia, pa no laga señora Emily de Jongh-Elhage man bashí. No te a primintí pueblo ku e kambionan estatal lo nifiká “bienestar” pa pueblo. Echo ta keda si, ku e pipitanan di pinda ku señora de Jongh-Elhage a haña ku SEI ta ñaña kompará ku e 5 mil mion florin ku eksonerashon di e debe di Kòrsou lo a trese. Mi ta duda ku señora de Jongh-Elhage por logra muchu bienestar pa pueblo ku 180 mion florin.

Polítikonan, spesialmente esnan pro “slotverklaring”, tin masha hopi di bai splika pueblo. A pinta pueblo serunan di oro, riunan di honing i dicha eterno na momentu ku Kòrsou haña su Status Outónomo den Reino i Ulanda guli nos debe di míles di mion di florin. Niun hende tabatin e kordura di bai splika pueblo ku ta trata aki di un proseso kompliká, ku sigur no ta realisabel den 1-2-3. Djis chèk Aruba. Ku un pueblo pará manera 1 blòki tras di e ideal di separashon for di Kòrsou mes a dura mas ku 20 aña promé ku nan Status Aparte a bira un realidat.

Ku e proseso pa Kòrsou i St. Maarten haña un Status Outónomo den Reino ta 10 biaha mas kompliká ku e Status Aparte di Aruba, ta un echo. Mas ainda pa esnan responsabel pa kanalisá e proseso aki usa tur medio na nan alkanse pa splika, bolbe splika i sigui splika pueblo na plaka chikí kon e proseso ta hinká den otro i kiko ta e espektativanan. Nèt loke nan niun a hasi!

Score: 0.0, Votes: 0

Míles di bobolongo

Tue, 27 May 2008 16:17:33 -0700

Score: 0.0, Votes: 0

Baha gobièrnu

Mon, 19 May 2008 15:40:02 -0700

A para bira un kustumber fastioso den paisnan di reino unda ta papia papiamentu pa ‘cueste lo que cueste’, buska manera pa baha e gobièrnu na mando. No ta importá di ki forma esei sosodé. E por ta traishon polítiko, interesnan di gremio òf di persona i manera nos por mira último tempu, via di akshon sindikal òf di un grupo di trahadónan. Ku tipo di akshonnan asina ta duna resultado, ta un pregunta grandi. Echo ta, ku pa dianan largu, komunidat, ku otro palabra, hendenan inosente, ta esnan ku ta sufri. Pa no papia mes di ekonomia di e isla.

Un par di siman atras, Aruba tabata na bùrt. Pa 7 siman un grupo grandi di empleado públiko a subi kaya pa demandá gobièrnu un kompensashon pa subida di kosto di bida. For di kuminsamentu tabata bisto pa esun ku dos dede di sintí ku e ’sindikatonan den akshon’, manera nan a yama nan mes, no tabatin un strategia deliniá pa logra nan meta. Esnan ku a sigui djaserka e lucha sindikal di Kámara Sindikal/SSK di 1991 na Kòrsou pa “gelijktrekking” i indeksashon di salario, lucha ku si tabatin strategia i táktika super bon deliniá, mesora a konkluí ku tabatin otro kos tras di e supuesto lucha aki. I Bingo! Despues di shete siman di akshon i wèlga, a yega na un akuerdo suavemente bisá ‘kuestionabel’ ku gobièrnu. Resultado final tabata, ku esnan ku a wèlga a pèrdè (na salario) muchu mas tantu welgando, ku e loke finalmente nan a haña. Konklushon final: e wèlga tabata mas intento, totalmente frakasá mester bisa, di oposishon pa via e akshonnan sindikal, baha e gobièrnu ku ta sintando.

Score: 0.0, Votes: 0

TeleAruba por a transmiti entrevista Poentje Castro y Patrick van der Eem

Mon, 10 Mar 2008 17:13:35 -0700

Considerando circumstancianan exepcional di e caso

Leynan local y di reino hulandes, pero sigur tambe principionan di periodismo responsabel, no ta impedi un planta di televishon pa re-transmiti un reportahe traha cu ‘camera scondi’ of declaracion di un hende graba sin su conocemento. E conclusion aki por yega n’e despues di un revision municioso di nos leynan civil aki na Aruba, esnan di reino hulandes, pero tambe hurisprudencia den casonan cu a aparece dilanti di e ‘Conseho di Periodismo”di Hulanda, conoci den lenga hulandes como “Raad voor de Journalistiek’. Cu otro palabra, e argumento pseudo huridico di gerencia di TeleAruba pa no a pasa e programa ‘Un dia den Bida’ produci pa Poentje Castro no tin muchu validez.
E argumento pa no pasa e programa pa motibunan huridico no tin muchu validez pasobra na prome lugar, transmicion of no di e programa no por ta basa ariba argumentonan huridico sino periodistico. Esaki pasobra den mundo di television y radiodifusion ta un hecho cu tur hende cu bai di acuerdo pa haci un entrevista, mester realisa cu e loke e bisa, tanto PROME, DURANTE of DESPUES di e entrevista por y ta worde graba y cu tur loke e persona bisa of haci por y ta worde usa periodisticamente. Un ehempel cla di esaki ta e afamado programa na television hulandes, ‘Pauw & Witteman’, unda despues cu ‘oficialmente’ e transmision a termina, Joran van der Sloot a tira un glas di biña den cara di e periodista investigador, Peter R. de Vries. Aunke productornan di e programa aki a cuestiona e forma con otro canalnan di television a haña e material videografico, nan no por a haci nada nada pa stroba su re-transmision den otro programanan di noticia.

Score: 6.0, Votes: 1

Kultura di krísis

Wed, 30 Jan 2008 10:42:44 -0800

Ta un echo inegabel ku nos kultura di komunikashon ta unu basá riba krísis. Sea di un forma pro-aktivo òf pasivo, hopi ta e instansianan, organisashon, grupo, empresa, partidonan polítiko òf polítikonan individual ku kada biaha atrobe ta haña nan den un situashon di krísis innesesario, ku tur e konsekuensianan ku esaki tin pa sea nan imágen, reputashon òf benta di nan produktonan.

Pa esnan aktivo riba tereno di relashon públiko i komunikashon, e dianan aki ta un berdadero “nirvana”. Situashonnan di krísis ku a surgi un tras di otro, kada un di nan revelando e ingredientenan klásiko di un situashon di krísis. Ingredientenan ku pa e eksperto riba e tereno aki, pero sigur tambe pa kualke persona ku un granito di “common sense” ta instrumentonan ku e por manehá pa sea minimalisá e efektonan di e krísis pa e imágen òf reputashon di e instansia, organisashon, grupo, empresa, partidonan polítiko òf personanan individual òf hasta bòltu esaki na nan benefisio.

Mi ta bai tuma dos ehèmpel. E promé na Aruba. Na e úniko hospital di e isla aki un dama 9 luna na estado a duna lus na loke ta yama un “angelitu”, esta un beibi ku a nase morto. E ginekólogo ku a atendé a mama, mesora a kue kaminda pa prensa pa, usando mil i un argumento, mustra ku morto di e beibi, en todo kaso, no ta su falta. Ta falta di e asegurado general AZV ku tin yen di eksigensia arkaiko ku ta stroba spesialistanan duna un kuido na drechi, ta falta di hospital ku no tin personal, mashin bieu, etcetera. E asegurado general no a pèrdè pa gana i e tambe a kohe kaminda pa prensa pa splika ku ta e ginekólogo a faya, pasobra e reglanan di e asegurado no ta stroba un spesialista aktua den un kaso di emergensia. Den tur e diskushon, niun hende no tabatin e kordura i pasenshi pa warda un investigashon di hospital kiko a sosodé. E resultado, ni e ginekólogo, ni e asegurado ni hospital no tabatin falta den nasementu morto di e beibi. Konsekuensia? E imágen di e dòkter a sufri, miéntras e imágen i reputashon di e asegurado AZV a bolbe haña un sla. Tur esaki, innesesario si kada un a opservá un di e promé reglanan di komunikashon den momento di krísis: GET ALL THE FACTS FIRST! Bo skohe pa bai publisidat solamente ora bo tin TUR echonan riba un rei i no solamente pasobra bo kier defendé bo reputashon. Echo ta, ku den tipo di kasonan asina bo ta hasi mas daño na bo mes, pasobra bo ta drenta publisidat ku datonan ku bo tin sigur si nan ta klòp, si òf no. Rektifiká bo propio deklarashonnan den momento di krísis ta un piká mortal!

Score: 7.0, Votes: 1

Bos di buriku...

Wed, 09 Jan 2008 12:40:22 -0800

Hesus yunan di Kòrsou tin un memoria kòrtiku! Den tur e furia di masbangu di último dianan rondó di e figura marginal di polítika di Ulanda, Hero Brinkman, tur hende aparentemente a lubidá, ku no ta promé biaha ku polítikonan ulandes a ekspresá nan mes di e forma ei kontra Kòrsou, Antia i su habitantenan. No ta promé biaha i sigur no ta último!

E ekspreshonnan di Brinkaman no a sorprendé hopi hende. Ami sigur ku no! Loke si tabata un sorpresa, tabata e reakshon di miembronan di parlamento di Antia, kendenan a sulfurá, sapatiá, rabia te bira pus, pasobra shon Brinkman no kier a guli su palabranan. Den e proseso, lubidando e hecho ku nan sapatiamentu i eksigensia pa rektifikashon a duna e deklarashonnan di Brinkman muchu mas publisidat i balor ku originalmente nan a haña òf tabatin. Pero pa kometé tipo di bobedatnan asina bo mester yama Pedro Atacho òf Glenn Sulvaran.

Score: 9.0, Votes: 1

E gran engaño di 2008

Wed, 02 Jan 2008 05:28:15 -0800

Mi kier kuminsá mi promé kolumna pa 2008 deseando tur hende den Reino Ulandes ku ta papia, lesa i skibi papiamentu un felis aña nobo. Kòrda ku bo bida ta 100% produkto di bo pensamentu i aktonan. Pues ta mas ku lógiko ku pensamentu i akshon positivo lo redundá den nada otro ku kosnan positivo pa bo mes, esnan serka di ’bo i e komunidat ku bo ta biba aden.

I papiando di kosnan positivo, kasi tur mandatario i/òf polítiko antiano a koinsidí den nan spichnan di fin di aña ku 2008 lo bira un aña di hopi “perspektiva”, unu di “kresementu” i di “adelanto”. Despues di hopi hopi aña di tende un tras di otro promé ministernan den nan diskurso di fin di aña anunsiá kataklismo pa e aña ku ta bini, e biaha aki tabatin manera un kompetensia entre lidernan polítiko pa anunsiá e “bon notisia” pa e aña ku ta bini.

Kosnan lo kana bon pa Kòrsou, di esei no tin duda. E indikadónan ekonómiko tur ta duna señal di kresementu. Di parti di invershonistanan institushonal, tin un disponibilidat pa hasi invershon. Sektor di turismo lo sigui krese, miéntras ku sektor finansiero ta mustra señal di kresementu despues di añanan di redukshon. Esaki, ounke e kantidat di kuponan di trabou den e sektor aki lo bira ménos. Gobièrnunan, a debí na e eliminashon parsial di debe nashonal, tin mas sèn pa invertí den sektor sosial, miéntras tin sèn tambe pa invertí den loke a haña e nòmber di “inisiativa sosial-ekonómiko”.

Score: 9.0, Votes: 1

Historia ta ripití

Fri, 23 Nov 2007 18:47:02 -0800

Un filósofo anónimo a yega di bisa: “Historia ta ripití, pasobra e promé biaha nos no a presta atenshon”. Tin tur indikashon ku e referèndem ku dia 2 di desèmber próksimo tei tuma lugá na Venezuela, di un forma definitivo lo dividí e pais den dos kampo: e kampo pro Chávez i e kampo kontra dje. Ta inkonsekuente pa na e alturanan aki pèrdè tempu ku definishon den ken ta pro Chávez i definishon di esnan kontra Chávez. Echo ku e divishon aki lo kousa un huida masal di kapital i un eksodo masivo di hende for di Venezuela. No laga nos pèrdè for di bista ku si ratifiká e konstitushon nobo di nos pais bisiña, dentro di poko e konsepto “propiedat privá” lo haña henteramente un otro nifikashon ku esun ku nos konosé. Hasi negoshi a base di prinsipionan kapitalista lo pasa pa historia, miéntras ku e konsepto liberal di “merkado” lo disparsé kompletamente. Chávez lo bai usa e rekurso prinsipal di Venezuela, su petroli, komo arma polítiko den su lucha kontra Merka, miéntras ku den aliansa ku paisnan manera Iran, lo bai konstruí e promé reaktor nuklear riba suela latinoamerikano. Motibunan de sobra pa un ola di eksilado.

Nada straño pa e islanan antiano dilanti kosta di Venezuela. Atraves di tempu, sea fòrsá òf boluntariamente, e islanan a sirbi komo huéspet pa míles di venezolano ku temporalmente a bandoná nan pais pa motibunan polítiko. Kuminsando den siglo 19, ku Kòrsou siendo huéspet di e rumannan muhé di libertador Simon Bolívar, di e libertador mes i despues, den siglo 20, di luminarionan polítiko manera Romulo Bethancourt, un di e pilanan prinsipal di demokrasia venesolano, sea Chávez gusta òf no. Huntu ku e famosonan aki, míles di otro ménos famoso mas, kende nos a aseptá ku brasa habrí i yen di generosidat riba nos islanan.

Score: 8.5, Votes: 2

Pedro, Pedro, Pedro...

Thu, 15 Nov 2007 18:49:26 -0800

Mi kier men, kon mal polítiko bo por ta? Kuantu falta di diplomasia i táktika bo por tin, pa bini te den sala di parlamento di un pais, bin kere ku bo por ofendé lider di gobernashon di e pais aki? Wèl, e “aparishon” di Pedro Atacho den sala di parlamento di Aruba e siman aki, mas ku tur kos, a hiba e relashon entre Aruba i Antia bèk den e era pre-status aparte. E era di tenshon, malkomprendementu, ofensa di un banda pa otro i simplemente terkedat.

Pa bini te den sala di parlamento di Aruba bin eksigí di parlamento arubano pa deklará ku nan ta para tras di deklarashonnan di promé minister Nelson Oduber enkuanto Aruba su sosten na e proseso di restrukturashon estatal di Antia ta muestra ku Pedro Atacho tin ainda hopi di siña. Hopi di siña pa loke ta táktika polítiko, diplomasia, reglanan parlamentario básiko i simplemente, desensia. Pero na mes momento, e aktitut di Pedro Atacho no mester bini komo sorpresa pa niun hende. Ta kiko bo por spera di un eks polis?

Dor di deklará ku Kòrsou i Antia hamas a stroba e lucha pa status aparte di Aruba ta otro muestra ku Pedro Atacho tin konosementu ètòl di historia moderno di nos reino. Promé di a habri su boka i grita pistolada, lo tabata bon si Pedro Atacho a puntra fundador i eks lider polítiko di PAR, Miguel Pourier, pa refreská su memoria un tiki. Miguel por a konta Atacho kon for di 1973 ku Betico Croes (qepd) i su Movemento Electoral di Pueblo a surgi, kon sistemátikamente polítikonan di Kòrsou a bòikotiá nan lucha pa un status outónomo den reino. Miguel por a kòrda Atacho di ekspreshonnan manera “6 – 1 = 0”. Òf di e remarke infame di Juancho Evertsz na 1976, aña ku Aruba a desvelá pa promé biaha su bandera: “ku e tim di futbòl Centro Barber mes tin un bandera, kiko ta para pa Aruba”. Miguel por a konta Pedro Atacho tambe di e situashon dramátiko di 1977, tempu ku Boy Rozendal (qepd) a forma gobièrnu ku e partido minoritario PPA, lagando MEP afó ku a gana elekshon di forma abrumador. Miguel por a konta Atacho kuantu odio e desishon deskabeyá di Boy Rozendal pa manda 85 polis yu di Kòrsou bai marcha riba L.G. Smith Boulevard a kousa. Odio ku te dia djawe ta bibu bibu serka masha hopi hende aki na Aruba. Pedro, gustosamente mi ke referíbu na e buki skibí pa profesor Gert Oostindie “Het Nederlandse dekolonisatiebeleid in de Caraïben, 1940-2000”

Score: 8.0, Votes: 1

Ta ken ta kondusí e trein?

Thu, 08 Nov 2007 21:14:24 -0800

E dianan ku ta tras di lomba a bira bisto pa tur hende ku e proseso di restrukturashon estatal ta muchu mas sebu ku mecha. Esun ku a interpretá tur e loke sekretario di Estado, Ank Blijleveld a deklará den e dianan ta yega na e konklushon ku henter e proseso aki ta manera ulandesnan ta bisa “beklonken” i ku finalmente pueblo di e islanan di Antia mester guli manda abou loke for di 2 di novèmber 2006 a kumbiní na Spaanse Hof, Den Haag. Asuntu di “konferensha di mesa rondó”, “ratifikashon den Konseho Insular” pa despues bai “referèndem” mas i mas ta mustra di ta un “sprookje”, pa usa un palabra ulandes atrobe.

E korant Amigoe a informá resientemente: “Curaçao wil, zoals onlangs door gedeputeerde Zita Jesus-Leito (Constitutionele Zaken, PAR) is bevestigd, nadat definitieve overeenstemming is bereikt in een Ronde Tafel Conferentie, dat het besluit ter stemming wordt gebracht in de Eilandsraad. Vervolgens zal er een referendum worden georganiseerd. Bijleveld: “Ik weet dat het in de procedure mag, maar wist niet dat ze er al een besluit over genomen hadden. Ik ben benieuwd. We zullen deze week horen hoe ze dat voor ogen hebben en of ze dat volhouden. Ik ben zelf in de algemeenheid niet zo voor referenda, maar ik treed daar niet in.” Figurabo! Mas arogante un mandatario ulandes no por ta i nunka tabata! Pero mas di esei despues.

Lagami ratifiká ku personalmente mi no ta kontra e loke a palabra i formulá den e asina yamá “slotakkoord” di 2 di novèmber 2006. Al kontrario. Mi ta kere ku a kambio di mekanismonan di kòntròl rígido, polítikonan di Kòrsou mester a bai di akuerdo ku apsolushon kompleto di e debe, en bes di un parti so. Finalmente nos a keda ku un debe, pero ku mekanismonan di kòntròl mes rígido ku si a kanselá esaki pa 100%. Pero, den tur pais demokrátiko, ta e pueblo ta esun ku finalmente mester skohe. Ta imposibel pa un grupo di presunto eksperto, kompañá pa algun mandatario/polítiko i algun ámtenar por tuma desishonnan di asina tantu trasendensia, sin ku pueblo mes ta haña e oportunidat pa ratifiká esakinan òf laga.

Score: 9.0, Votes: 1