Laprensa Newspaper - Kolumna Notabel

Hòmber di misa

Mon, 25 Aug 2008 15:03:10 -0700

Komo hende ku ta bon pilá di misa, hòmber kasá, ku bon trabou, representativo, faltando tres aña pa baha ku penshun, kulto i eduká, e ta hopi respetá pa tur ku konosé.
Algun ten pasá el a topa ku un hende muhé ku a pon’é realisá ku ta esaki ta esun di bèrdat ku semper el a warda riba dje. Impakto di e enkuentro tabata di tal forma ku el a divorsiá su kasá pa por a bai biba felis manera e tabatin sigur ku e lo bai bira. Pero e dama inspirante aki aparentemente a kambia di idea despues di su divorsio, kibra kuné i sak’é di tur forma posibel kompletamente for di su bida.

Na momentu ku el a kontami kiko a pas’é i konosiendo e, mi no a komprond’é mesora kiko e tabata ke men.
‘Abo a brua’, mi a bis’é, ‘ta kiko a pasabu?’
‘Mi no sa’, tabata su kontesta. Mi a keda wak e.
‘Ami a kere semper ku ta na hóben e kosnan ei ta pasa un hende na tinu’, mi a bis’é. ‘E mester a dunabu algu bebe òf di kome’.
‘Esei mi kasá tambe a bisami’, el a kontestá.
‘Bo èks kasá’, mi a bis’é i mi a kuminsá hari. E kos aki tabata manera un chiste, segun mas mi tabata skucha for di su mes boka detayenan di loke e mes a hinka su kurpa aden.
Pero pa e, esaki no tabata algu chistoso den niun forma.
Su bida a kambia. Kasi bahando ku penshun el a bira depresivo di tal forma ku e no por a bai traha manera ántes i a kuminsá traha mitar dia.

Score: 0.0, Votes: 0

Un kòmbersashon inesperá

Mon, 18 Aug 2008 18:40:20 -0700

“Mi ta wak”, Tula a bisami, “nunka mi no a kita mi kara”.
“Pero dikon anto”, mi a puntr’é.
“Bo mes sa”, el a kontestá.
“Kon bo ta analisá e asuntu di ayera”, mi a puntr’é.
“Tur dos tin rason”, Tula a kontestá, “Tur dos tin bon intenshon”.
“Abo tambe tabatin rason”, mi a bisa “I bo no a sobreviví”.
Tula a hari.
“No ta rason ta pone ku bo ta tuma mihó akshon. Si bo ta konvensí i ta aktua simplemente for di bo úniko konosementu i referensia, tin chèns ku bo resultado ta unu di limitashon”.
“Ta p’esei nos hendenan no ta uní ku otro”, mi a remarká, “Ta p’esei ta parse ku kada un a kue na mes momentu un otro kaminda loke a konfundí esnan ku ta konvensí di bo esfuerso i ku ta kere ketu bai den bo lucha pero ku no sa kiko kere mas aden awor. Abo no ta sinti ku ke a pone un mancha riba bo konmemorashon”?
“Nòòò pakiko”, Tula a puntra, “Boso no ta papia ku otro, boso no ta komuniká na drechi, kon bo ta kere ku por komprondé otro si no ta hasi uso di e forma di mas básiko humano pa yega na entendimentu? Kada biaha ku mi mira kon boso ta papia fe sla ku otro, sin rèspèt, hasi redu pa daña imágen di otro, sin komprondé kiko ta pasando ku bo mes i ku esun òf esnan na kua bo ta dirigí bo, mi sa ku ta pa falta di sa mihó esei ta sosodé. Te asta pa falta di ke hasi mihó. Mi ta komprondé esei si”, Tula a trata na konvensémi. “Den nos lucha tambe tabatin hende di nos mes ku tabata duda ku nos lucha tabata e mihó kos pa hasi”.

Score: 0.0, Votes: 0

Tula wak numa

Mon, 11 Aug 2008 20:21:45 -0700

Por wak dilanti pa progreso den bida si bo ta konsiente di kiko tabatin den bo pasado. Si bo por rekonosé ku kiko bo ta bayendo dilanti. I prinsipalmente si bo por komprondé i a siña di loke bo ta hibando ku bo. Esaki ta konta sin mas pa tur hende den nos komunidat sin hasi distinshon di ki gremio nan ta, ki rasa, ki religion òf kuantu tempu nan tin na Kòrsou.

Kiko nos huntu a siña i ta siñando di e dékadanan ku ta tras di lomba, kaminda a bira aseptabel, tolerabel i posibel pa por para ketu na konmemorashon di lantamentu di katibunan dia 17 di ougùstùs 1795?
Tin hopi rason (komprendibel òf no i sigur diskutibel) ku asta hende desendiente di Tula no ta(bata) kómodo ku e echo ku ta duna atenshon na un tópiko asina doloroso i ku no ta duna rason pa ta orguyoso di un aspekto di nos historia. Hende desendiente di Tula te ainda ta inkómodo ku esaki, yudando esnan ku no ta niun famia direkto di Tula pa nan no koperá ku e konmemorashon ni e benefisio ku e komprondementu di motibu pa konmemorá mester trese kuné.
Ta p’esei den nos komunidat, tin sierto progreso ku nunka por keda realisá. Hopi hende ku riska papia di e tópiko ta bira rondó di e loke ta realmente loke mester atendé kuné. E realidat di koló; di klase; di opreshon internalisá i sintimentunan di ta mihó ku otro.
Niun hende den nos komunidat ku ta duna oportunidat na tur, no por reklamá ku e no ta logrando si e mes no atendé ku opstákulonan basá riba loke nos mes ta kere i loke nos ta laga otronan kere pa nos. E komunidat aki ta unu ku oportunidatnan inkreibel pa esun ku ke perseverá, ekselá i ku ke traha pa logra. Apesar di tur opstákulo visibel òf no i apesar di hende ku no sa mihó ku tur dia atrobe ta krusa nos kaminda.

Score: 0.0, Votes: 0

Batidó di bèl

Mon, 04 Aug 2008 18:02:18 -0700

Ku masha interes mi a sigui e relato den fin di siman na BVN, kaminda a trata e problema ku tur hende ku hasi denunsia di kosnan iregular i ilegal ku nan nota den empresa, organisashon i Gobièrnu di Ulanda, ta haña nan mes aden.
Esaki maske ku ta stimulá na Ulanda pa hende ku sa di algu ku no por i ku ta kosta kaha di gobièrnu hopi plaka, pa denunsiá esaki.
Realidat sinembargo ta, segun deklarashonnan di esnan ku a hinka nan kurpa den problema dor di bisa kiko nan sa; ku na momentu ku nan hasi denunsia, nan tur a haña nan den asina tantu doló di kabes, ku loke nan a hasi ni ta kos di rekomendá.
Tur e hende hòmbernan ku a presentá den e relato a bisa ku nan a hasi e denunsia di froude i iregularidatnan, pasobra nan ke a biba ku nan konsenshi. I tur su denunsia a resultá tambe den gobièrnu kobra mas plaka di belasting ku lo e no a haña, si e iregularidat a kontinuá.
Loke a bin dilanti tambe den e relato ta, ku na Ulanda no tin sufisiente protekshon pa loke nan mes ta yamá ’klokkenluiders’, batidó di bèl pa alertá ku tin kos ta pasando ku no por mira lus di dia.
A konkluí, ku e aktual areglonan pa protehá un hende ku bin dilanti i bisa loke e sa ku ta iregular, no ta funshonando. Ta bèrdat ku tin parlamentario ulandes ku a hasi pregunta na Gobièrnu Ulandes pa haña sa dikon no ta atend’é e asuntu di alertamentu mihó. Dikon no ta protehá esun ku ta alertá. Te asta tin na Ulanda un konsepto di lei pa protehá e siudadano konsiente ku denunsiá loke e ta opservá i eksperensiá komo iregular.

Score: 0.0, Votes: 0

Ta kèns nos ta òf ta otro kos?

Mon, 28 Jul 2008 17:57:25 -0700

Djasabra mi a haña ku di bèrdat ta bira di mas ku algun hende ku ta bin nos pais pa haña un mihó futuro ekonómiko i ku no ta respetá nos. Mi tabata den un ambiente kaminda un persona ku ta papia spañó i ku ta bin di un pais di den Karibe, a haña ku e mester papia malu di mi pais i di mi mandatarionan. El a bisa na bos haltu e.o. ku e pais aki tin mandatarionan kobarde i ku ta p'esei nada no ta drecha aki. Na promé instante mi tabata di lag’é papia, pero komo hende ku ta biba konsiente riba e isla aki i ku ta kontribuí realmente na e lugá kaminda mi a skohe pa keda biba, mi a haña ku si otro no bis’é ami ta splik’é anto.
Mi a kuminsá trankil na bis’é pa e no kere mes, pasobra nos nunka lo bira manera su pais, basá riba sierto realidatnan ku nos tin aki ku su pais no tin. Mi a splik’é ku Kòrsou ta úniko pais na mundu kaminda un hende sin nada ta bini, kobra ònderstant, haña karchi di pp òf di SVB, keda yama su mes e nashonalidat for di unda el a bin i pa kolmo tin kurashi di benefisiá di nos leinan demokrátiko pa papia kon ku ta ku tur hende di Kòrsou i demostrá falta di rèspèt pa esnan ku a dun’é loke su pais no por a ofres’é.

E persona aki a sigui bati boka ku mi i ripitiendo ki nashonalidat e tin. I na un momentu el a kontestámi ku ta hende di aki mes tambe ta papia e kosnan ku e ta bisando mi. Ke men ku ta bèrdat e ta papia. Mi no a aseptá esei tampoko di dje pasobra e komo estranhero i sigur e den e situashon ku e ta aki, mester sea bai bèk su pais si e no gusta loke tin aki òf sera su boka. Un opinion ku mi ta pará ketu bai su tras i mi a bis’é bon kla pa e bai bèk su pais anto si ta esei ta opinion ku e tin di e lugá aki kaminda el a haña un mihó bibá.

Score: 0.0, Votes: 0

Nos tá bai paga p’e

Mon, 14 Jul 2008 18:20:10 -0700

Si nos no ta pagando kaba p’e, nos lo bai paga sigur sigur den futuro serka òf mas leu pa e profundo falta di union ku yunan di Kòrsou real tin.
Un falta profundo di union ku bo ta nota hopi kaminda i ku te na ora hasi manera ku e t’ei, tòg ta lanta ken ku ta fuerte asina pa mustra ku no tin union i dikon no mester tin.
Ta bèrdat, tin gruponan den komunidat ku ta realmente uní basá riba nan interesnan personal. Pero mayoria hende ta aparentá di no tin e noshon pakiko no mester bringa otro i pakiko mester ta un, pa yuda nos komunidat i di mes e ora ei tur hende den nos komunidat.

E falta di union ta bai kompañá tambe ku un falta di rèspèt pa nos mes. Komo ku hopi hende no ta sinti ku nan ta parti di loke ta nesesario pa e otro e no ta mira tampoko pakiko e tin di duna rèspèt na e otro yu di Kòrsou.
Esaki atrobe ta pone ku hopi yu di Kòrsou ku korektamente a yega na posishonnan klave mester atendé ku yunan di Kòrsou ku pa kolmo supkonsientemente ta sali pa stroba e otro yu di Kòrsou ku a hasi esfuerso pa yega kaminda e ta; ta keda sin dun’é e sosten ku e mester i ta hasi tur esfuerso pa demostr’é ku no tin intenshon tampoko pa dun’é rèspèt; ni sikiera e rèspèt normal ku nos tur mester tin pa otro, sin ta importá ken e hende ta.

Mi ta spera ku bo ta trata na bisa ku mi no tin rason. I ku bo por komprobámi esei. Pasobra esei lo ta bon. Pero e ehèmpelnan tantísimo di kon nos mes ta ku nos mes, ta asina muchu ku nos mester bai traha riba e konsientisashon di nos hendenan riba e pakiko ku nos mester hasi kos huntu. Prepará huntu pa e kambionan benidero impaktante den nos struktura estatal. Kana huntu pa plania kon nos lo por saka mihó benefisio pa nos kada un den e pais nobo. Aseptá huntu, ku nos mester para uní kontra di tur otro ku ta kontra di nos chènsnan bon pendiente. I riska huntu, pa nos tuma mihó desishonnan posibel, awor aki i pa mas despues.

Score: 10.0, Votes: 1

Mester selebrá logro pa kòrda pakiko nos a traha

Mon, 07 Jul 2008 17:41:57 -0700

E tabata un simpel selebrashon ku a hasi algun mucha i mi mes hopi kontentu. Pero selebrando e ech, ku tur e muchanan ku ta lesa djadumingu atardi den Bright World Park a bai over, tabata algu ku sin mas mester a sosodé.
Bon mirá, no tabatin motibu pa hasi algu èkstra pa aksentuá logro di un aña di bai skol di spesífikamente e muchanan aki. Pero den un pais kaminda muchu biaha ta parse ku ta esnan ku no logra ta haña tur atenshon i kuido, ta na su lugá pa laga delaster un hende ku hasi un esfuerso eksitoso sa ku esei ta algu di balorá. I ku éksito ta algu ku mester kontinuá.

Mester ta asina, ku kada hóben ku ta bai skol i ku por, sa ku e ta hasi esaki pa ékselá. Pa logra ku e por ta kontentu ku su mes. Ku e ta preparando su mes pa den futuro e por ta mas mihó posibel. E mucha mes lógikamente no por yuda su kurpa pa loke ta insentivo i oportunidatnan pa (sigui) motiv’é pa e bai skol. E mucha ta dependé di adultonan konsiente rondó di dje pa esaki sosodé.
I sigur sigur no por laga esaki den man di henter e instituto di enseñansa lokal, ku tur su kosnan ku por diskutí, pa hinka ambishon den e hóben. Tin asina tantu mayor ku ke pa nan yu haña mihó skol posibel, pero pa tantísimo rason nan mes no ta/por yuda e yu. Un rason sin mas ta falta di sufisiente sèn pa e mayor por paga, komo kliente, pa su yu haña bon skol. Ke men di bèrdat ku ta esun ku por paga, ta esun tambe ku ta haña mihó skol.

Score: 6.0, Votes: 1

208 Notabel pa djaluna 30 di yüni 2008

Mon, 30 Jun 2008 17:01:08 -0700

Rekonosé ku rasismo ta internalisá na Kòrsou tambe
Semper ta interesante pa opservá kon na Kòrsou ta drai rònt di sierto realidat, miéntras ku tur hende si nan ke, por identifiká un òf otro indikashon di rasismo na Kòrsou. Den último dos dianan tabatin sufisiente kòmbersashon den vários sírkulo riba diskriminashon i rasismo. Interesante ta, ku muchu di esnan ku por hasi un diferensia den nos komunidat, ku ta duna testimonio di nan eksperensia ku rasismo, tin hopi biaha kurashi pa hasié ketu ketu bou di otro, ku miedu pa por keda indiká komo hende ku kompleho òf hende ku no meresé di a yega na e bon posishon ku nan tin.
I aya banda tin mas hende ku públikamente a ekspresá masha hopi kos pa ekspresá nan repudio pa loke a pasa, pero niun no a riska na atendé ku nos realidat. Esei kaminda ku, sin nan ke, nan a demostrá parti di e rasismo internalisá ku ta bibu bibu serka nos tambe.

Loke mi a spera despues di e suseso ku a pèrmití papiamentu públiko/abiertamente riba rasismo na Kòrsou tabata un akshon real i inmediato di esnan konserní kontra di un akto kriminal abierto ku a tuma lugá riba nos isla; komo demostrashon di kon nos ta atendé, ku lei den man, ku kosnan ku no por ta aseptabel i tambe spesífikamente kon lo bai sigui atendé ku tur forma di ekspreshon di rasismo den futuro.
Ami tambe ta bibando konsientemente na Kòrsou, basá riba un eskoho ku no tin mihó lugá na mundu pa biba. Aki nos tur ku ke ta biba kómodo den un ambiente kaminda tin hende ta sinti i ta aktua for di e pensamentu ku nan ta mihó, pasobra nan koló ta poko te hopi habrí i otronan ku ta sinti nan ménos, pasobra nan koló ta skur kla te hopi skur. Konsiderá esaki nos mihó sekreto públiko skondí.

Score: 0.0, Votes: 0

Notabel pa djaluna 23 di yüni 2008

Mon, 23 Jun 2008 16:33:36 -0700

Etiketa ta bai ku tempu?
Kisas lo tin algun hende ku no tin kunes ku bon manera. Pero ta di spera ku mayoria hende ke pa nan mes ta bon den kontakto i komunikashon ku otro hende. I ta esaki ta hasi ku etiketa i reglanan di protokòl ta keda nesesario.
Etiketa ta reglanan sosial skibí òf nò, ku ta pone ku komunikashon i kontakto entre hende ta bai bon i dushi i ku no tin, ni ta okashoná, problema sin nodi. Bon manera ta algu ku ta keda komprondé na un otro manera den kada pais, kultura i gremio sosial. I kambionan den mundu ta pone ku kada tempu tin otro etiketa i protokòl. Etiketa ta bai ku tempu, pero ku hende bou di sirkunstansia normal, tin nesesidat kontinuo pa sinti su mes bon i dushi ku otro, ta algu ku nunka lo kambia.

Sabiendo esaki nos ta ban wak rondó di nos na Kòrsou den e tempu aki. Kaminda sa parse muchu biaha ku hopi hende; di tur gremio sosial, di tur edat, di tur nivel di enseñansa, no sa, no ta komprondé ni ta interesá mashá den etiketa.

Kumindamentu
Yunan di Kòrsou ta konosí komo hende ku ta kumindá otro hende ora nan krusa ku otro i maske ku nan no konosé otro. Hopi hende ta parse di a pèrdè e kustumber aki. I ta kasi normal ku hopi hende no ta kumindá otro mas outomátikamente. Tin hende ta asta spanta ora un hende ku no konosé nan kumindá i ta kuminsá pensa kaba ku ta algu malu tin òf a pasa. Tristu ta ku hasta den dunamentu di servisio nos hendenan no ta mira pakiko mester kuminda e hende ku ta drenta komo kliente pa gasta su sèn.

Score: 0.0, Votes: 0

205 Notabel pa djaluna 9 di yüni 2008

Mon, 09 Jun 2008 22:01:36 -0700

Tata
Dos informashon riba tata a hala mi atenshon den siman ku a pasa. Tabata unu di e echo ku na Oustralia tin anualmente sigur 4 hende hòmber ku ta kometé suisidio, pasobra nan a divorsiá i no por wak nan yunan i publikashon di un buki kaminda ku tatanan por kontestá pregunta i asina dokumentá nan bida pa nan por konta nan yunan.

Pa kuminsá ku e situashon di tatanan divorsiá na Oustralia. Riba e wèpsait
www.lonefathers.com.au por mira kon hende hòmbernan divorsiá apesar di mitonan ku tin den nan komunidat tambe, a lanta pa nan derechi komo tata. E situashon a bai asina leu, ku tin polítiko ku a sali na defensa di e tatanan divorsiá ku ke mira nan yunan i tin mas di bisa riba desaroyo di nan yunan, maske nan no ta ku mama di e yu(nan) mas.
Realisando ku un mucha mester di su mama i su tata pa su desaroyo, mi a haña ku ta bon ku un informashon asina ei ta sali den publisidat. Mi mes tin basta biaha impreshon ku hopi hende hòmber (no tur) no ta preokupá pa nan yunan despues di divorsio. I mi tin e impreshon ku ta mama ta haña e yunan mayoria biaha, pasobra e tatanan mes no ta interesá pa keda ku e yunan i tur doló di kabes ku ta bini ku edukashon di un yu. Un moveshon manera na Oustralia ta yuda e hende hòmber ku no por soportá e echo ku e no ta mira su yunan òf ku e no ta biba ku su yunan. I e kontakto pa e muchanan ta muchu importante, pero ami sigur ke aksentuá ku mester wak kada kaso separá, pasobra realmente tin tata ku pa (sigui) ofendé e mama, lo hasi masha trankil, kualkier daño na su mes yu.

Score: 0.0, Votes: 0

204 Notabel pa djaluna 2 di yüni 2008

Mon, 02 Jun 2008 13:36:43 -0700

Kuantu hende muhé mas?
Kuantu hende muhé mas mester keda desabilitá òf mester pèrdè nan bida pa nos konsiensia komun lanta den komunidat ku algu mester pasa pa loke ta paramentu di abusunan doméstiko kontra di hende muhé?
Òf mester sigui skohe pa keda ketu, tur hende kómplise, hungando santu, miéntras ku hende muhénan individual ta sufri, turesten ku nan yunan ta keda mal programá ku ehèmpel di kon no mester atendé ku otro den bida.

E kasonan di abusu kontra di hende muhé ku ta bira konosí no ta mashá. Simplemente pasobra e hende muhé víktima sin ku e sa mes, lo ta sostené e hòmber ku ta humiliá, ofendé i maltrat’é, den un esfuerso straño pa no pèrdè kara.
No mester di sikiater pa bin splika ku e hende hòmber ku ta maltratá un hende muhé, sea físikamente, emoshonalmente òf mentalmente ta un abusadó!
Ku e ta un hende ku mester di tratamentu. I ku e ta hasiendo algu di kua ku e sa ku no por, ku ta un akto kriminal, kastigabel.
E sa, pasobra ta e ta rabia ora ku e hende muhé buska yudansa ku e meresé.
Un hòmber abusadó a skohe pa defendé su mes papiando malu di su kasá ku e mes ta víktimisá. El a kana konta masha hopi kos di e hende muhé. ‘Ku ta paso su kasá no ta trat’é bon’, ‘ku su kasá no sa kon trata é, ku ta su esposo’. I ku e hende muhé ta faya so. Turesten e hòmber abusadó no ta konta niun hende ku su kasá, mester traha pasobra e, hòmber abusadó, no tin sufisiente entrada pa kria su famia. Tampoko e ta konta ku el a kuminsá un relashon pafó di su matrimonio ku un otro hende muhé, kende na e momentu aki ta sperando un yu di dje.

Score: 0.0, Votes: 0

Adaptashon di preis i obligatoriamente di aktitut

Mon, 26 May 2008 15:59:11 -0700

Esun ku no a komprondé ainda ku no ta wega i ku tur, pero tur kos, ku eksepshon di solo ku ta sali tur tur mainta, ta bai bira muchu mas karu, tin un problema.
I esun ku ta kere ku ta otronan ta responsabel; e.o. gobièrnu, tin problema mas grandi ainda.
Sigur sigur si opservá kon estranhero ku asento riba ulandesnan europeo ta biniendo ku euro ku ainda ta duru kompará ku nos florin i ta haña hendenan lokal disponibel pa bende nan tur kos ku den futuro lo por a sirbi pa wanta kabes riba awa pa esun ku ta bendiendo.

E hende ku no ta tuma na serio ku mester bin un kambio den nos komportashon, ta stroba no su so, pero sigur otronan ku si ta konsiente di kiko ta pasando i kendenan a i ta tuma medida pa por adaptá i ku ta fleksibel pa bai ku e moveshonnan ekonómiko finansiero internashonal ku ta yegando pa pasa manera un ola sin miserikòrdia riba Kòrsou.
Nan ta stroba; pasobra tur loke ta un peso riba presupuestonan di gobièrnu ta nifiká ku e pagadó di belasting, e hende ku ta i òf ta purba na hasi kosnan pa yuda su mes; ta bai bira esun ku tambe mester karga peso adishonal pa motibu di otro.
Ora tende sifra di hendenan ku awor aki no ta trahando, pero por biba manera nan ke, pasobra nan tin ‘derechi’ riba supsidio i otro fasilidatnan legal popular manera karchi di pp i di ònderstant, mester rekonosé ku tin algu ku no ta korekto.
Hopi hende ta bai traha tur dia, motivá òf no, pero nan sèn no ta yega pasobra komo ku nan ta bai traha nan no tin privilegionan ku esun ku no ta bai traha si tin.

Score: 0.0, Votes: 0

Notabel pa djaluna 19 di mei 2008

Mon, 19 May 2008 15:49:36 -0700

Wak pa abo no keda tras
Komo imigrante digital mi sa ku mi a skapa dor di adaptá mi mes na e oportunidatnan pa kambia mi manera di pensa i funshoná den un mundu digital. Hopi hende di mi generashon ainda tin problema pa adaptá na pensamentu i funshonamentu digital. Pero bida digital ta un realidat ku no por evitá. Si bo ke funshoná profeshonalmente bo no por riska na konsiderá pa legumai desaroyo digital. E desaroyo a pone e.o. ku mayornan ku tin yu afó por spar plaka di yamada di telefòn, pasobra konstantemente tur dia i na tur momentu bo por komuniká barata ku e yu afó hasiendo uso di teknologia moderno digital. Tempu ami a bai studia hopi hopi aña pasá, mi mama mester a manda karta pa palabrá ku dos siman despues riba djadumingu lo mi ta den mi kamber pa e por bèl mi. Anto e mester a paga masha hopi sèn pa minüt pa un kombersashon telefóniko kòrtiku. Awe tur mayor den mundu digital, ta yama yu na kualke parti di mundu, tur dia mòru i bonochi, pa un preis relativamente barata.

Ya ta dos siman pasá ku mi a partisipá na e konferensha riba maneho di informashon ku a tuma lugá aki na Kòrsou. Un evento sumamente importante pa hendenan ku ke salbaguardiá informashon ku tin disponibel ainda awe. E tabata un oportunidat pa a haña sa kon archivonan ta benefisiá di e desaroyo digital.
Tabata bon pa sa ku ni na Ulanda nan no ta asina leu pa bati man riba pechu i deklará ku nan maneho di informashon ta bai ku tempu.

Score: 0.0, Votes: 0

Ta mas fásil pa yega Amsterdam i òf Miami

Mon, 12 May 2008 16:52:34 -0700

Ta kon Kòrsou a para bira asina? Ku ta parse awendia ku ta mas fásil pa yega Amsterdam òf Miami. Pasobra si bo ke biaha bai un destinashon for di Kòrsou i bo ke tin sigur ku ta fásil pa yega e destinashon ei anto mester ta Miami òf Amsterdam.

Tur otro destinashon ta aparentemente un reto eksklusivo. Puntra hende ku den último simannan a biaha p.e. pa Aruba, Boneiru, Sto. Domingo òf Caracas. Puerto Rico no por yega mes mas direktamente.
Aruba i Boneiru a demostrá muchu biaha den último simannan di ta destinashonnan di oro. Pa yega nan tabata un odisea. Pa bini bèk otro reto.
Caracas ku un ten por a bai mainta bin atardi manera ta Bándabou ta kuri bai bin bèk, tambe a bira un destinashon ku no ta asina asina por haña fecha pa bai ni bin ora bo ke.
Kisas ta un impreshon ku ami so tin. Pero kon por splika ku nos, pará den porta pa haña un status ‘mihó’ den reino, ku nos ta parse di ta mas aislá ku semper.

Ta parse ku pa yega St. Maarten òf Aruba ta bon bo bai Miami òf Amsterdam i kaba tuma un buelo direkto djei pa bo destinashon. Semper tabatin opservashon riba e echo ku ta difísil pa biaha den Karibe. Mester tin hende hopi sabí ku por a pensa kon superá e bareranan di komunikashon físiko den Karibe, sino ta bira tempu pa un hende sabí hasi esaki un proyekto.
Lo mi preferá di pensa ku e situashonnan pekuliar di último simannan kaminda tabatin situashonnan kaótiko pa biaha bai djis ei, lo ta eksepshonnan komprendibel i tolerabel. Pero tin un mensahe den e realidat aki? Kisas? Kua ta e prioridatnan ku maske ta atendiendo ku empresanan aéreo privá no tin sosten di maneho pa e biahero? Kua ta e pániko ku nos mester tin realmente ora ta atendé ku biahero i nan derechinan?

Score: 0.0, Votes: 0

Notabel pa djaluna 5 di mei 2008

Mon, 05 May 2008 15:25:13 -0700

Konsiente di Patria i Mama
Paisnan independiente den nos region tin algu notabel ku semper a hala mi atenshon. Si bo puntra un patriota di nan pa e splika pa kiko e lo ke muri, e ta bisabu sin mas pa su Patria òf pa su Mama. Mi no sa si lo tin hende ku ke muri pa Patria serka nos. Pasobra pa disidí esei bo mester ta konsiente di kiko ta bo Pais i bo mester por tin rèspèt pa bo mes, bo kosiudadanonan i pa bo Pais.
Loke si mi ta konvensí aki na Kòrsou ta, ku lo tin basta hende (remarkablemente basta hende hòmber) ku lo bisa ku nan lo muri pa nan mama.

Te ainda ta asina ku ta e hende muhé mama ta esun ku ta tene famia huntu, den situashonnan kaminda bida ta fásil i tambe lamentablemente muchu hende muhé mama den situashonnan sumamente difísil. Kargando retonan ku niun hende lo skohe p’e pa por kria yunan ku ta sirbi pa nos komunidat. Sosteniendo ekonomia di nos pais na momentu ku nan ta karga responsabilidat pa nan yu i famia tin kosnan básiko i mas. E hende muhé mama konsiente ta kuida pa futuro, kontinuando ku kultura, kustumber i tradishon.
Komo ku tur hende tin un historia lo ta interesante si por a dokumentá mas di e historia di nos mamanan komo inspirashon pa esnan ku stima Patria i prinsipalmente pa espesialmente mamanan hóben; pa nan mira ku nunka pero nunka bo no mester entregá si bo ta un hende muhé mama. Ku bo mester para komo baranka den tur tempu i sin haña niun pero niun krédito, hasi loke bo tarea di mama ta eksigí di bo, aseptando ku niun hende lo bin dal man riba bo skouder i sakudíbu pa bo kòrda ku ta algu hopi grandi bo a hasi den e tarea difísil pa eduká yu i kuida un famia.

Score: 7.0, Votes: 1