Laprensa Newspaper - Deporte

Kopa Polar Undeba 2008 organisá pa Undeba próksimamente

Tue, 19 Aug 2008 16:52:13 -0700

WILLEMSTAD - Pa di tres aña konsekutivo Kuster Trading ku su serbes Polar lo ta e spònser prinsipal pa loke ta e torneo pre-temporada di futbòl organisá pa Undeba.
E weganan tur lo tuma lugá na SOTO-Arena.
Aña pasá un total di 23 wega a ser hungá i un total di 92 gol a keda anotá.
E hungadó Tyron Poulina di e ekipo di Centro Dominguito a anotá e promé gol i Tyron Maria a finalisá e torneo komo máksimo goliadó.
Hungadó Mas Balioso tabata e hungadó Edmond Lodowika i mihó portero Raymar Revierre ámbos hungadónan di e ekipo di Vesta.
Den e kandeloso wega final Vesta a sabi na titulá kampion vensiendo e ekipo organisadó Undeba ku skor di 1-0.
E di terser puesto a bai pa e ekipo trikoló Jong Holland.
Den e buèlta di pèrdèdó e ekipo barika hel di Subt a titulá kampion, miéntras ku Centro Hubenil Mahuma i Real Buena Vista a terminá na e di dos i terser lugá respektivamente.
E kuerpo nan di árbitro K.A.K. i UNREFKO a yuda dirigí e weganan.

Score: 0.0, Votes: 0

Liu a retirá di kareda i a pone China na yoramentu

Tue, 19 Aug 2008 16:42:00 -0700

BEIJING – Na kualke otro siudat, stadion i sirkunstansianan, Liu Xiang ni sikiera lo a presentá su mes.
Su pia drechi tabatin’é for di akshon durante lunanan largu. I un par di dia pasá un molèster a presentá na su hilchi drechi.
Esaki, sin embargo, tabata un sita ku e no por a falta. Esaki ta e Stadion Nashonal, e hoya di e Weganan Olímpiko di Beijing. Djaluna tabata e dia ku su kompatriotanan a spera durante tantu tempu; e úniko strea di China den atletismo dunando komienso na e defensa dilanti su hendenan di e título den 110m ku opstákulo.
Tabata un habri i será di wowo. Liu a tuma despedida kokochando despues di un salida falsu. Esei mes no a deskualifiká niun hende, pero Liu a sinti e verrekking na e múskulo di su pia, el a dal mitar buèlta i a kana bai den e tùnel hibando su speransanan di e gloria olímpiko nobo.
A mir’é ta kokochá i ta skòp kontra muraya den e sala di pre kalentá i hasiendo gestionnan dilanti e opstákulonan instalá pa e último seri di e eliminatorionan. Ora el a retirá su mes, el a ranka e number di inskripshon, i no a papia ku niun hende.
“Liu Xiang nunka lo a retirá su mes a ménos ku e doló ta insoportabel”, Feng Shuyong a bisa, treiner di e ekipo di atletismo chines.
Tambe el a bisa ku e atleta ta “hopi deprimí”.
Su retiro a eliminá e duelo tantu spera ku e doño di e rekòrt mundial, e kubano, Dayron Robles.

Score: 0.0, Votes: 0

Selekshon di Little League di Kòrsou a bombardeá Italia 14-1

Tue, 19 Aug 2008 16:41:22 -0700

WILLIAMSPORT, PA., - Selekshon di Little League di Kòrsou ayera a logra un viktoria di 14-1 riba Italia pa medio di nòkout dilanti di 2400 fanátiko den Volunteer Stadium, pa pone nan rekòrt na 1-1.
Awe nan tin e wega di bida i morto kontra di Guam pa 6’or di atardi tambe na Volunteer Stadium.
Tantu Guam i Kòrsou tin e mesun rekòrt di 1-1 i e ganadó di e partido di awe tardi lo pasa pa e weganan semi final di e Grupo Internashonal.
Mexico ya kaba a gana e pul aki ku rekòrt di 3-0, kaminda nan a gana 6-2 di Kòrsou, 12-0 di Italia i 10-0 di Guam.
Kòrsou ayera a konektá kuater honron di kual dos di Juremi Profar, kende a empuhá shete kareda ku e dos honronnan aki, ya ku e tabata tin un grandslam tambe.
Wega tabata 1-1 den promé ining, pero Kòrsou ta anotá seis kareda i shete kareda den di tres ining.
Den e entrada aki Kòrsou ta konektá tres honron, unu di tres kareda di Profar, su di dos, di Tivon Faneyte i di Hemsley Martha.
Italia ku a partisipá pa di dos bes den e historia di 62 aña di Little League World Series i pa promé bes ku hungadónan ku a nase solamente na Italia.
Na 1979 Italia a partisipá pa promé bes, pero ku muchanan merikano ku tabata biba na Aviano Air Force Base.

Score: 0.0, Votes: 0

Mijail Eisden ta gana di Leonardo Cadeau final Dam Individual 2008

Tue, 19 Aug 2008 16:33:47 -0700

WILLEMSTAD – Djadumingu último a tuma lugá e di sinku buèlta di e final di kampionato di Dam Senior di Kòrsou.
Wilfred Daantje kende mester a hunga kontra di Antonio Marquita, a pèrdè su di dos wega konsekutivo pa default, lokual a nifiká ku outomátikamente su diskualifikashon.
Pa e motibu aki, segun regla, no a hunga ainda e mitar di e total di weganan di e final di kampionato, Daantje su promé tres partidonan a keda anulá.
E sobrá resultadonan di e di sinku buèlta tabata:
Eisden-Cadeau 2-0
Alias-Maduro 2-0
Wilson-Miguel 2-0
Angela-van Eiken 2-0
Leocaria-Monk 2-0
E standing despues di sinku buèlta ta:
-Raoul Alias/Mijail Eisden 5-8
-Nelsen Angela/Antonio Marquita 4-7
-Marvin Leocaria 4-6
-Glenn Monk 5-5
-Mario Wilson 4-4
-Gedion van Eiken 5-3
-Leonardo Cadeau 5-2
-Franklin Maduro 4-0
-Victor Minguel 5-0
Djamars anochi 19 di ougùstùs, e weganan lo kontinuá pa mitar di ocho, 19:30pm, den sala di wega riba e promé piso di San Marco Hotel.

Score: 0.0, Votes: 0

Nadal i Dementieva e bira kampion den tènis

Mon, 18 Aug 2008 18:45:28 -0700

BEIJING – Agregá un oro olímpiko na e lista di logronan di Rafael Nadal. Elena Dementieva finalmente a kaba ku e mala suerte ku tabata pèrsiguié den momento di definí di e sitanan grandi. Fernando Gonzalez mester a konsolá su mes ora el a pensa ku e ta doño di tur e kolónan di medayanan.
Promé ku su subida den tòp di e lista mundial di tènis, e spañó Nadal a likidá e chileño Fernando Gonzalez 6-3, 7-6, 6-3, pa bira e kampion individual olímpiko.
Tabata un otro demostrashon di kontundensia di parti di Nadal, virtualmente invensibel for di mart. Su viktoria na Beijing tabata e di 38 den su último 39 duelonan, un racha ku ta inkluí su di kuater título siguí na Roland Garros i e promé na Wimbledon.
“Ni den mi mihó soñonan mi a imaginámi mes un aña manera esaki”, Nadal a deklará.
E ruso Dementieva, kende na 2004 a pèrdè fásil e finalnan di dos Grand Slam, a bini djatras pa gana su kompatriota Dinara Safina 3-6, 7-5, 6-3, pa e título femenino.
Dementieva di sinku kabes di seri, a haña plata na Sydney 2000 i su título na Beijing ta esun mas importante di su karera.
Su viktoria a kombiná ku e parti di 17 falta dòbel di Safina, un molèster ku na vários okashon tabata e parti dil di Dementieva.
“Nunka m’a spera un medaya... oro plata bròns”, Dementieva a bisa. “P’ami e ta e mihó momento di mi karera”.

Score: 0.0, Votes: 0

Phelps a konkistá su di 8 oro i a superá Mark Spitz

Mon, 18 Aug 2008 18:44:58 -0700

BEIJING – Michael Phelps a kompletá e hazaña históriko di kologá 8 medaya di oro den e Weganan Olímpiko di Beijing komo parti di e relevo di Merka ku djadumingu a gana e 4x100 kombiná i a kibra e empate ku Mark Spitz pa loke ta mas título lográ den un olimpiada so.
Aaron Peirsol, Brendan Hansen, Phelps – kende a landa e pida di mariposa – i Jason Lezak a imponé ku un rekòrt mundial di 3 minüt i 29.34 sekònde, superando e marka bieu di 3:30.68 fihá 4 aña pasá na Atenas.
E rekòrt di Spitz a wanta 36 aña despues di su grandioso aktuashon den e Weganan di Munich.
E merikanonan a bari ku e relevonan maskulino na Beijing, ku Phelps na kabes den 4x100 i 4x400 liber.
Australia a keda ku plata den kombiná ku 3:30.04 i Hapon bròns ku 3:31.18.
Jason Lezak a mantené e promé puesto ku Phelps a entreg’é ora el a kompletá e parti di mariposa i el a rematá dunando Merka e medaya di oro i e rekòrt mundial.
Merka nunka a pèrdè e medaya di e relevo den e Olimpiadanan, pero e biaha aki no tabata fásil. Ora Phelps a bula na awa pa kumpli ku su parti, e merikanonan tabata di tres, tras di Hapon i Australia.
Pero Phelps, ripitiendo e aktuashon ku mas promé a dun’é su di shete medaya di oro, a kue promé lugá, entregando na Lezak e responsabilidat final.
E oustraliano Eamon Sullivan a trata di yega Lezak, i tabata parse ku e ta logra ora el a aserk’é na yegada, pero Lezak a mishi promé pa registrá e di shete rekòrt mundial di Phelps.

Score: 0.0, Votes: 0

Jurrjens despues di wega a bishitá hungadónan

Mon, 18 Aug 2008 18:36:16 -0700

WILLIAMSPORT, PA., - Despues di a yega Williamsports, pa., huntu ku su representante sr. Giovanni Viceisza i representante di CTB, Jair Jurrjens a tira e promé lansamentu pa despues bai un entrevista ku ESPN i sinta huntu ku e fanatikada, manera LA PRENSA a aportá for di djasabra.
Despues di wega ku Kòrsou a kai derotá 6-2 dor di Matamoros, Mexico, e picher di Liga Grandi yu di Kòrsou a bai bishitá e hungadónan lokal den nan kuarto.
Despues di a firma bala i algun artíkulo, el a papia ku e hungadónan pa enkurashá nan.
Tambe el a bai saka pòtrèt ku e hungadónan riba un seru di e parke.
“Mi kera bin e wega aki pa duna nan algun konseho i motivashon. No tin hopi scout di beisbòl ku ta bai Kòrsou, ke men mi ta spera ku mi presensia akinan i e echo ku mi a logra den Liga Grandi, lo enkurashá mas scout di beisbòl pa bishitá e isla”, asina Jurrjens a bisa durante di un rueda di prensa kaminda ku prensa lokal, nashonal i internashonal tabata presente despues di wega. “Ofisina di Turismo di Kòrsou a invitámi pa bini i mi tabata hopi kontentu ku e oportunidat aki”.

Score: 0.0, Votes: 0

Guyana a klasifiká pa e siguiente buèlta den Digicel Caribbean Championship

Mon, 18 Aug 2008 18:28:08 -0700

WILLEMSTAD, - Despues di e inisio eksitoso di Digicel Caribbean Championships aki na Kòrsou ku e weganan di Grupo A, e prestigioso torneo aki a muda pa Guyana na unda e ekiponan di Sürnam, Guyana i Dominica a hunga e partidonan di Grupo B.
E hecho ku e partidonan di Grupo B a tuma lugá na Guyana tabata motibu pa hopi selebrashon.
No solamente e fanatikada di futbòl tabata ansioso pa presensiá e partidonan, pero henter Guyana tabata sumamente orguyoso di e hecho ku Providence Stadium a inougurá nan lusnan i pa promé biaha partidonan por a tuma lugá anochi i di e forma aki, Digicel, e kompania di selular ku mas ta kresiendo den Antia, Karibe i un partisipante nobo den e merkado di Sentro Amérika, a duna inisio na un era nobo den futbòl na Guyana.
E promé enkuentro di e grupo aki a tuma lugá dia 8 di ougùstùs i tabata entre e anfitrionnan di Guyana, e Jaguarnan di Oro, a enfrentá e ekipo di Dominica. Aunke ku e markadó final tabata 3-0 na fabor di Guyana, por bisa ku e fanatikada a gosa di un nivel haltu di futbòl.
E siguiente wega tabata entre e faborito di Grupo B, e ekipo nashonal di Sürnam i Dominica.
Mester bisa si ku e ekipo di Sürnam a hiba un sustu ya ku ta e ekipo di Dominica tabata esunnan ku a skor e promé gol, ora ku Prince Austrie a logra penetrá e arko defendé pa Ronny Aloema.
Dos karchi kòrá kontra e ekipo di Dominca a kambia e dinámika di e partido, ya ku Sürnam a kuminsá dominá i a logra gana e partido ku un skor final di 3 pa 1.

Score: 0.0, Votes: 0

Rossi a gana Gran Premio Cheko di motosiklismo

Mon, 18 Aug 2008 18:27:50 -0700

BRNO, Repúblika Cheko – Valentino Rossi a gana e Gran Premio Cheko di motosiklismo despues ku Casey Stoner a dal i keda for di kompetensia.
E piloto di Yamaha a gana den 43 minüt, 28,841 sekònde i tin 50 punto riba e oustraliano Stoner riba tabla di posishon.
Stoner a sali den grupo den kondishonnan di solo i e tabatin un bentaha sólido riba Rossi promé ku el a dal den di seis buèlta, ora ku e wil dilanti di su motosaikel Ducati a sali for di pista. E oustraliano no por a sigui, pero e no a resultá heridá.
Stoner a sufri un aksidente tambe na Laguna Seca na Monterrey, California, dia 20 di yüli, ora e tabata dilanti. Rossi a gana e kareda ei tambe.
E spañó Roni Elias, tambe di Ducati, a kaba di dos djadumingu, 15,004 sekònde tras di Rossi, E italiano Loris Capirosi tabata di tres ku su Suzuki 21,689 sekònde tras di e lider.
Alex Debon di Spaña a gana pa Aprilia den 250cc i e aleman Stefan Brandl a kue su promé triunfo den 125cc.

--
Petrova a vense Dechy i gana torneo na Mason

MASON, Ohio – Nadia Petrova a dominá Nathalie Dechy 6-2, 6-1, pa gana e torneo habrí di tènis femenino na Mason.
Petrova, kende a yega kuart final di Wimbledon e aña aki, a sigurá su viktoria ku un bala di haltu den su di dos match point, pa gana su promé torneo for di esun bou di dak di Paris na 2007 i su promé na airu liber for di e habrí di Berlin na 2006.

Score: 0.0, Votes: 0

Chelsea a gana fásil 4-0 di Portsmouth bou di Scolari

Mon, 18 Aug 2008 18:27:22 -0700

LONDRES – Chelsea a kuminsá su bida bou di direkshon di Luiz Felipe Scolari ku un viktoria djadumingu 4-0 riba Portsmouth.
Ethe Blues, ku temporada pasá a kaba di dos den Liga Premier i den Liga di Kampionnan tras di Manchester United, a gana fásil di e ganadónan di Kopa FA di 2008 den stadion Stamford Bridge ku golnan di Joe Cole, Nicolas Anelka, Frank Lampard i e debutante Deco.
Tabata un impreshonante aktuashon kontra un ekipo ku hopi a konsiderá kandidato pa e di sinku puesto i probablemente otro trofeo den kampaña, i Chelsea a demostrá muchu mas elegansia i imaginashon ku bou di e predesesor di Scolari, Avram Grant.
Grant a guia Chelsea na dos punto di e título di Premier i apénas un duelo di pinalti di e título di Liga di Kampionnan. E triunfo konvinsente di djadumingu por indiká ku Scolari ta e treiner pa hiba e tim den tòp.
“Tabata mas ku m’a spera”, e treiner brasileño a bisa, kende a mustra su mes típikamente animá den e ekipo. “Awe nan a hunga masha bon. Ta importante, pero mas importante ta ku e fanátikonan di Chelsea a mira un bunita wega”.
Den otro weganan di djadumingu Aston Villa mester a topa Manchester City i Manchester United ku Newcastle.
Djasabra, Arsenal a kuminsá habri temporada ku un valioso triunfo 1-0 riba West Bromwich ku a kaba di promové, pero sin masha kos.
Samir Nasri a anotá na di 4 minüt di su debut den liga pa duna Arsenal e tres punto.

Score: 0.0, Votes: 0

Jair Jurrjens a bai Williamsport serka selekshon di Little League

Sat, 16 Aug 2008 18:07:06 -0700

WILLIAMSPORT, PA., - Awe mainta Jair Jurrjens a bula bai Williamsport, Pa., serka e selekshon Little League di Kòrsou despues di a tira ayera nochi pa Atlanta Braves.
Jurrjens a bai Williamsport, kompañá pa Andrea Thompson di e agensia di relashonnan públiko, pa koordiná entrevista ku prensa.
E koordinashon di e bishita aki a bai via di CTB.
Jair Jurrjens a bira un di e hungadónan faborito di e miembronan di e selekshon di Little League.
El a saka e promé bala di e partido entre Kòrsou i Mexico.
Despues el a bai kumindá e muchanan di Kòrsou.
Luego el a keda di realisá un entrevista na ESPN huntu ku Orel Hershiser ku ta komentarista di e kanal ei.
Mas lat el a keda di bai sinta huntu ku e fanátikonan di Kòrsou den tribuna.
Di e wega di ayera Jurrjens a bisa: “Ta un di e temporadanan, kaminda niun hende no por splika dikon kos ta bayendo asina malu. Tur biaha ku mi sali picha, mi ta trata di duna nan un chèns pa gana. Tin dia kosnan ta sali, i tin dia no. Pero nos ta sigui lucha te ora ku temporada kaba.
Jurrjens, 11-8, a poncha nuebe ayera, e mihó sifra den su karera, pèrmití dos kareda, i niun base por bola durante di shete ining.
Jurrjens a pèrdè tres di su último kuater partidonan, apesar di tabatin un “quality start” di tur e salidanan aki.
Un “quality start” ta ora ku bo tira seis ining òf mas i pèrmití tres kareda òf ménos.

Score: 8.0, Votes: 1

Nadal i Gonzalez ta topa den final di tènis olímpiko

Sat, 16 Aug 2008 17:44:38 -0700

BEIJING – E spañó Rafael Nadal a keda na porta di otro título grandi djabièrnè ora el a pasa pa final di tènis, kaminda e ta warda e chileno Fernando Gonzalez, kende a sobrebibí un wega ku tabata parse pèrdí.
Nadal a derotá e serbio Noval Djokovik den semi final 6-4, 1-6, 6-4 i Gonzalez a dal e merikano James Blake 4-6, 7-5, 11-9.
Gonzalez a gana medaya di ordo den dòbelna Atenas i mester a konformá su mes ku bròns den singel.
E chileno a sigurá medaya di plata kaba i pa keda ku e oro e tin ku derotá un Nadal imparabel, kende a gana e torneonan habri di Fransia i Wimbledon derotando e suizo Roger Federer den e final i e ta e number un di klasifikashon mundial.
Nadal a bisa ku e tabatin suerte di e gana Djokovic riba un kancha rápido.
Den sekshon di hende muhé Dinara Safina a gana e serbio Jelena Jankovic i awor e ta bai topa e chines Li Na i den e otro semi final Elena Dementieva i Vera Zvonareva lo topa otro.

Score: 0.0, Votes: 0

Medayista norkoreano di tiru a tèst positivo pa droga

Sat, 16 Aug 2008 17:43:24 -0700

BEIJING – Un norkoreano kende a gana un par di medaya den tiru i un gimnasta vietnamita a tèst positivo den kontròl anti doping den e Weganan.
Komité Olímpiko Internashonal a informá djabièrnè ku tur dos a keda ekspulsá di e weganan pa uso di sustansia prohibí.
Di e tiradó norkoreano Kim Jong Su nan a kita e medaya di plata ku el a gana ku pistol riba 50m i e bròns di pistol di airu di 10 meter, despues ku el a tèst positivo pa uso di propanolol, un supstansia ku ta usa pa evitá temblamentu di man den algun prueba, manera tiru ku arko.
E medaya di bròns den e prueba di 10m kitá for di Kim a bai pa e merikano Jason Turner. Den 50m, e chines Tan Zongliang a subi pa e plata i e ruso Vladimir Isakov pa esun di bròns.
E gimnasta Thi Ngan Thuong Do a keda último den 82 kompetidó den e prueba riba suela den gimnasia femenino.
E bosero di KOI, Giselle Davies, a bisa ku tur dos deportista a keda ekspulsá di e weganan i nan kredensialnan olímpiko a ser kitá for di nan.
Nan dos a subi na tres e sifranan di atletanan gará pa doping na Beijing. E siklista spañó Maria Isabel Moreno a keda ekspulsá djaluna pa EPO.
Presidente di e komishon médiko di KOI, Arne Ljungqvist, a bisa ku e ta konsiderá Kim “kulpabel di uso konsiente” di un sustansia prohibí, pasobra propanolo ta ofresé benefishinan spesífiko na e tiradónan.

Score: 0.0, Votes: 0

Sueko kende a despresiá medaya por ser kastigá

Sat, 16 Aug 2008 17:40:38 -0700

BEIJING – Un luchadó sueko ku a tira su medaya di bròns na suela lo por ser kastigá pa Komité Olímpiko Internashonal.
KOI a bisa djabièrnè ku el a start un investigashon disiplinario riba e aktitut di Ara Abrahamian, kende a benta e medaya di bròns na suela despues di a pèrdè e oro kontra e italiano Andrea Minguzzi den divishon 84 kilo.
Durante e seremonia di premiashon, e luchadó sueko a kita e medaya for di su garganta i a tira esaki rabiá riba suela.
“Komishon disiplinario ta revisando e situashon aki”, asina e bosero di KOI, Emmanuelle Moreau a bisa. “Nan ta den kontakto ku e Federashon Internashonal”.
Moreau a bisa ku no ta konosí ki kastigu e atleta lo por haña.
Abrahamian mester a ser kontrolá ora el a bai rabiá riba e wesnan ku a duna e italiano komo ganadó.
Despues el a bai furioso i a dal e porta duru ku a sakudí e muraya di e parti di kamerinnan.

Score: 2.0, Votes: 1

Phelps a logra su di seis oro ku otro rekòrt mundial

Sat, 16 Aug 2008 17:40:18 -0700

BEIJING – Merka a dominá den pisina i China tabata invensibel den hisamentu di peso.
Michael Phelps a bini bèk den awa pa sigui skibi su nòmber de buki di rekòrtnan i Merka a gana 4 medaya di oro djabièrnè, tres di nan den landamentu, ku no a yega pa kòrta distansia ku China, ku a kue su di shete i di ocho ora den hisamentu di peso i a presentá un kuarteto di kampionnan.
Di e 18 medaya di oro den kompetensia e di shete dia, chines- i merikanonan a parti ocho den nan dos. Ukrania i Eslovakia a gana dos kada un, i Polonia, Fransia, Inglatera, Etiopia, Hapon i Alemania a tuma e otronan.
China a keda na kabes di tabla ku 26 di oro, 12 mas ku Merka. Alemania ta di tres ku 8 oro, djei Sur Korea, Italia i Hapon ku 6 kada un
Den asuntu di total, Merka tin 46 (14-13-19), China ku 41 (26-9-6) i Oustralia ku 20 (5-7-8).
E aktuashon di Phelps pa historia ya no ta sorpresa i kasi a bira un rutina: e tribon di 23 aña a kue su di seis oro, e biaha aki den 200m kombiná, ku mes tantu rèkòrt mundial. Awe e ta buska su di 7 den 100m mariposa, i si e gana lo e empatá e marka di su kompatriota Mark Spiz di mas medaya di oro den e mesun olimpiada.
Phelps ya tin e honor di ta e atleta ku a gana mas oro den historia dje weganan, ku 12 oro, na kua e por agregá un par mas promé ku su marcha triunfal kaba na Beijing.
E no a kompetí den finalnan djaweps, i Merka a sinti esei. Su regreso e dia siguiente parse a inspirá su kompañeronan ku a bai ku dos otro medaya di oro entre e kuater ku a repartí den pisina. Ryan Lochte a gana den 200m lomba i Rebecca Soni den 200 pechu femenino, tur dos ku rekòrt mundial

Score: 0.0, Votes: 0