Laprensa Newspaper - Farandula

Madonna i Michael Jackson ta kumpli 50 aña

Fri, 15 Aug 2008 18:16:31 -0700

LONDON / LAS VEGAS, - Madonna i Michael Jackson ta selebrá mei siglo e luna aki, pero miéntras e dama kantante ta yega 50 aña den forma físiko perfekto i artístiko, e rekòrdá “Rei di Pòp” parse tin ménos motibu pa festehá.
Madonna Louise Ciccone a nase 16 di ougùstùs 1958 na Michigan (nort) i Michael Joseph Jackson 13 dia despues i 450 kilometer ost, presisamente na Indiana.
Meimei di añanan 1980, ámbos a bira Rei di e temanan mas popular na mundu kompletu: Jackson ku e históriko “Thriller” (mas ku 50 mion álbùm bendé) i Madonna danki na “Like a Virgin”, un meskla di provokashon ku sekso i religion ku a bende 21 mion kopia.
Ounke Jackson a konosé éksito for di mucha huntu ku su rumannan, tantu e komo Madonna a benefisiá di e kadena musikal MTV, ku ta emití tur nan videonan di forma kontinuo, Robert Thompson, profesor di komunikashon oudiovisual i eksperto den kultura popular di Syracuse University (ost) a rekòrdá.
“Pa Michael Jackson, komo músiko, bailarin i artista riba esena, ta’tin 10 bia mas talento ku Madonna. E ta un persona ku ta rivalisá ku Sinatra, Bing Crosby i Elvis Presley”, Thompson a añadí.
Pero ku su retiro kompletu di skandalnan, Madonna ta esun ku a logra keda.
Geoff Mayfield, responsabel di e klasifikashonnan di e publikashon musikal profeshonal Billboard a bisa: “Semper por spera sorpresa di Madonna”.

Score: 6.0, Votes: 1

Cali Manuel, Styvy Zimmerman i Glen Thomas den Reflection Party III

Fri, 04 Apr 2008 18:54:10 -0700

WILLEMSTAD - Mañan, djasabra 5 di aprel, lo tin e di tres fiesta di Reflection Party ku Dj Cali Manuel i Styvy Zimmerman. Mañan e tim di Dj-nan Cali Manuel i Styvy Zimmerman lo ser ampliá ku e konosido i hopi gustá Dj Glen Thomas. Tur e tres Dj-nan aki ta di Radio Direct 107.1. Mester bisa ku ta tin un ambiente hopi dushi i romántiko den e promé i di dos reflection ku, e astrólogo i Dj, Cali Manuel di Radio Direct.
Djasabra awor e ambiente aki lo bira aun mas dushi i romántiko ku Dj Glen Thomas aserka. E fiesta aki ku kombinashon di Dj Cali Manuel, Styvy Zimmerman i Glen Thomas lo tuma den e dushi ambiente di e lugá The Place na Winston Churchillweg, banda di Botika Santa Maria. E fiesta ta riba djasabra, teniendo kuenta ku djadumingu ta un dia liber. Di e forma aki tur pareha por gosa for di 9’or di anochi te ku 3’or di mardugá. Entrada ta 15 florin i lo tin dos pasapalu grátis. Karchi ta optenibel na porta. Pues djasabra e fiesta ta Reflection Party number Tres na The Place ku Dj-nan Cali Manuel i Styvy Zimmerman i ....Glen Thomas.

Score: 8.0, Votes: 2

Guess lo lansa nan gospel nobo nobo: Interes grandi pa “Laga Nos Ta Un” ta birando mas grandi ku a pensa!

Mon, 03 Mar 2008 17:12:19 -0800

WILLEMSTAD – Konsierto “Laga nos ta Un” ta birando mas grandi di loke a spera, ya ku e partisipantenan ta preparando den un forma eksepshonal. Ku konfirmashon di e último agrupashon D-One ta sera e kapítulo di agrupashonnan musikal ku lo forma parti di e konstelashon di agrupashonnan ku lo bai kanta gospel den e konsierto menshoná. E konsierto aki lo tuma lugá djaweps 20 di mart próksimo den Curaçao Festival Center, den kua e konstelashonnan musikal manera GMO, Tune, Rumba Band, Show, Guess, ERA, D-One i GIO huntu ku e kantantenan Ilvia, Mammy, Ephrem J i Reinir Lijfrock lo bai kanta na Dios. Ademas lo tin presentashon di Dj Renzo ku lo presentá un meks di gospel, miéntras ku e maestronan di seremonia ta Mark Seferina i MC Monty.
Pa loke ta trata Mark Seferina tambe ta preparando un rèp pa wòrdu lansá durante e anochi di “Laga nos ta Un”. E formashon Guess tambe a prepará su mes i a drenta studio di Zion Music & Academy pa un kantika spiritual ku lo bai keda lansá pa promé biaha den e konsierto aki bibu.
Loke siman pasá na momentu ku e konferensha mester a tuma lugá, Claudius Phillips tambe a afirmá ku e tambe lo bai forma parti di e konsierto aki.
E konsierto aki ta uni pa rekoudá fondonan pa restourá e oula di Huize Habaai ku ta será for di 1995. Ministerio Bida Abundante for di aña pasá tabata traha riba kontaktonan ku agrupashonnan pa logra haña nan tur huntu pa e selebrashon grandi aki. E fecha di 20 di mart ta un fecha den kua lo no tin fiestanan bailabel na Kòrsou, motibu pa kua a skohe un fecha den kua un i tur por bin huntu pa reflehá riba e motibu ku Kristu Hesus a muri pa hende.

Score: 9.0, Votes: 2

A kuminsá ku preparashonnan pa kasamentu di Tom Cruise i Katie Holmes na Roma

Wed, 15 Nov 2006 17:58:49 -0800

ROMA, Italia, - Tom Cruise a hasi su promé aparishon públiko fo'i dia di su yegada na Roma, pa hasi preparashonnan pa su kasamentu.

Por a wak e aktor solamente sintá den van ora el a sali for di Hotel Hassler, kaminda e ta hospedá.
Tom Cruise a yega Roma djaluna último, for di Los Angeles, kompañá pa 10 persona inkluyendo su mama i su 3 yunan.
Funshonarionan di e aeropuerto a afirmá ku Katie Holmes tambe ta na Roma.
E pareha lo kasa djasabra awó, pero no a revelá e lugá.
Spekulashonnan ta apuntá Castillo Odescalchi riba Lago Bracciano, situá pegá ku kapital italiano.

Score: 5.7, Votes: 3

Randolph Gijsbertha di Servisio Inspekshon i Seguridat: “Basta tempu a avisá AMAK, pero no a duna oido”

Tue, 09 May 2006 10:14:07 -0700

Mester remodela stage Festival Center promé ku tur kos!

WILLEMSTAD – Pa basta tempu kaba departamentu di seguridat i Inspekshon a bin ta notifiká Asosashon di Músiko i Artista di Kòrsou riba e estado di e stage di Curaçao Festival Center, sin ku nunka nan a duna oido riba nan atvertensia.

E trabounan di inspekshon ta unu konhunto ku brantwer i DROV i ku ta un rapòrt ta wòrdu traha riba tal investigashon. Esaki LA PRENSA a komprondé di e hefe di servisio, sr. Randolph Gijsbertha den un entrevista awe mainta.

Score: 5.8, Votes: 4

Dia promé di mei na SDK: Marc-O-Mania ku benta di karchi sekshon general pa fl. 75.-

Sat, 29 Apr 2006 21:17:40 -0700

WILLEMSTAD – Marc-O-Mania lo bira un di e atrakshonnan ku lo kulminá ku benta di karchi ku lo kuminsá dia 1 di mei próksimo pa e konsierto di Marc Anthony ku lo keda selebrá dia 27 di mei próksimo.

Riba promé di mei so, tur karchi di sekshon general lo ta na rason di fl. 75.- (OB no ta inkluí). Komo Circle Event ta sigur, ku hopi ta esnan ku lo ta interesá den karchi na e preis aki, a pone e bendementu pa e dia aki so na lokètnan di Sentro Deportivo Kòrsou.

Na e sitio aki lo tin sinku lokèt disponibel pa bende karchi. E sitio di benta di karchi tambe ta un indikashon ku e posibilidat pa un hende yega pa kumpra karchi i keda sin haña karchi a kaba masha chikí mes. E benta ta kuminsá pa 9or di mainta i e ta kaba presis 4or di atardi. Si bo yega un minüt pasá di kuater, bo ta lat i mester warda su manisé pa kumpra e karchi na fl. 95.-.

E Marc-O-Mania ta sigui 2 di mei. Huntu ku e karchinan di sekshon general pa fl. 95, karchinan pa sekshon VIP tambe lo ta na benta for di dia 2 di mei na tur puntonan di benta ku ta Koko Loko, Mensing Caminada, Tik Tak i tur sukursal di Girobank. Preis pa karchi VIP lo ta fl. 300.-.

Despues di mas ku un dékada: Marc Anthony bèk den Curaçao Festival Center

WILLEMSTAD – Den añanan 90, promé ku restu di mundu a deskubri’é, públiko di Kòrsou a konsagr’é komo un artista grandi. Emoshoná pa e aseptashon, ela sigui su konsierto den un tremendo áwaseru. Dia 27 di mei awor, Marc Anthony lo bin rekonektá ku su públiko ku nunka a pèrdè su desaroyo for di bista ora ku ela bai for di Kòrsou.

Circle Events, un organisashon speshalisá riba tereno di espektákulo ta hasi su debut riba e merkado aki tresiendo Marc Anthony. Circle Events tin tur kos reglá i ofisialisá pa e konsierto aki. E proseso pa trese Marc Anthony a kuminsá for di aña pasá ougùstùs. Pero e agènda di e artista ta kompletamente yen. Tabata masha difísil haña un fecha.

Score: 4.3, Votes: 3