Laprensa Newspaper - Politika

Dennis Jackson, lider frakshon PAR: Nos a mustra nos boluntat, oposishon koperá un tiki tambe!

Tue, 19 Aug 2008 16:37:48 -0700

WILLEMSTAD – “Nos semper a mustra nos boluntat, koperando pa ora oposishon pidi un reunion públiko, yuda forma quorum ora esaki ta bai tuma lugá.
Pero no por t’asina tampoko ku oposishon ta bin ku yen di buèlta straño i wega dudoso pa purba hinka gobièrnu den huki. Nos a koperá hopi biaha, pero e kos aki no por sigui asina. Oposishon mester siña hiba un reunion den forma responsabel”, lider di frakshon di PAR den Konseho Insular drs. Dennis Jackson a deklará.
Ayera, e reunion públiko di Konseho Insular pa trata e problemanan rondó di Dokmaatschappij no por a sigui, pasobra no tabatin quorum.
Anthony Godett ta den eksterior e dianan aki, miéntras ku Renfred Rojer ta sufriendo kebrante di salu. Esei a pone ku koalishon tabatin apénas 9 miembro.
Dennis Jackson a splika ku ta un hecho ku oposishon so, no por logra e mayoria pa e reunion tuma lugá, pasobra ta 10 miembro oposishon tin. Esei ta pone ku ta tur biaha koalishon ta duna un man pa logra e mayoria aki.
“Awor, no por t’asina ku koalishon ta yuda forma quorum, anto partidonan di oposishon ta bin ku tur sorto di moshon, proposishon i kosnan straño ku nos no por aseptá i ku ta hinka mesun koalishon ku a duna un man den problema,” el a bisa.
Jackson a splika ku esei den pasado a yega di sosodé na diferente okashon ku konsekuensha, ku koalishon mester a bandoná sala di reunion i no partisipá mas na votashon.
“Anto ora nos bandoná sala di reunion, nos ta tende ku nos ta iresponsabel, ku nos no ta para pa loke nos ta kere aden i tur sorto di otro kos. Esei tampoko ta korekto,” Jackson a bisa.

Score: 0.0, Votes: 0

Lider di Niun Paso Atras ta denunsiá: PAR a sekuestrá futuro di Dokmaatschappij!

Tue, 19 Aug 2008 16:37:25 -0700

WILLEMSTAD – “Partido PAR a demostrá klaramente, ku e no por goberná e pais aki. PAR de fakto, a sekuestrá futuro di e kompania Curaçaose Dokmaatschappij”, asina lider di Niun Paso Atras Nelson Pierre a deklará, despues di loke a sosodé ayera den Konseho Insular.
Ayera mainta mester tabatin e reunion públiko pa atendé ku e problemanan ku e astiero ta pasando aden.
E reunion a para, pasobra partidonan di koalishon no por a forma quorum. Gezaghèber a posponé e reunion te ku próksimo aviso.
Pa Nelson Pierre, esaki ta un kos di lamentá.
“Partido PAR, den su lucha interno ku ta afektando e partido seriamente, básikamente konosé tres koriente awor. Na promé lugá bo tin direktiva di PAR ku su sede na Fokkerweg ku na kabes lider di e partido Emily de Jongh-Elhage, bo tin e PAR den Bestuurscollege ku ta sostené diputado Eugène Rhuggenaath ku e posishon ku no por nombra Franklin Sluis komo direktor i mester nombra un direktor interino na e kompania anto bo tin e PAR representá den hunta di komisario, ku ta para’riba ku ta Franklin Sluis mester bira direktor nobo di CDM.
Dòk ta den problema serio, anto awor ta menasa di bira víktima tambe di un solo partido polítiko. Ta parse ku ta den PAR ta disidí destino di e pais aki. Awor aki, futuro di Dòk ta den man di partido PAR,” Nelson Pierre a afirmá.
El a mustra ku partido PAR tin komo seis luna ta reuní. A pone masha hopi reunion sin ku a sali afó. Anto ta e partido aki ta papia di bon gobernashon, di corporate governance i di saka polítika for di kompanianan di gobièrnu.

Score: 0.0, Votes: 0

Forsa Kòrsou ta felisitá e deportistanan pa nan éksitonan den eksterior

Tue, 19 Aug 2008 16:35:38 -0700

WILLEMSTAD – Partido Forsa Kòrsou ta manda un pabien kaluroso na tur e deportistanan ku atrobe a kontribuí na mantené e nòmber di Kòrsou na haltu den eksterior.
“Bosnan ta nos berdadero embahadornan deportivo”, e partido lila a splika. “Tambe Forsa Kòrsou ta gradesí i felisitá e mayornan, entrenadónan, coachnan i tambe tur e deportistanan ku no a haña e oportunidat di a bai representá nos pais den eksterior, pero ku si a kontribuí na e preparashon i pues e éksitonan di nos deportistanan”. Segun Forsa Kòrsou ta importante remarká i suprayá ku un biaha mas a keda probá ku Deporte ta un di e instrumentonan mas importante pa desaroyo di kurpa i mente di spesialmente nos hóbennan i ta pa e.o. e motibu aki partido Forsa Kòrsou lo sigui duna su kontribushon positivo na amplia i oumentá e fasilidatnan deportivo pa kontinuá i amplifika e desaroyo aki.

Score: 0.0, Votes: 0

Promé Minister Emily De Jong-Elhage no por a topa ku Chávez

Mon, 18 Aug 2008 18:46:17 -0700

WILLEMSTAD – Promé Minister di Antia, Emily de Jongh-Elhage, tabatin e speransa di lo por a papia ku Presidente di Venezuela Hugo Chávez na Sto. Domingo. Manera ya a keda publiká siman pasá, Promé Minister De Jongh-Elhage a biaha pa Sto. Domingo pa einan representá Reino durante e seremonia di huramentashon di Presidente Leonel Fernández.
Esaki no a bira posibel komokiera ku Hugo Chávez a opta pa bai e seremonia di huramentashon di Presidente Fernando Lugo di Paraguay.
Venezuela a wòrdu representá na Sto. Domingo pa Minister di Finansas Ali Rodríguez ku den pasado tabata tambe e Minister di Energia i Petroli, Presidente di OPEC, Minister di Asuntunan Eksterior i Embahador na Cuba.

Score: 0.0, Votes: 0

Farou Metry: “E kos a kuminsá bira manera wega” .. Partido Nashonal no ta koperá pa kita Lei di Retiro!

Mon, 18 Aug 2008 18:34:49 -0700

WILLEMSTAD, - Partido Nashonal lo no koperá pa bolbe kambia e situashon di Lei di Retiro. No por t’asina ku kada be ta hunga ku e lei aki, un biaha ta pon’é na vigor, otro biaha ta elimin’é. Awor, si sindikatonan no tin problema pa eliminá e lei aki, nos lo duna nos koperashon pa kit’é, asina presidente dje partido bèrdè mr. Farou Metry a anunsiá.
Metry a hasi e anunsio aki den kuadro di e diskushonnan ku tabatin siman pasá riba e lei ku mester drenta na vigor ku ta oumentá sueldo mínimo ku 15 porshentu.
Ta un hecho konosí, ku tantu gobièrnu komo sektor privá a mustra ku huntu ku e oumento aki, mester bin un pakete di medida pa suavisá e impakto di e oumento. Ta papiando en general riba fleksiblisashon di merkado laboral, den kua ta figurá tambe eliminashon di e lei di retiro.
E asuntu aki a kousa sintimentunan inkómodo den mundu sindikal i a provoká un reakshon tambe di dirigentenan sindikal.
Sindikalismo lo no koperá pa mata e klase trahadó. Nos no ta dispuesto pa bai sinta diskutí eliminashon di Lei di Retiro, asina presidente di Kámara Sindikal Sidney Justiana a bisa.
Ta konosí ku Lei di Retiro ta sagrado pa sektor sindikal. Sindikalismo a bisa enfátikamente tur tempu ku ta un lucha grandi i fuerte el a hiba den pasado pa haña e garantia aki pa klase trahadó. No por mishi ku e lei aki, segun sindikatonan di Kòrsou.
E punto aki lo bira un punto di hopi diskushon den e periodo benidero.

Score: 0.0, Votes: 0

Humphrey Davelaar, diputado: Unda ta pará ku famia no por ta den Hunta Komisario?

Sat, 16 Aug 2008 18:09:06 -0700

WILLEMSTAD – “Mi ke pa un hende bisami unda tin pará, sea den statuto òf otro kaminda ku un miembro di famia di un mandatario no por bira miembro di un Hunta di Komisario. Si e ta hasi su trabou korektamente, kiko malu por tin den esei?” ta loke diputado Humphrey Davelaar a puntra miembronan di Konseho Insular durante tratamentu di e skandal ku a surgi na e kompania Curoil.
Pa puru kasualidat, gerensia di e kompania a bin haña sa di e asuntu di “negoshi den negoshi” aki na e empresa distribuidor d kombustibel.
E dos empleadonan enbolbí a entrega nan retiro basta dia kaba pero e kaso a resultá un kaso ku reperkushon mas grandi ku tur hende, inkluso direktor Gensley Capella a kere.
Manera nos a informá ekstensamente kaba for di djamars último, e diputado a bisa ku e ta determiná pa atendé e situashon aki ku a surgi pa asina garantisá ku Curoil no ta sufri daño na su imágen internashonal.
“Ami lo aktua ku man duru, pa drecha e imágen di Curoil i rekuperá mas tantu posibel e daño ku e kompania a sufri. Pero no fèrwaktu di mi pa bai ataka niun hende personalmente. E investigashon mester kana su kurso I e proseso mester kana hustu,” asina e diputado a bisa na e okashon ei.
“Awor, nos por diskutí si Curoil a pèrdè òf a pèrdè di gana, pero e loke a sosodé ta kondenabel, étikamente i moralmente.
Normalmente mester por konfia den un kompania asin’aki, un kompania ku ta sentral den e problema di kombustibel. Nos mester haña bèk loke a pèrdè,” diputado Davelaar a agregá.

Score: 0.0, Votes: 0

Anthony Godett ta determiná: Gobièrnu lo sigui su trayekto pa restrukturá transporte públiko

Sat, 16 Aug 2008 18:07:54 -0700

WILLEMSTAD – “Gobièrnu di Kòrsou ta determiná pa sigui riba e kaminda pa yega na restrukturashon di transporte públiko. Nos ta mantené e skema ku nos a stipulá”, asina diputado Anthony Godett, enkargá ku e kartera aki a deklará.
Algun siman pasá, e sindikato di shofùrnan di bùs SINUSTA a reuní i a tuma e desishon ku nan ta bai formulá nan mes plan di restrukturashon.
Esaki den práktika ta nifiká, ku nan a rechasá e plan, e “visiedocument” manera diputado Godett a kalifik’é.
Básikamente e punto di salida ta, a krea un entidat ku ta bai manehá transporte públiko i kaminda e shofùr di bùs ta traha pa e kompania aki. Manera ta konosí, e idea aki no ta un kos nobo: durante hopi aña largu gobièrnunan di turno a bin ta trata di konvensé shofùrnan di bus ku esaki ta e mihó forma pa kondusí transporte públiko. E idea aki nunka a haña sosten serka shofùrnan.
Gobièrnu ta mustra ku restrukturando transporte públiko di e forma aki, lo benefisiá e propio shofùr di bus pasobra e ora ei lo por sòru pa e gosa di un penshun ora e yega sierto edat.
Dos siman pasá, e sindikato a tene un reunion general ku su miembronan pa diskutí e proposishon aki. E shofùrnan di bùs presente a rechasá e idea di gobièrnu pa krea un organisashon pa kua e shofùrnan lo bai traha.

Score: 0.0, Votes: 0

Gregory Damoen di FK ke sa: Awor ku preis di petroli a baha, ki dia ta adaptá tarifanan di gasolin, disel i koriente pa kaba?

Sat, 16 Aug 2008 18:02:08 -0700

WILLEMSTAD – Gregory Damoen, miembro di partido Forsa Kòrsou den Konseho Insular, a remarká ku preis di krudo riba merkado internashonal ya pa algun tempu kaba a kai for di un nivel rèkòrt di 149 dollar pa barí te na un nivel di 115 dollar pa barí. “Ayera e dia a sera ku promedio di 113 dollar pa barí di petroli. E desaroyo positivo aki no ta konta pa nos na Kòrsou? E bahada no ta sufisiente pa Bestuurscollege adaptá e tarifanan di gasolin, disel i koriente na Kòrsou? Aruba a adaptá su tarifanan di kombustibel kaba, ta dikon atrobe Kòrsou mester keda atras?”, sr. Damoen ta puntra. “Si tin motibunan bálido pakiko gobièrnu no por baha e tarifa, anto nan mester splika pueblo! Unda transparensia a keda? I ta kon gobièrnu por splika negoshi den negoshi di un banda den e kompania Curoil, i di otro banda preis di krudo ta baha i tòg no ta baha tarifanan di gasolin i disel? A yega momento pa gobièrnu trese klaridat na pueblo”, e miembro di FK ku un tono preokupá a enfatisá. “Unda e asina yamá plan di informashon ta? E partidonan PAR/PNP i FOL ku ta forma Bestuurscollege i gobièrnu sentral i ku a proklamá bienestar, nan no ta mira kon e situashon ta sofoká i horka esnan den mas nesesidat? Kon un famia ku ta biba ku un entrada ménos ku e mínimo por hiba un bida salú i balansá? Kon por ehèmpel esnan ku desabilidat físiko, ku ta biba ku solamente un ònderstant òf un penshun di behes por sobreviví? Segun sr. Damoen mas aleu a hasi e pregunta grandi ta kon gobièrnu ta bai kontrolá, ku na ora baha tarifa di gasolin, disel i koriente, preisnan di produktonan i servisionan di promé nesesidat ser adaptá manera mester ta? Palabra ta na Bestuurscollege pa baha tarifanan òf duna pueblo splikashon bálido dikon no por baha tarifa di gasolin, disel i koriente i ta ki ora si esaki lo bai sosodé. Finalmente, segun e konsehal di FK, basá riba e pronóstikonan ofisial di oumento di kosto di bida te na un nivel di 7 pa 8% pa aña 2008, gobièrnu mester splika konkretamente ki dia pueblo ta sinti e efekto positivo di e asina yamá medidanan pa aliviá e impakto di e oumentonan di preis di petroli riba merkado internashonal, speshalmente e.o: redukshon di akseins, redukshon di tarifanan di belasting riba produktonan di promé nesesidat, adaptashon (oumento) di ònderstant, penshun di behes i sueldo mínimo, adaptashon di e makutu di produktonan di promé nesesidat ets. Partidonan PAR/PNP i FOL, kuminsá apliká un maneho sosio-ekonómiko kaminda e hende lokal tambe ta importante i ta sinti e bienestar real i no solamente ta risibí, sobrá, wiriwiri i kachikachi. Duna e hende e atenshon real awor!

Score: 0.0, Votes: 0

Minister Duncan hopi preokupá ku e situashon; A selektá solamente 30 hóben di e 100 ku a wòrdu yamá pa servisio militar

Sat, 16 Aug 2008 17:39:23 -0700

WILLEMSTAD – Mas ku 100 hóben antiano a wòrdu yamá pa servisio militar, pero únikamente 30 a keda selektá. Pa e minister di Asuntunan Konstitushonal, Roland Duncan tin un problema ku e situashon aktual, pa loke ta e proseso aki. E ta kere ku e kambionan konstitushonal ku ta tumando lugá, kada isla mester bai tuma un desishon al respekto.
“No tin un duda ku tin un problema ku servisio militar,” asina Duncan a duna di konosé durante un konferensha di prensa na St. Maarten ayera. El a duna komo ehèmpel, ku tur e 16 hóbennan di St. Maarten ku a wòrdu yamá pa drenta servisio militar a keda rechasá.
Segun Duncan, e problema ta sinta den e proseso di selekshon i esaki ta kontra di lei pa e manera ku e ta keda hasí pa Marina Ulandes.
E minister ta kere, ku aktualmente ta skohiendo i prinsipalmente esnan di St. Maarten ta wòrdu mandá bèk, pasobra nan no por papia ni papiamentu ni ulandes. Tambe kontrali na su instrukshon, ta hasiendo tèstnan físiko, promé ku drenta e proseso di servisio militar.
E problema ta sintá den e hecho, ku ta rechasando un gran kantidat di hóben, pa motibu di un areglo ku Ulanda ku nan tin ku paga dos biaha pa aña pa 75 hóben partisipá den e asina yamá ‘Toekomst Antilliaanse Militie’ (TAM). Pasobra Gobièrnu Sentral no ta paga kasi nada pa servisio militar, Ulanda ta tene e kantidat di hóbennan abou, di akuerdo ku Duncan.

Score: 0.0, Votes: 0

Minister Maurice Adriaens ta kontentu: Antia a firma tratado a aviashon ku Alemania

Fri, 15 Aug 2008 18:23:35 -0700

WILLEMSTAD - Minister di Tráfiko i Telekomunikashon di Antia ingeniero Maurice Adriaens ayera a firma un tratado di aviashon ku Alemania pa asina stimulá mas turismo for di e pais aki.
Anteriormente, e mandatario antiano a firma un tratado similar ku Bèlgika.
E tratado ku Alemania tin diferente benefisio pa e islanan di Antia, asina e minister a duna di konosé den un entrevista na Radio Nederland Wereldomroep.
“No solamente t’asina ku kompanianan di Alemania por bula pa Antia. Kompanianan ku ta usa suela aleman a baha i hasi eskala tambe por realisá buelo pa Antia,” asina Adriaens a duna di konosé.
E mandatario antiano no ta preokupá pa e hecho ku esaki ta nifiká kompetensia pa Alemania. T’asina ku te ku awor, e turista aleman ku kier a biaha pa un dje islanan di Antia, ta hasi esaki atraves di Ulanda ku e kompania KLM òf otro kompanianan di aviashon ulandes.
Minister Adriaens a bisa di a konstatá sinembargo, ku buelonan di kompanianan ulandes tin hopi tempu kaba ku nan ta yen i no ta brinda espasio pa por ehèmpel e turista aleman ku ke bishita Antia.
“Nan no tin kapasidat, pues mi no ta fèrwaktu problema”, segun e minister.
Di akuerdo ku informashonnan ku ta disponibel, e tratado ku a firma ku Bèlgika no a produsí masha dividendo te ku awor.
E minister a splika ku e ta firma tratado, pero ku ta keda na e islanan, pa sigui hasi e trabou. Mi ta sali for di punto di bista ku ofisina di turismo lo hasi e trámitenan nesesario pa fomentá e tráfiko di turismo.

Score: 0.0, Votes: 0

Parlamentario Faroe Metry ta desapuntá: M’a pronostiká ku kos por pega ora lei sali Staten!

Fri, 15 Aug 2008 18:22:50 -0700

WILLEMSTAD – “Mi a bisa ku tin chèns ku kos no ta kana manera nos lo deseá, unabes ku e proposishon di lei aki sali for di Staten. M’a bisa, ku nos no tin influensia mas kon e trayekto ta sigui. Awe ta parse ku mi ta hañando rason”, di akuerdo ku parlamentario mr. Faroe Metry, kende tabata esun ku a formulá e proyekto di lei, pero kende tambe tabata e motor ku a bringa pa e proyekto di lei aki bira realidat.
Faroe Metry, na momentu ku Staten a kaba di aprobá e lei den luna di yüli, a atvertí pa e lei no bai pega den e kanalnan di gobièrnu.
“Nos tur sa ku ora e lei sali parlamentu, nos no tin grep mas riba dje. Mi ta spera solamente ku gobièrnu lo no bai tarda pa publiká e lei aki, di manera ku e por drenta na vigor mas lihé posibel. No mester lubidá ku si e yega yanüari di otro aña, e ta bai trese konfushon, pasobra e momentu ei mester indeksá e lei di sueldo mínimo atrobe,” el a bisa djarason 16 di yüli, dia ku Staten a aprobá e lei.
Segun Metry, awe por mira kiko por sosodé ku un proyekto di lei ku sali for di Staten. “Te asina leu ku mi ta kòrda, ta tur proyekto di lei ku a sali for di Staten, sin eksepshon, a topa traba na kaminda ku a pone e lei dura un eternidat promé ku el a drenta na vigor.
A resultá awor”, segun Metry, “ku Raad van Advies no a trata e lei aki ètòl ainda. Di akuerdo ku informashon disponibel, Raad van Advies ta riba e punto di bista ku e ke haña konseho di tur e departamentunan ku tin di aber ku e lei, promé ku e mes, formulá su konseho. Tanten ku e konsehonan aki no drenta, no por spera un konseho ofisial di Raad van Advies. Esaki ta di lamentá”, asina Metry a bisa, “pasobra awor no ta masha kla ta te ki dia, mester warda”.

Score: 0.0, Votes: 0

Aliansa Patriótiko a spat for di otro!

Fri, 15 Aug 2008 18:17:40 -0700

WILLEMSTAD – Loke tabata antisipá masha dia, ayera nochi a bira un realidat, despues ku e Aliansa Patriótiko a spat for di otro. Den un reunion ku nan a trata di tene sekreto, diferente lider di e grupo formá pa partidonan di oposishon a bin huntu pa atendé e último desaroyonan. Ta promé bes ku e partidonan a bin huntu, for di despues di e manifestashon ku a sali for di man dia 26 di yüni último i despues ku MAN a laga un komishon analisá su relashon ku e aliansa.
Manera nos a informá, un komishon di MAN a konkluí, ku ta bon pa sigui, pero bou di kondishon estrikto. Ya kaba for di despues di e análisis aki, ratifiká pa Konseho di Partido di MAN, tabatin indikashon ku kosnan lo no bai wanta muchu mas. Prinsipalmente e deklarashonnan di lider di Pueblo Soberano Helmin Wiels den sentido ku niun hende no tin nada di bisa su partido i sigur no pone regla pa e partido, a pone masha preshon bou di e aliansa. Otro partidonan no a duna boka mesora, pero ayera nan a bin reunion i a konkluí ku ta mihó stòp aki nan. Pueblo Soberano no tabata na e reunion di ayera.
Lider di MAN Charles Cooper a konfirmá na radio awe mèrdia, ku e aliansa a stòp di eksistí. Kiko ta bai pasa awor aki, no ta masha kla, pasobra den e partidonan ta biba e pensamentu ku mester tin un strategia pa kontrolá i kuestioná, entre otro e proseso estatal manera e ta tumando lugá awor aki.
A lanta e aliansa na aprel último ku e idea pa forma un moketa relashoná ku e kambionan estatal. E Aliansa a konkluí ku Ulanda ta hañando muchu di bisa den e proseso. Banda di esei a alegá, ku a bandoná e ruta ku a fiha for di despues di e referèndem 2005 den un moshon i despues den un dokumentu ku a haña aprobashon di tur partido ku representashon den Konseho Insular. E Aliansa a kuminsá ku MAN, Forsa Kòrsou, Partido Democraat, Niun Paso Atras, Pueblo Soberano (tur ku representashon den Konseho Insular) i Partido Laboral Krusada Popular. Partido Democraat a sali afó despues di un enkuentro di shete por ocho entre su lider Norbert George i lider di Niun Paso Atras Nelson Pierre.

Score: 0.0, Votes: 0

Partidonan a dera hacha riba kaso-Tula

Fri, 15 Aug 2008 18:17:11 -0700

WILLEMSTAD – Den un reunion ekstraordinario di Bestuurscollege ayera, den kua a papia ku tur protagonista, a disidí ku ta dera hacha relashoná ku e diskushon ku a surgi pa loke ta trata konmemorashon di Dia pa Lucha di Libertat. Diputado di Kultura Marilyn Alcalá-Wallé a konfirmá awe mainta, ku a yega na akuerdo pa lanta un komishon ku lo bai hinka tur kos den diskushon pa yega na un konmemorashon ku ta mas profundo i ku ta enfoká riba e parti históriko di e rebelion di katibu di siglo di 1795.
E diputado a bisa, ku e aktividat ku Gobièrnu di Kòrsou a organisá den Basílika di Santa Ana, lo sigui normalmente i despues lo tin ponementu di un krans na e Monumento na Rif. Riba e pregunta si Gobièrnu lo ta presente na e tradishonal konmemorashon parti anochi riba Rif, e diputado a bisa ku Bestuurscollege kompleto lo ta presente.

Score: 0.0, Votes: 0

A konvoká reunion urgente pa awe nochi: Ultimatum di Direktiva di PAR pa Eugene Rhuggenaath!

Thu, 14 Aug 2008 17:04:24 -0700

WILLEMSTAD – Direktiva di PAR a konvoká un reunion awe nochi ku diputado Eugene Rhuggenaath, enkargá ku Curaçaose Dokmaatschappij, pa wak si por sali for di e impase serio ku a surgi riba nombramentu di un direktor na e kompania i ku tin e diputado riba ruta di retiro for di e partido i polítika. Ta konsiderá e reunion unu di karakter sino fono komo ku ya kaba ta algun luna ku e kaso ta den publisidat sin konklushon te awor.
Despues ku a informá ku un reunion di akshonista djabièrnè último a tuma lugá den bon ambiente i a fiha puntonan di salida ku tur hende por biba ku ne, a surgi duda riba kiko a akordá. Entre otro LA PRENSA a pone duda den e vershon aki despues ku nos a haña sa ku loke a bin dilanti no tabata kompletamente korekto. Esmas, si tabatin un akuerdo entre e protagonistanan prinsipal, entre otro pa loke ta trata e eventual nombramentu di Franklin Sluis na kualke puesto, no tabatin e nesesidat pa diputado Rhuggenaath sigui insistí ku e lo baha dado kaso Sluis ta den tapara pa kualke puesto ehekutivo.
Loke a pasa den e reunion di djabièrnè ta ku diputado Rhuggenaath a bin e reunion ku un mandato di Bestuurscollege (ku ta e akshonista prinsipal pero no a úniko akshonista) pa trese kambionan den rumbo di e kompania i pa nombra un turn-around manager. Aparentemente ya kaba tin un kandidato na bista, anke ku e diputado mes a bisa na radio resientemente ku ainda no tabatin kontakto ofishal ku e kandidato aki, un penshonando ulandes ku a traha na e kompania di drechamentu di barku ulandes Damen Shipyard. E mesun kompania tabata interesá te algun siman ariba ei pa bira doño di e kompania pero aparentemente e animo di e kompania ulandes a baha último dianan. Den e reunion di djabièrnè e úniko kos ku diputado Rhuggenaath por a hasi ta pa anunsiá deseo di Bestuurscollege pasobra e responsabilidat pa tuma desishonnan na e kompania ta di Hunta di Komisario. Den e struktura aktual di kompania i fundashonnan di gobièrnu, Kódigo Sivil ta pisa masha tantu i ta bisa bon kla ku no ta gobernantenan ta responsabel pa desishonnan ku tuma pero e miembronan di Hunta di Komisario individualmente. A tuma e sugerensha di diputado Rhugggenaath na konsiderashon pero ku e punto di bista bon kla ku finalmente ta Hunta di Komisario ta esun ku ta tuma e desishon final. Riba esei a surgi un konflikto serio awor aki pasobra Hunta di Komisario ta pretendé ku el a kuminsá un proseso pa nombra un direktor nobo, e proseso guiá pa SOAB a yega na konklushonnan konkreto, a skohe i ya kaba informá e mihó kandidato (Sluis) pa despues e diputado bisa ku e no por aseptá nombramentu di e kandidato aki. E diputado tin duda den kandidatura di Sluis pa motibu di su kontakto ku hustisia den pasado. E kaso a bin ta hunga pa algun luna kaba i awor a yega e momentu pa wak kon ta bai sali afó òf si finalmente e kiebro lo bira definitivo. Niun hende no kier komentá e reunion di awe.

Score: 0.0, Votes: 0

Promé minister di Antia ta lamentá: “Staten no a hasi pregunta i mi no a haña chèns di splika”

Thu, 14 Aug 2008 17:00:33 -0700

WILLEMSTAD – “No a hasimi niun pregunta, mi no a haña chèns pa sikiera kuminsá splika e resultado dje investigashon ku nos a hasi den awanan teritorial, en buska di petroli i gas”.
Un promé minister bastante desapuntá a splika prensa ayera tardi ku e reunion di Staten di djamars último pa interkambiá ku parlamentu riba kiko gobièrnu a bin ta hasi riba e tereno aki, no a duna e resultado ku e tabata deseá. Ta komo si fuera kier a hinka e asuntu aki den un ambiente polítiko, el a agregá.
University of Texas a hasi un investigashon den awanan teritorial di nos pais, pa weta si tin sentido pa sigui ku intentonan pa weta si tin petroli i/òf gas den nos suelo supmarino.
E investigashon ta duna motibu pa sierto optimismo, pero mi no ke adelantá riba nada, asina e promé minister a bisa e tempu ei, pidiendo pasenshi, pasobra e kier a papia ku parlamentu promé riba e tema aki.
A laga un eksperto di Jamaica, profesor Simon Mitchell formulá su komentario riba e rapòrt di University of Texas i a laga e eksperto lokal traha su anotashonnan tambe riba e mesun rapòrt.
“Mi ta kere ku ta mas ku étiko pa mi informá Staten promé ku tur otro hende,” asina e promé mandatario a bisa algun siman pasá.
Hustamente pa e motibu ei mes, el a lamentá loke a sosodé djamars último. T’asina, ku parlamentario Dwigno Puriel a para riba pa e weta kontenido di e rapòrt di Simon Mitchell, promé drenta debate ku gobièrnu riba e asuntu aki. Gobièrnu, despues di a splika ku e kontenido ta konfidensial, a bai di akuerdo pa pone e rapòrt “ter inzage” na parlamentu. Pero esaki ta nifiká, ku nos mester di tempu pa por weta e kontenido, segun Puriel, riba kua presidente Pedro Atacho a disidí e ora ei – despues di a konstatá ku tin un mayoria na fabor di esei – pa posponé e reunion te aki dos siman, ora Staten tin su siman di reunion atrobe.

Score: 0.0, Votes: 0