Laprensa Newspaper - Polisial

Kòrsou e promé lugá na mundu di Freeman Group pa training di polis i hustisia

Sat, 04 Oct 2008 20:15:16 -0700

WILLEMSTAD - Ayera na Landelijk Politie Opleidingsinstituut (LPO) tabatin entrega di sertifikado na sinku dosente di LPO ku a pasa e kurso di edukadó di e programa Promises in the Justice Area ku éksito. E sinku dosentenan aki a sigui e kurso ariba menshoná den luna di ougùstùs 2008. E grupo Merikano Freeman a forma e sinku dosentenan usando e sistema di Train the Trainers. Fin di sèptèmber i komienso di e luna aki e sinku dosentenan a pasa eksamen den presensia di trainernan di Freeman Group. Ta trata aki di dosentenan, sra. Josiane Janzen, Humberto Gonzales, Gumersindo Mercera, Gilbert Benita i Edward Margarita.
Durante eksamen a dosente mester duna training na trahadónan di SKS, Duana, Kustwacht i naturalmente Polis. E kursistanan di e kuerponan menshoná tambe a risibí sertifikado.
E kurso ku e 5 dosentenan di LPO a sigui ta konsistí di tantu teoria, komo práktika. E partisipantenan lo siña abilidatnan spesífiko ku nan mester pa na nan turno nan por duna instrukshon na otronan. Kada partisipante ta haña 60 dia pa e kompletá su preparashon final i akordá un fecha ku e instruktor di Freeman Group pa e duna su presentashon final. Nivel di abilidat di kada studiante lo keda evaluá durante su presentashon final i e instruktor lo determiná si e studiante mester di training adishonal pa keda sertifiká komo treindó òf si e ta kumpli ku e eksigensianan. Den kaso ku e studiante ta kumpli ku e eksigensianan di Freeman Group, esaki lo sertifiká e studiante komo treindó i lo e keda inskribí komo tal den nan archivo.

Score: 0.0, Votes: 0

Kuater hubilario na Landelijk Politie Opleidingsinstituut

Sat, 04 Oct 2008 06:01:01 -0700

WILLEMSTAD - Resientemente kuater kolega na LPO a keda honrá debí ku nan a kumpli 25 aña di servisio. Ta trata aki di koleganan Ronald Gosepa, Marlon Sillé, Jeffrey Martina i Edward Margarita.
Ronald Gosepa ta traha komo Chef Kok na LPO i tin 25 aña den e trabou na kushina di LPO.
Marlon Sillé ta alto inspektor i ‘Chef Specialistische Opleidingen en Leiderschapstrajecten i tin 25 aña den Kuerpo Polisial di Antia Ulandes. Marlon Sillé a traha hopi aña na Kuerpo Polisial Isla riba. Jeffrey Martina tambe a kumpli 25 aña den servisio di KPNA, Jeffrey Martina ta dosente i alabes enkargá ku Relashon Públiko na LPO. Jeffrey a traha 20 aña na Kuerpo Polisial Kòrsou. Edward Margarita ta dosente di Opleidingnan Spesialisá na LPO. Margarita tin un aña na LPO despues di a traha 24 aña na Kuerpo Polisial Kòrsou, di kual 21 na Departamentu di Tráfiko.
Durante un seremonia den presensia di koleganan den formashon i demas koleganan, direktor di LPO na nòmber di Gobièrnu di Antia a entregá e dekretonan Gubernamental i di Rekonosimentu na koleganan ariba menshoná.
Direktor di LPO i a gradisí e hubilarionan pa nan añanan di servisio na Kuerpo Polisial (LPO) en partikular i pueblo di Kòrsou i Antia en general. Tambe direktor a repasá e karera di e dos koleganan aki.
E hubilarionan a dirigí palabra i gradisí Dios, famia i koleganan ku a kontribuí pa nan por a traha tantu aña asina na bienestar di komunidat. Nan a konta algun momentu di nan karera.

Score: 0.0, Votes: 0

Dor di papia di detenshon na lugá di kaso solushoná; Polis ta manipulá ku datonan di asesinato

Tue, 30 Sep 2008 15:52:26 -0700

WILLEMSTAD – Kuerpo Polisial a krea e impreshon ku e ta solushonando mayoria kaso di asesinato kometé e aña akí. Durante un konferensha di prensa ayera, e polisnan ku a presentá a papia di detenshonnan ku polis a hasi den kasonan di asesinato sin menshoná ku entretantu a laga diferente di e sospechosonan bai.
E konferensha di prensa tabata pa informá tokante di sifranan di krímen ku polis a registrá e aña akí. Durante presentashon di e sifranan di asesinato, tabatin un ilustrashon ku ta indiká den un kolòm, si a detené un sospechoso relashoná ku e kaso. Riba e ilustrashon por a mira e diesinku kasonan di asesinato e aña akí, di kua tras di dies di nan tabatin skibí ‘ja’ den e kolòm ‘detenshon’. Esaki pa indiká ku den e kaso spesífiko a detené un sospechoso. Riba promé bista esaki ta krea e impreshon ku den dos tersera parti di e kasonan polis tabatin éksito ku nan investigashon. Sinembargo polis a keda sin bisa ku entretantu a laga diferente di e sospechosonan ku tabata detené bai kas.
Un rekuento ku LA PRENSA mes a hasi ta indiká ku aktualmente tin sospechosonan detené relashoná ku solamente seis di e diesinku kasonan i no dies di e diesinku kasonan manera polis kier a laga parse ayera. Den dos kaso Ministerio Públiko mester a laga e sospechoso bai pa falta di prueba i den un kaso wes no a sentensiá un sospechoso. Esaki ta nifiká ku den nuebe di e diesinku kasonan polis no tabatin éksito den su investigashonnan. Ta remarkabel ku polis a skohe pa papia di ‘detenshon’ na lugá di ‘kaso solushoná’. Un sospechoso detené no ta garantia ku e kaso ta solushoná.

Score: 2.0, Votes: 1

Kaso di menasa di morto investigá pa Ministerio Públiko: Famia Ferero ta bolbe gana kaso den korte kontra esnan ku no ke paga

Tue, 30 Sep 2008 15:46:08 -0700

WILLEMSTAD – Ministerio Públiko ta investigando menasa di morto kontra di Richard Ferero riba ken ta doño di Gato Malpais, tambe resientemente tin un kaso den Korte di Apelashon ku Famia Ferero a kaba di gana kontra esnan ku ta ninga di paga hür di parselanan.
Famia Ferero a gana un kaso den Korte Apelashon kontra algun famia ku a ninga di paga hür di parsela den Gato Malpais. Un kaso den korte dia 23 sèptèmber último a disidí, ku famianan Tamaris Isei, Jose Winedt, Astrea Emerenciana i Silvio Isei a dikta sentensia ku tur e personanan aki menshoná ta obligá na paga famia Ferero pa uso di e perselanan . Esaki ta enserá tambe, ku tur usuario ku òf sin kontrakt ku famia Ferero tin deber di hasi nan pago na famia Ferero. Esaki ta konfirmá un biaha mas, ku e kontrakt di famia Ferero ta legal.
Manera por kòrda ku dia 23 òktober 2007 e vonnis di Korte di Apelashon 362/07 públikamente a deklará ku Pietersz c.s. (18 Pietersznan di Fil Pietersz) no a bira doñonan di Malpais Plantage Gato i nan a disidí di bai Cassatie, pero echo ku nan a bai Cassatie no ta hasi nan doño. Den e kaso aki Pietersz a keda rechasá.
Esaki a pone ku tin vários persona ku ta biba riba tereno di Malpais Gato, a disidí di no paga hür di parsela na famia Ferero, pero ta sigui atendé ku Pietersz. Motibu pa kua tabatin un kaso den korte ku nan mester paga famia Ferrero, hasiendo ku nan tin mas gastu pa kumpli. Famia Ferero ta avisá tur usuarionan di parselanan riba Malpais Gato pa tuma bon nota di e sentensia i ku esnan ku no ke atendé ku nan, tin ku atendé ku korte pa esaki. Gastunan pa usuario lo ta pa nan kuenta.

Score: 0.0, Votes: 0

Habitantenan di Jongbloed ta man na kabes: Ladronnan a oumentá nan operashon di hòrtamentu di pipa di awa!

Tue, 30 Sep 2008 15:44:59 -0700

WILLEMSTAD – Habitantenan di Jongbloed, prinsipalmente esnan den Ledaweg i Casandraweg, pa simannan largu ta sufriendo na man di ladronnan ku ta hòrta pipanan di awa. Habitantenan tin vários siman ta lanta mainta sin nan pipa di awa, ya ku ladronnan ta drenta den kurá i ta kòrta nan pipa di awa. Tin vários di e kaso ku polisnan mester a sali den oranan di mardugá pa atendé di e tipo di ladronisia aki. Te ku awe ainda tin habitantenan di e área aki a lanta mainta sin nan pipanan di awa i konsekuentemente ta perhudiká esnan ku mester bai skol i trabou.
Tin di e kasonan aki no ta kai spesífikamente pa Aqualectra, pero siman pasá tabatin un kaso, den kua e ladronnan aki a kòrta te asta e parti ku ta bai promé ku e meter, lagando awa ta basha den kaya aki. LA PRENSA mes tabata testigu den oranan di awe mainta di un famia ku a lanta sin nan pipa di awa, perhudikando e famia aki. E ladronnan ta operando den vários barionan di Kòrsou hòrtando e pipanan di koper pa bai bende ku negoshinan ku ta kumpra koper i aluminio bieu pa bende den eksterior.
E modus operandus aki ta, ku e ladronnan ta kòrta e pipa despues di e meter di Aqualectra sakando esaki for di bou di tera pa bai ku esaki. Den nan operashon ta laga otro destrukshon atras ku no ta únikamente e pipa. Den e kaso di e kas di awe mardugá, kibra asta e filter ku tin pegá na e pipa, lagando esaki bentá un banda. Tur e kasonan aki polis a presentá, sin por hasi masha. Segun informashonnan ku LA PRENSA a risibí tin mas ku 1 luna kaba ku ta operando den e besindario di Jongbloed, ya ku tur dia habitantenan ta lanta sin awa, pa despues deskubrí ku ta nan pipa a kòrta.

Score: 4.0, Votes: 2

Den akshon grandi awe mardugá riba Nieuwe Haven; Polis a konfiská 57 outo ku no tabatin nan dokumentunan

Mon, 29 Sep 2008 19:38:22 -0700

WILLEMSTAD – Un biaha mas outoridatnan a haña nan ta aktua den oranan di mardugá kontra pustamentu ilegal i ponementu di ‘fever’ na Nieuwe Haven. Pa simannan largu tin reklamo riba e fenómeno aki i anke polis a aktua den pasado, e aktividat a stòp un tempu pa despues bolbe sigui den tur intensidat.
Awe mardugá polis a disidí pa aktua den e situashon aki ku opviamente ta enserá un peliger no solamente pa esnan ku ta pone ‘fever’ i pusta outo, pero tambe pa e kantidat grandi di hende ku ta aglomerá na e sitio.
Den kareda di mitar di 1, outoridatnan a presentá na e sitio i nan a sera henter e ruta di Koninginsplein (Zona Liber) te na e e krusada Rijkseenheidboulevard na altura di Fokkerweg. Niun outo no por a sali ni drenta riba e kaya aki.
E total polis a kontrolá 162 outo. For di nan a resultá ku 57 no tabatin e papelnan nesesario. Diferente di nan tabatin felmnan pretu, loke ta prohibí pa lei. Polis a pone nan kita e felmnan aki i hopi di e outomobilistanan a laga nan tira abou riba kaya.
Di e kantidat di 57 outo ku no tabatin e papelnan nesesario, polis a bai ku 13 pa hiba Kurá. Algun di e outonan no tabatin papel di seguro.
E akshon di polis a kaba den kareda di mitar di 7. Esei a trese ku ne ku hopi hende ku a lanta pa bai traha òf hiba nan yunan skol no por a pasa den e área aki. Algun di nan a reklamá públikamente. Esei un biaha mas a pone outoridatnan dilanti di e dilema ku e mesun komunidat ku ta pidi pa mas kòntròl i sanshon, na momentu ku esei tuma lugá ta bisa ku no por. “Nos lo sigui sinembargo hasi nos trabou”, asina un bosero di polis a bisa.

Score: 0.0, Votes: 0

Interkambio di informashon di estudio Polisial entre LPO i Kuerpo Polisial di Ecuador

Fri, 26 Sep 2008 16:54:27 -0700

WILLEMSTAD - Resientemente 56 kolega di Kuerpo Polisial di Ecuador a hasi un bishita di trabou na Landelijk Politie Opleidingsinstituut (LPO).
E koleganan di Ecuador a interkambiá informashon ku LPO den kuadro di formashon polisial.
LPO a duna un presentashon amplio pa loke ta trata e estudio i kursonan ku LPO ta duna na Kuerponan Polisial i otro kuerpo i entidatnan enkargá ku kombatimentu di kriminalidat.
Kuerpo Polisial di Ecuador enkabesá pa Teniente Coronel Cardenas tambe a duna un presentashon.
Den futuro por spera mas interkambio i koperashon entre Kuerpo Polisial di Ecuador i LPO.
Riba e foto, direktor di LPO sra. Falbru ta risibí un regalo di teniente Coronel Cardenas despues di e enkuentro di informashon.
Tambe koleganan di LPO i Kuerpo Polisial di Ecuador despues di e enkuentro na kantine di LPO.

Score: 7.0, Votes: 1

Dor ku siudadanonan ta yama polis via number anónimo; Kada 14 minüt ta solushoná un krímen mundialmente

Thu, 25 Sep 2008 17:47:45 -0700

WILLEMSTAD – Tepnan anónimo via numbernan di telefòn pa polis, ta sòru ku kada 14 minüt un kaminda na mundu ta solushoná un krímen. Esaki Stichting M a informá. E fundashon (Meld Misdaad Anoniem) ta miembro di e organisashon Crime Stoppers.
Crime Stoppers a lanta 32 aña pasá na Merka. E mesun aña a solushoná e promé asesinato danki na un tep anónimo. For di e tempu ei a logra detené kasi 750 mil sospechoso dor di tepnan anónimo. Tepnan di siudadanonan ulandes a kontribuí grandemente na e éksito akí.
Akí na Kòrsou tin hopi reserva serka siudadanonan pa hasi uso di e number anónimo 108. Konstantemente por tende e reklamo ku e siudadano no tin garantia ku nan yamada ta keda anónimo. Siudadanonan ta bisa, ku nan no tin garantia tampoko ku polis no ta registrá nan number via e sistema di ‘atami’. Polis mes tampoko nunka a duna un relato di e kantidat di yamadanan ku ta drenta via 108. Tampoko polis a yega di duna un relato di kuantu kaso el a solushoná dor di tepnan anónimo ku el a risibí serka siudadanonan.

Score: 0.0, Votes: 0

E kaso ta hopi misterioso: Marlies van der Kouwe posiblemente a ser asesiná?

Wed, 24 Sep 2008 19:22:23 -0700

WILLEMSTAD /KRALENDIJK - Polis ta tene kuenta seriamente ku posiblemente a asesiná e damita ulandes Marlies van der Kouwe. Komo ku no a haña su kurpa ainda, ofisialmente polis ta tene kuenta ku ta trata aki di un kaso di sekuestro. Outoridatnan a monta un akshon grandi di búskeda di e damita ulandes aki, kende for di fin di siman a disparsé den forma misterioso.
Marlies van der Kouwe a disparsé, despues di tabata na un fiesta ku amigunan na playa, na Karens Beach.
Segun un miembro di kuerpo di siguridat ku ta vigilá e sitio, el a mira Van der Kouwe subi su baiskel i kue rumbo nort, direkshon di e bario Hato. E ora ei tabatin mitar di dos di mardugá di djadumingu. Djadumingu mainta, a haña su baiskel i su dos sandalianan. Segun testigunan, ta dos hòmber riba un skuter a sigui e damita aki i na altura di e kompania di awa i koriente di Boneiru WEB, un hòmber di estatura haltu lo a ranka e damita ku violensia for di su baiskel i a bai kuné.
Un vigilante di WEB a bisa polis, ku el a tende un gritu den oranan di mardugá.
Entretantu a haña e skuter bentá den mondi. Un investigashon na Karens Beach a trese na kla ku Marlies van der Kouwe no a bebe nada di alkohòl e anochi ei.
Marlies van der Kouwe a nase na Kòrsou, pero a pasa henter su hubentut na Ulanda. Fiskal David van Delft, mesora a akshoná i a pidi pa refuerso for di Ulanda i Kòrsou. Entretantu un tim di 18 agente polisial konsistiendo di agentenan ulandes i antiano a yega Boneiru pa kuminsá ku e investigashon nesesario.

Score: 6.0, Votes: 1

Despues di a haña tep tokante arma; Polis ta bolbe bai Scholen Gemeenschap Parera

Wed, 24 Sep 2008 19:17:05 -0700

WILLEMSTAD – Un biaha mas polis mester a bai Scholengemeenschap Parera pa investigá posibel presensia di arma di kandela. Anteriormente polisnan di 0-Toleransia tambe a akudí na e skol relashoná ku droga i otro problemanan ku alumno.
E akshon di awe mainta tabata dirigí pa reshèrshi. Despues di a haña un tep ku na e skol lo tin un òf mas alumno ku arma di kandela, e efektivonan di polis a sera e skol hermétikamente pa a listra tur klas. Sinembargo no a lokalisá niun arma di kandela. Den pasado polis a bai e skol pa vários insidente. Tabatin problema ku alumnonan ku tabata kousa molèster i tambe hóbennan ku tabata bai ku outo i motosaikel i para dilanti di e skol. Polisnan di 0-Toleransia a yega di tene diferente akshon kaminda a listra tantu hóbennan di e skol komo hóbennan pafó di kurá di skol ku tabatin droga den nan poseshon.
E skol ku ofisialmente yama Amador Nita Mavo, pa algun tempu kaba ta forma parti di Scholengemeenschap Parera. Den un intento pa haña konfirmashon di loke a pasa awe mainta, LA PRENSA a haña un trato telefóniko hopi ònbeskòp di un hòmber ku a identifiká su mes komo kònsèrzje di e skol. Na momentu ku LA PRENSA a pidi pa papia ku un persona outorisá, e kònsèrzje a kontestá ku no tin mester. Seguidamente el a sera e telefòn. Konsekuentemente no tin un komentario ofisial di parti di e skol.

Score: 0.0, Votes: 0

Landsrecherche lo determiná si tin un kaso kriminal kontra di Smart-Berkel

Wed, 24 Sep 2008 19:01:36 -0700

WILLEMSTAD – Fiskal Giselle Veen-Jonckhout a konfirmá, ku Landsrecherche ta enkargá awor aki pa hasi un investigashon mas profundo pa determiná si tin base pa un investigashon kriminal kontra di Sekretario di Estado Joan Smart-Berkel.
Prokurador General, Gilbert Joubert a risibí e rapòrt ku SOAB a finalisá tokante e revelashon di un kaso di froude ku a deskubrí na Registro Sivil na St. Maarten i supuesto embolbimentu di Smart-Berkel.
Smart-Berkel tabata trahando na Registro Sivil, ora ku iregularidatnan a keda deskubrí einan na 2004-2005 relashoná ku otorgamentu di pasport. Reportadamente ta trata aki di un montante di 50 mil florin. A puntr’é pa bandoná trabou mesora i a neng’é entrada na e edifisio.
Siman pasá promé minister di Antia, Emily de Jongh-Elhage a pidi Joan Smart-Berkel pa hala un banda i asina krea espasio pa un investigashon por tuma lugá. “Mi mester bisa, ku no tin niun prueba ainda ku e ta kulpabel. Anto mi ta bisa, ku si resultá ku e no ta den nada, semper e por bini bèk,” asina e promé minister di Antia a bisa komo su reakshon riba loke a sosodé.
Siman pasá Smart-Berkel no a bai Kòrsou pa reunion di Konseho di Minister, bisando ku e tabata malu. Ayera tambe el a kanselá un reunion ku e tabatin den Komishon Sentral.
Presidente di Parlamentu, Pedro Atacho a indiká, ku el a risibí un karta di e Sekretario di Estado den kual e ta indiká, ku pa motibunan for di su alkanse e no por ta presente na e reunion. Ta trata di un reunion riba ADC.

Score: 0.0, Votes: 0

Prezu ku kastigu di bida largu asesiná den Bon Futuro!

Tue, 23 Sep 2008 21:11:11 -0700

WILLEMSTAD – Outoridatnan a konfirmá awe mainta ku den un kaso di tiramentu ku tabatin den Bon Futuro un prezu a resultá morto. Ta trata di Cornelis Walker nasé na Sint Maarten. E tabata sintando un kastigu di bida largu den e instituto.
Bosero di prizòn Aldino Schoop a konfirmá e kaso ku a kousa tenshon den e instituto despues ku ya kaba den último dianan e instituto a pasa den kasonan di huida i intento di huida. Siman pasá un prezu a hui i te awe no a tende mas di dje. Investigashonnan ku a kuminsá mes ora te ainda no a duna klaridat kon e huida por a tuma lugá. Den fin di siman tabatin mas prezu ku a trata di hui for di e instituto.
Informashonnan ku LA PRENSA a haña ta hasi menshon ku e prezu asesiná a haña 5 bala. El a muri mesora. Ken eksaktamente tabata esun ku a tira no tabata konosí mesora. Loke si LA PRENSA a komprondé ta, ku pa algun dia kaba tabatin vershon di un arma ku ta sirkulá den prizòn. Outoridatnan den prizòn tabata buskando e arma aki.
E hòmber Cornelis Walker ku ya kaba tabatin un reputashon notorio, a hasi su mes konosí den e instituto kaminda aparentemente el a forma su mes gèng. Outoridatnan tin sospecho ku ta e formamentu di e dos gèngnan aki tin di aber ku e kaso di asesinato ku tabatin awe mainta.
Despues di kaso un waha di un empresa funerario (irónikamente e mesun ku anteriormente e aña aki a buska un otro detenido asesiná), a presentá na Bon Futuro pa rekohé e prezu asesiná. E kaso ta den investigashon. Riba e pòtrèt por mira e momentu ku e empresa funerario tabata sali ku e defuntu for di e instituto.

Score: 6.0, Votes: 1

Redada na Tortolaweg

Fri, 12 Sep 2008 18:13:34 -0700

WILLEMSTAD – E polisnan ku ta hiba e maneho di 0-Toleransia a bai awe mainta na un kas den Tortolaweg. No ta konosí kiko eksaktamente tabata motibu di e mobilisashon. Ora nan a yega na e sitio, nan a listra den kas i tambe den dos kònteiner ku tabata den e kurá di kas. Informashonnan no konfirmá pa polis ta indiká ku a lokalisá algun bala pa arma di kandela. No ta konosí si tabatin detenshon den e kaso akí ni tampoko si tabatin hende na e kas. Durante e listramentu a hasi uso di e kachó di polis ku ta detektá droga. Polis tin tambe un kachó ku nan ta usa ora tin ku detektá presensia di arma di kandela. Ultimamente a hasi uso di e kachónan akí na vários okashon i ku éksito. Manera a kustumbrá kaba ora 0-Toleransia ta bou di guia di e polis Abrahamz, awe atrobe el a sera e sitio pa fotógrafonan prensa, riba un distansia hopi grandi.

Score: 6.0, Votes: 1

Durante kòntròlnan preventivo e aña akí; Debidamente a konfiská arma durante akshon di OM

Fri, 12 Sep 2008 18:04:02 -0700

WILLEMSTAD – Durante e akshon “Clean Up Saliña” ku Ministerio Públiko a tene den mardugá di 19 pa 20 di yanüari e aña akí, a konfiská 5 arma di kandela di kua un rifel pa yag. Tambe a konfiská 12 kuchú i 25 bala pa arma di kandela.
Den e artíkulo riba portada di LA PRENSA di ayera tabatin algu skibí di e kòntròlnan preventivo ku Ministerio Públiko a tene na 2006 i 2007. Por a lesa ku durante e kòntròlnan kondusí dor di un arsenal di funshonario polisial i hudisial no a haña arma di kandela. Sinembargo e artíkulo no a menshoná e úniko akshon di e aña akí ku a tuma lugá na yanüari. E akshon di yanüari tabata dirigí prinsipalmente riba poseshon di arma di kandela ilegal, arma blanku i droga. Ministerio Públiko huntu ku Marrechaussee, Polis, SKS, VKC, Duana, Wardakosta, Marina Real i Kuerpo di Bombero a partisipá na e akshon i segun O.M. e tabata eksitoso.
Durante e akshonnan di 2006 i 2007 a sera e barionan, kaminda e akshon a tuma lugá hermétikamente i a kontrolá tur hende ku kier a drenta òf sali for di e área. A kontrolá entre otro na Brievengat, Seru Papaya, Saliña (2x), Skalo, Koraal Tabak. Pa kita e impreshon ku ta sierto bario so a kontrolá, O.M. a deklará dado momentu: “E barionan ku ta skohe pa tene kòntròl preventivo, ta barionan kaminda sa tin tiramentu, lòsmentu di bala den laira i bendementu di droga. E informashon aki ta bin di Kuerpo Polisial ku ta hasi nan investigashon profundo promé ku nan konsehá Ministerio Públiko. Ta a base di informashon di Polis, Ministerio Públiko ta disidí pa tene un kòntròl den un sierto bario.”

Score: 6.0, Votes: 1

Entretantu polis no ta buskando mas; Candida ‘Elsie’ Gaari tin 11 dia pèrdí

Sat, 06 Sep 2008 11:10:58 -0700

WILLEMSTAD – E dama di 69 aña di edat, Candida ‘Elsie’ Gaari, ku a pèrdè dia 29 di ougùstùs último ta pèrdí ainda. Despues di un búskeda intenso kaminda a envolví asta militarnan, polis ya no ta buskando e dama mas.
Gaari a sali su kas na Kaya Nubia 42 dia 26 di ougùstùs último i no a regresá mas. E tabatin un bata bistí ku diseño di dos prikichi i e palabra Kòrsou. Tambe e tabatin un tas na su man. Mainta ora el a sali su kas, un bisiña a mir’é ta kana den Seru Fortuna. Un subrina di dje a mir’é mas lat te den Kurá Pieda pero no a nota nada partikular i a sigui kore. Tin indikashon ku e tabata puntra kaminda pa yega dòkter. Probablemente e tabata un poko konfundí e mainta ei. Nunka e no sa sali kas sin regresá. Ora e sali mes, ta mainta tempran i semper ora e ta na kas e ta sera su kurpa den kas.
Elsie Gaari ta un dama di mas o ménos 1.50m di haltura i su kurpa ta delegá. E tin kabei shinishi/ blanku peñá den un flègtu ku ta yega te na su skouder. E dia ei e tabatin su kabes mará. Si kualke hende tin informashon di e dama, por yama 561.1861 òf 911.

Score: 4.0, Votes: 1