Laprensa Newspaper - Lorito

Lorito 5 Oktober 2008

Mon, 06 Oct 2008 22:39:06 -0700

Lorito ta yama tur hende un felis djaluna. Esta un djaluna. Awa a kai i tòg tabata “hot”. Un saludo pa Marvis ku a yama nos pa splika nos di kon nos no a haña kuminda di para e aña aki. Nos a komprondé masha bon ku nos no a komportá dje bon ei! Por ta otro aña si!
****
Ai, ai, ai! Nos a tende ku banda di e wega Bingo Blinko tin awor aki un wega ku yama Bula Bala. Hendenan ku ta wak TV tur dia a bisa nos ku ta masha remarkabel ku a salta diferente front-page impaktante di korant. Lorito di ku e no kier ta den e kosnan ei, pero di otro banda e mester kumpli ku su fiel lesadónan. E wega nobo, riba instrukshon di hefe direkto, yama Bula Bala! Danki Dios Lorito su wega preferí yama Bula Leu!
****
Ata otro wega mas! Un wega pa pone pòrtrèt di un kos ku a frakasá ku masha hende mes. Ora wak bon ta pòrtrèt di aña pasá. Masha hende a bisa nos ku e kos no a bai bon te pa hasi komo si fuera e tabata un éksito. Ta ki yama e wega ei anto? Buladeifi?
****
Nos kier a manda saludo pa dos famia ku a lanta awe den tristesa profundo. Tráfiko di Kòrsou ta sigui insigur i prinsipalmente ora awa kai, nos tur mester ta mas kouteloso. Algun hende tabata ranka awe mainta riba kaminda muhá ku Dios di ta basta. Pasikiko? Ni skol no tin pa hasi asina tantu beheit riba kaminda!
****
Un saludo pa nos amigu Pop ku pèrdida di su yu muhé. Pop aki ta un hende di tur hende i ta ku hopi tristesa nos a tuma nota di loke a pasa. Outoridatnan a hasi e doló mas grandi ora ku a midi ku dos midí. Nos no ta komprondé tin biaha ta kon e tipo di kosnan aki ta pasa.

Score: 0.0, Votes: 0

Lorito 4 Oktober 2008

Sat, 04 Oct 2008 20:24:06 -0700

Lorito ta yama tur hende un felis djasabra. Naturalmente Lorito ta pendiente kuantu hende lo manda kuminda di para pe awe. Nos no a tende di Marvis awe ku tur aña ta yama nos riba nos dia. Marvis, nos no a lubidá riba nos regalo di tur aña!
*********
Un pabien na tur animal awe, entre nan Prikichi, Nòñò, Wiwi, Focks, Fifty, Rico, Lady, Snuchi, Max, Fidel, Hugo, Beauty, Dukey, Beaver, Kew Kew, Beyonce, Big Mac, Kabul, Kachochi, Mupi, Negrita, Maron, Caspar, etc. etc.
**********
Nos a lanta den bon ambiente awe despues di mira kon dos aktividat na Kòrsou ta demostrá kon nèchi hende nos ta i kon nos ta (i por) komportá. E homenahe na Churandy a kana masha bunita, ounke pa nos pensamentu por tabatin mas hende. Posiblemente e momentum a bisa den e kaso di Churandy. Hopi hende ta simpatisá kuné, pero no tabatin e energia despues di un siman di trabou pa sali for di nan kas bai stadion. Di tur manera pueblo a kumpli ku su yu.
*********
Awe ta bai tin un aktividat mas i nos ta spera ku Churandy lo sigui trata tur hende meskos i sin restrikshon. Un biaha mas a resultá ayera e diversidat di nos pueblo, pasobra ta for di tur gremio a sali hende pa partisipá na e homenahe aki. Nan a manda un señal kla tambe ku e profetanan di maldat (sòri Nelson, nos a usa bo palabranan!), lo no haña fèrtil na Kòrsou. E pueblo aki lo rechasá nan tur na nan debido tempu! No por ta otro, pasobra e pueblo aki ke biba den harmonia.
*********

Score: 0.0, Votes: 0

Lorito 3 Oktober 2008

Sat, 04 Oct 2008 05:53:38 -0700

Lorito ta yama tur hende un felis djabièrnè. Nos a pasa na yegada di Churandy i tabatin masha hende entusiasmá. Despues a bai konferensha di prensa kaminda tambe tabatin yen di hende ta warda, inkluyendo diferente hende for di Venezuela. Nan tur tabata ke saka pòtrèt ku nos Churandy. Esei ta un indikashon kon deporte ta uni pueblonan.
*********
Churandy, Lorito ke deseábu un felis estadia aki. Nos sa ku bo ta sinti bo hopi emoshoná i honrá pa e homenahe aki. Kere nos ku bo meresé! Nos lo bula wak i sigui tur aktividat di serka!
*********
Lorito tabatin e oportunidat tambe pa bai Staten di Antia ayera. Na yegada un dama a pretendé ku nos no por a drenta komo ku no tin lugá. Nos a bis’é bon kla ku ta un reunion di karakter públiko tin i no por stroba niun hende di drenta. Si Staten tin un seshon públiko i no tin lugá, ta Staten mester karga e konsekuensia aki i no a hende ku kier sigui e debatenan di serka. Nos ta kere ku mester atendé e kos aki purá.
*********
Staten a reuní na e edifisio kaminda ántes tabata Banko Sentral, pasobra na su edifisio mes tin yen di problema, entre otro ku zonidu. Di loke nos a sigui ayera por bisa ku e diskushonnan sigur tabata na nivel, ku eksepshon di algun parlamentario ku no por evitá di ta “chistoso”. Un di nan a puntra ki dia euro ta bira 10 florin! E kos a keda manera kos ku e no tin nada di hasi!
*********
Presidente di Banko Sentral a kontestá tur pregunta den e kaso aki. Un kos ku a resultá masha preokupante ta ku APNA a pèrdè den e último lunanan mas ku 160 mion florin riba su invershonnan. Awor aki e por kubri 98 porshento di penshun. Promé ku e krísis na Merka esei tabata 101 porshento. E situashon ta nifiká ku APNA mester trata di rekuperá e diferensha i den e kaso mas ekstremo lo mester subi prima. Ya bo sa ku e krísis na Merka no ta kos di hasi wega kuné.

Score: 0.0, Votes: 0

Lorito 2 Oktober 2008

Thu, 02 Oct 2008 19:08:03 -0700

Prof. dr. Lorito ta yama tur hende un felis djaweps. Ta masha kos ta pasando den e dianan aki. Lorito a bula masha hopi kilometer tras di otro pa sigui e kos aki, despues e otro kos aya i finalmente wak si por a haña un palu den mondi pa sosegá riba dje. Bida di loritonan no ta fásil!
*********
Awe mainta Lorito a topa Doña Zita tur na kòrá. Nos ta komprondé p’e, pasobra ora bo yega kas lat anochi ta masha difísil pa bo prepará loke bo ta bisti pa e siguiente dia. Ademas kòrá a ked’é masha bunita mes (mas mihó ku hel!). Doña Zita ta kontentu, pasobra kon ku bo bòltu i bir’é, e deliberashonnan di ayera a tapa boka di hopi hende!
*********
Kòrsou ta riba kaminda pa status outónomo, ounke Lorito mes ta antisipá masha problema ainda. Un di nan ta kon i unda ta bai posishoná empleadonan públiko di Land. Algun di nan a keda yama Lorito ku insistensia pa bisa, ku nan ta masha preokupá. Ke hinka nan den un situashon transitorio, pero nan no ke tende di nada transitorio si no tin garantia pretu riba blanku pa futuro. “Nos a siña nos lès ku e promesanan di gobièrnu”, asina un di nan a bisa. Nos ta kere ku nan ta hasi masha bon pa tin sierto koutela!
*********
Imaginábu nan mandabu di Ministerio di Enseñansa pa Servisio di Enseñansa anto nada no ta kla. Imaginábu ku no tin ni stul pa sinta. Ta kon ta hasi. Imaginábo nan mandabu di Ministerio di Asuntunan Ekonómiko pa DEZ. Anto ta ken ta bira e hefe anto? Tur ta puntonan ku mester atendé ainda i no ta masha kla! Personalmente Lorito ta tene su kurason pa kualke káos ku lo surgi!

Score: 0.0, Votes: 0

Lorito 1 Oktober 2008

Wed, 01 Oct 2008 20:49:44 -0700

Lorito ta yama tur hende un felis djarason. Awe ta dia promé di òktober. Ta masha kos tin awe. Awe ta dia di Lisa, Maria i Dulce. Un pabien pa nan tur. Awe ta Dia di Hende Grandi i Lorito kier a manda un felisitashon pa tur Lora. Sigui papia bai!
****
Lorito a bai bula direkshon di hemisferio nort i diripiente nos a mira nubianan skur ta biniendo den nos direkshon. Promé nos a kere ku tabata un tormenta tropikal pero ora nos a wak bon, a resultá ta e krísis finansiero ta wayando den nos direkshon. Nos di: abrenusia. Ta di kon niun hende no a atvertí nos mas promé!
****
Lorito ta insistí ku nos ta balotando e krísis aki. Nunka nos no tabata masha bon komo kolektividat di antisipá desaroyonan na nivel internashonal. Nos a kere ku e biaha aki tabata diripiente pero ta resultá ku esei un biaha mas no ta e kaso. Ta kon bin nos no ta logra kada bes di nobo anto i ta warda te ora sla kue nos kurpa òf ora kosnan ta serka pa tuma medida?
****
Lorito a bula tambe banda di Marriott pa nos wak ki tin. Nos a mira un par di hende pará banda di mata i nos a kere ku ta benta di mata tin. Ora nos a bai wak bon ta algun pipita di hende tabata manifestando kontra Ank i nos mes hendenan. Honestamente bisá nos ta haña esei un poko lástima komo ku nos ta kere ku riba tereno estatal mester kai algun palabra mas duru. Muchu poko informashon i ketu bai Ulanda ku e “regie” di e proseso ku ta NOS proseso!
****
Parse ku ta masha bashamentu abou tabatin serka e komishon di UNA riba e situashon na SEF. Lorito a tende ku sekretario di e komishon Stella van Rijn tabatin man yen i a keda bati su kòmpiuter pa tuma tur informashon ku Dios di ta basta. Bo a tende tambe a hasi un fayo bisando na e stakeholdernan den un karta ku ta KPMG ta enkargá ku e sekretariado. Despues a resultá ku KPMG no tabata por i a pidi tur dokumentu bèk! Lebumai nos!

Score: 0.0, Votes: 0

Lorito 30 September 2008

Tue, 30 Sep 2008 15:50:08 -0700

Prof. dr. Lorito ta yama tur hende un felis djamars. Nos dicho di awe ta bisa asina aki: “Imperio romano a kibra di paden!” E ta referí na yen di kos ku ta pasando tantu mundialmente komo lokalmente.
****
Lorito ta kontentu ku a kuminsá aktua duru kontra e fenómeno di ‘fever’, pasobra kaminda tin ‘fever’ si Lorito no ta i no por bula. Lorito tin masha miedu di tur otro kos ku por bula bin den su direkshon. Imaginábo un outo den aire den nos direkshon. Di tur manera, bon trabou di polis! Awor mester wak pa sigui i no bira slap atrobe manera hopi biaha sa pasa. Un biaha mas nos ta boga pa un 0 Toleransha real i no esun ku nos a mira den último añanan stail di mitar mitar. Mester aktua ku man duru ku e supkultura ku kier hasi Kòrsou di dje. Mustra nan ku nos ta un isla (pronto un pais) di regla! Esun ku no gusta, hala kita òf bai biba den desierto!
****
Por sierto Lorito a tuma nota ku nèt promé ku un reunion importante riba kon lo bai hinka struktura di polis den otro, polis ta duna sifranan di su logronan. E kos a keda manera un hende òf un grupo di hende no ta masha kontentu ku Ulanda kier tuma kòntròl di hustisia i di polis. Nan no sa ku masha dia hopi hende a disidí kaba ku esei ta mihó kos pa hasi. Polisnan mester prepará pa nan bai traha duru pasobra tin un otro struktura na kaminda. Asuntu di “many chiefs, little indians” pronto lo kaba!
****
Bo tabata sa ku den e último enkuestanan ku a tene mas ku 75 porshento di hende a bisa ku nan kier bai kai direktamente bou di Ulanda? Tres aña pasá ainda esei tabata 25 porshentu. Ora e sifra aki krese dje tantu ei, e ta un indikashon ku hendenan ta fadá ku e situashon aktual. Nos a yega di atvertí koalishon i oposishon den pasado kaba: sigui bringa i finalmente nos lo haña nos ku un kos kompletamente diferente ku pueblo tabata ke den promé instansha: Kòrsou lo bira parti di BESC!

Score: 0.0, Votes: 0

Lorito 29 September 2008

Mon, 29 Sep 2008 19:36:49 -0700

Prof. dr. Lorito ta yama tur hende un felis siman. Ta masha kos mes ta pasando den e dianan aki, di manera ku nos ta kuminsá dunabu nan mesora i aki aya ku nos komentarionan ku bo ta kustumá ku nan.
*********
Tumbabo riba Áwasa a resultá un bunita eksperensia. Lástima ku e promoshon no tabata dje bon ei i sigur no masal. No opstante esei, e públiko presente a gosa masha di e bunita interpretashonnan ku e grupo enkabesá pa Randal Corsen a duna. Bo mester a mira Lutmila gosa i baila! Asina mester ta! Un saludo tambe pa Helen ku for di despues ku el a bai pèrdè na Washington, nos no a mira mas i ta bèk den gran forma!
*********
Lorito mes no por a yega na ora na Áwasa pa motibu di un otro kompromiso djis ei banda ku e hendenan di RBTT. Un ambiente bunita i di hende nèchi. Un saludo pa entre otro Daisy, Clifton i Almerina, ku a risibí prensa man habrí. Bo tabata sa ku Almerina gusta su Lorito? Clifton a anunsiá, ku kuminsando otro aña, RBTT lo sera luna di prensa den sèptèmber. Nos ta spera ku otro aña lo tin hopi kos di selebrá, entre otro un direktiva nobo di prensa i por ta hasta un otro organisashon!
*********
Lorito a komprondé, ku tin un moveshon ta tumando lugá pa buska un solushon pa e situashon ku tin awor aki den e asosashon di prensa. Nada kontra esun òf esnan (nos no sa ta ken i kuantu hende) ku ta den e direktiva aktual, pero asina aki no por sigui. Manera un hende prominente a bisa nos: boso ta eksigí tur dia di tur hende pa drecha nan asuntunan. Awor a bira tempu pa boso drecha boso kos, boso mes! Rason!

Score: 0.0, Votes: 0

Lorito 26 September 2008

Fri, 26 Sep 2008 16:47:21 -0700

Prof. dr. Lorito (MURP, SLURP) ta yama tur hende un felis dia. Awe ya kaba ta djabièrnè, sèptèmber ta den su rosea final i asina aki nos ta kla pa drenta e último buèlta di aña 2008. Ken por a kere ku kos ta bayendo asina lihé. Tin un hende por chek e oloshi di universo pa nos si e ta kanando bon?
*********
E postema di basta tempu a bula na DCV. Despues ku DCV a pèrdè diferente trahadó balioso (Isa, Hubert, Aldrich), tabata konosí ku kosnan no ta bayendo bon na e servisio aki. A tene un prosedura di solisitut pa nombra un hefe i te awe no a konkluí e proseso. Esei ta un indikashon ku e gobièrnu aki tambe ta kon ku ta den su prosesonan. Di kon no a sigui e rekomendashonnan di e proseso di solisitut? Ki miedu tin? Òf e hendenan ku a sali mihó no ta kumbiní (polítikamente)?
*********
Nos ta preokupá pa un otro desaroyo mas: Humphrey ta basha abou i na lugá di primié pa su kurashi, ta hal’é un banda. Esei ta típikamente e polítika tradishonal ku a hinka e lugá aki den su chokumpe. Nos ta kere ku a bria tempu pa porfin bin un lei ku ta protehá batidónan di bèl manera Humphrey. Kada bes ku un hende kier hasi un kos pa mihó, na lugá di esnan ku no ta hasiendo nan trabou sufri e konsekuensianan, e hende ku basha abou ta haña e konsekuensia direkto! Lebumai nos!
*********
Na Curoil tur hende ta pendiente pa otro siman, pasobra awor si e rapòrt lo bin kla. Nos a topa un hende haltu ayera ku no kier a bisa masha. E úniko kos ku el a bisa nos ta, ku e hecho ku a sigui buska ta un indikashon ku mester tin kos ku no ta masha kla. Por lo demas el a kore limpi bai! Ban wak kiko e ekspertonan forénsiko a haña den e kaso aki.

Score: 8.0, Votes: 1

Lorito 25 September 2008

Thu, 25 Sep 2008 17:43:25 -0700

Prof. Dr. Lorito (MURP, SLURP) ta yama tur hende un felis djaweps. Basta kos ta pasando tur kaminda i Lorito no tin sufisiente hala, ni orea ni wowo pa sigui nan tur. Danki Dios nos tin un netwerk ku ta tene nos na altura di tur kos. Nos ta yam’é “Lorito’s netwerk!” of “Lorito’s network”. Whatever!
*********
Masha kos William Marlin a hasi pa splika prensa di kon Maria Buncamper-Molanus mester a baha. Finalmente nan a baha Doña Maria, pero manera nos a informá, e Maria ei tambe a bisa “I shall return” i el a regresá. Lorito mester bisa, ku Doña Maria di DP a hinka su mes realmente den un situashon masha ferfelu i a rekonosé ku tabatin konflikto di interes na Telem. Nos ta gusta masha ora mandatarionan rekonosé nan eror (nan) pasobra esei ta demostrá ku nan tambe ta hende!
*********
Awor William a haña e kuenta presentá di otro banda. Via di Gezaghèber e wega a bai rònt kontra Doña Joan di e partido di Marlin. Doña Joan a hañ’é ta baha awe. Kiko bo ta kere? Awor si no por haña William pa un splikashon konkreto niun kaminda. Ayera el a duna un splikashon masha fofo na Sint Maarten i bo ta sinti ku e no ta masha kontentu. Anto e no por sali for di gobièrnu tampoko, pasobra Roland ta dushi sintá den e stul di minister i por sierto no ta hasiendo un mal trabou.
*********
Awe nos a hari masha ora ku un kolega di nos a yama nos tur disgustá, pasobra ora el a haña William na telefon, e polítiko a bis’é pa no strob’é, pasobra e ta hasiendo kompra. Imaginábu: un miembro di Staten di Antia den pleno mainta ta hasiendo kompra i no por splika kiko ta pasando den su partido! No tin otro ora pa hasi kompra! T’asina ta usa nos fondo di belasting! Nos a bisa e kolega ku e mihó kos ku e por hasi ta para na porta di kasino di Marriott awe nochi i e lo haña nan tur!

Score: 0.0, Votes: 0

Lorito 24 September 2008

Wed, 24 Sep 2008 19:14:22 -0700

Lorito ta yama tur hende un felis dia. Awe ta djarason, nos ala ta muha, nos beis un poko mas mihó. Un saludo pa esnan ku gusta asuntu di kremp ora awa ta kai. Lorito mes ta bon tapá, pasobra nos no kier tende nada di bos. Asuntu di bos ku ta dal masha duru no ta kombiná ku bula den aire liber!
*********
Un hende por splika nos un kos: gobièrnu ta para dos NV di bai korte ku otro, pasobra e kos ta masha mahos. Awor un NV ta bai korte kontra gobièrnu i esei si no ta mahos? Ta parse nos ku un kaso di un NV kontra gobièrnu ta mas mahos ku dos NV di gobièrnu kontra otro. Kere nos ku nos a pèrdè tur lógika!
*********
E úniko splikashon ku nos tin ta, ku den e kaso di e dos NV-nan, ta e mesun diputado tin e karteranan. Den e kaso di e otro NV (Aqualectra) ku a kuminsá un kaso kontra Gobièrnu e kartera ta den man di un otro diputado. Pa pueblo sinembargo gobièrnu ta gobièrnu i no ta importá ken ta kua kartera! Lebumai nos!
*********
Lorito no gusta masha ku hende ku sa mihó ta reklamá e situashon aktual. Dia ku mester a ahustá preis i nos a supsidiá preis, niun hende no a reklamá ku bon mirá, preis mester a subi! Komersio a keda ketu, sindikato a keda ketu, prensa a keda ketu, Lorito a keda manera ami so den boso. Nos tabata sa ku un dia e situashon aki lo venga i dicho hecho: asina ta!
*********
Tin un kos ku yama lógika. Un kos ku nos mester bai siña traha kuné na Kòrsou ta e konsepto aki. E sòm ta masha fásil: ta yega un momentu ku bo ta haña e kuenta presentá. E ora a yega awor! No tin moda di hasi. E kos mas serio ta ora ku ekspertonan finansiero, ekonomistanan i hende ku lógika ku sa mihó ta pretendé otro! Esei si ta kontra tur lógika i nan ta hasi nan mes hopi ridíkulo!

Score: 0.0, Votes: 0

Lorito 23 September 2008

Tue, 23 Sep 2008 21:10:39 -0700

Lorito ta yama tur hende un felis djamars. Bo por kere ku poko poko sèptèmber tambe ta slep bai. Ya kaba nos a tende diferente hende papia di fin di aña i hasta e palabra vürwèrk a kai. Inkreibel kon dianan ta bulando. Kòrda no warda dia pasa, pero gosa di bida for di awor. Masha hende nos a tende papia di gosa nan bida i awor nan no t’ei mas!
*********
Parse ku den e kaso di Curoil tabatin kantamentu ku Doble mes lo a bisa ta basta awor. Ta e kantamentu aki a pone ku e rapòrt ku mester tabata kla awe no ta kla ainda. Lorito a tende asuntu di 400 mil dollar ku ainda no a bin bèk. E ekspertonan di FCS ta man yen den e kaso aki. Aparentemente nan a kere ku ta un tarea fásil, pero a resultá, ku kosnan tabata mas kompliká ku nan a antisipá.
*********
Tin un kos típiko ta pasa kada bes na Kòrsou: ta anunsiá un fecha pa un kos ta kla, despues kosnan no ta kla na e fecha indiká. Nos ta menshoná fecha pa rapòrt ta kla, pa análisis ta kla, pa informe ta kla, pa relato ta kla, pa investigashon ta kla, pa status aparte ta kla, pa desmantelashon ta kla. Mayoria di nan no ta logra na e fecha menshoná. Di kon menshoná fecha anto?
*********
Nos a tende, ku meimei di tur e kontroversia ku tin pa loke ta trata e asuntu di bono na Wega di Number Kòrsou, e direktor a biaha pa Roma. Parse ku tin un kongreso riba regulashon di weganan di plaka. Ku ni aki nos no por regulá nos kosnan, ta kiko nos ta bai buska sa afó anto?
*********
Lorito a kuminsá kansa di tur e biahamentunan ku ta tumando lugá sin ku ta duna un splikashon kiko ta nan meta eksakto. Biahamentu den gobièrnunan, NV-nan di gobièrnu i fundashonnan a bira kosnan di tur dia, ku hasta nos a kere ku ta mihó gobièrnu buska un òf mas avion, pa asina baha e gastunan di biahe. Por yama e avion: “Nos ta bai atrobe”!
*********
E kaso di Doña Joan a keda masha mahos i un biaha mas ta hinka Sint Maarten den sentro di atenshon negativo. Ya kaba tabatin e kaso Buncamper-Molanus ku a keda masha krekeché. Hasta Ank a mete su mes den e kaso aki. Sint Maarten ta sigui hunga ku kandela i por hañ’é un di e dianan ku e informashon ofisial ku e isla no ta kla pa status outónomo. E korant mas importante di e isla tambe a referí na esei awe, bisando ku mester bai kumpli ku regla riba e isla!
*********
Nos a sostené semper e trabou di DARE, pero awe mainta ku nos tabatin mester di nan ku urgensia, niun di nan telefon na e stashon di DARE no tabata wòrdu hisa. Pa kolmo e telefon di e kordinadó tambe a keda rin te bai gol. Nos a kere semper ku DARE t’ei pa yuda den kasonan di emergensia tambe, pero awe nos a haña sa, ku esei no ta e kaso. Un rekomendashon: di kon asina tantu telefon si no ta hisa niun?
*********
Bo ta kere ku Peter de Vries por a haña un Emmy pa e entrevista fofo di un infiltrante ku Joran van der Sloot? Lorito a bisa, ku e biaha aki e mes ta bai traha un entrevista pa wak si otro aña e ta haña un Emmy. Na Merka nan a bisa ku de Vries a haña un Emmy pa Natalee!
*********
Awor ta Boneiru tin su kaso di Natalee. Un mucha blondine a pèrdè. Loke nos a ripará, ku prensa ulandes a bisa ku “Nederlandse ontvoerd op Bonaire”. Meimei di e artíkulo ta skibí ku e dama a nase na Kòrsou. Ra, ra, ra! Lekker sensationeel!
*********
Nos ta keda te aki awe. Kuida kurpa. Demasiado hende ku mal beis ta kana rònt den e dianan aki. Awor ku Siman di Kultura a pasa, nan a bin bèk ku nan mal beis ku forsa retro aktivo. Bula limpi bai! Te mañan ku Dios su poder!

Score: 0.0, Votes: 0

Lorito 20 September 2008

Sat, 20 Sep 2008 21:22:44 -0700

Prof. dr. Lorito ta yama tur hende un felis djasabra. Awa a stòp di kai pasobra hopi hende a zundra. Nan a zundra te lubidá ku ta Siman di Kultura. Despues un hende a pidi nan masha ordensia!
*********
Un biaha mas áwaseru di ayera a kai poko, a demostrá kon defisiente nos infrastruktura ta. Poko awa, yen di problema! Nos tabata splika un otro lora konosí ku nos no ta realisá sufisientemente, ku na momentu ku nos a haña un bon tormenta (Dios spar nos!), kiko lo pasa. Nos a siña hopi bon kos di ulandesnan. Un kos ku nos no a siña ta kon traha kaminda i kon laga awa bai! Tin biaha nos tin impreshon, ku ta pa malu djis pa haña proyekto despues!

(foto lorito)
*********
Un saludo pa nos amigunan di Yankees ku mañan lo hunga nan último wega di e temporada aki. Niun hende no por a kere ku eksepshon di Lorito ku a bisa, ku promé ku 2025 nos lo no mira Yankees mas den post-temporada! Nan a laga sa, ku nos boka ta masha mará. Nos a bisa nan, ku no ta nos boka ta mará, pero ta bon analista nos ta!
*********
Un saludo pa hopi Yankees ku mañan lo bai misa pa yama Dios danki no opstante tur kos. Nos mester rekonosé ku un post-temporada sin Yankees ta un poko fastioso (nos no tin hende pa mama nan gai mas) pero e no ta ménos interesante ku hopi otro bon ekipo!
*********
Un saludo pa e lista largu di Yankees ku a kere ku ainda nan por a bin bèk, pero si nan a skucha Lorito nan no tin nodi di bai den luto awe numa. Un saludo pa Paul, Daniel, Chicho, Taffy, Henry (na Aruba) i tur e otronan. Kere nos ku nos ta kompartí den boso duele. Next 10 years better luck!

Score: 0.0, Votes: 0

Lorito 17 September 2008

Wed, 17 Sep 2008 18:28:16 -0700

Lorito ta yama tur hende un felis djarason. Ata e wega di SEI a bai rònt. Despues ku tantu a pusha i bisa ku awor si nos ta bai haña bienestar i progreso ta resultá ku nos mes no por keda kla ku hopi kos. Kon ta posibel ku e representante ulandes mester revelá ku kos no ta bai bon ku SEI? Kisas ta bai bisa awor ku ta komo no a duna e kompania aya e trabou di sekretariado, kosnan a pega? Nos tin gana di tende e argumentu. Nos a atvertí un biaha kaba i nos ta bolbe atvertí ku ta masha kontra-produktivo ora ku komo partido i/òf koalishon bo traha duru pa realisá un kos, krea un panorama di promesa i espektativa grandi i bo mes no ta kumpli!
*********
Ta na radio Lorito a tende ayera ku tabatin un seminario interesante riba asuntunan ekonómiko, e biaha aki ku énfasis riba empresa chikí i mediano. Ta un lástima ku e organisadónan (DEZ?), no a duna masha publisidat na e anochi aki, pasobra di loke nos a tende, nos por a saka afó ku tabatin algun informashon masha valioso di oradornan di taya manera John Jacobs, Arthur Rosario i Ron Gomes Casseres. Parse ku tabatin tambe presente un tal Steve Reed di Barbados ku a bin papia, pero si niun hende no sa, sala lo keda bashí! Un’ ta piká?
*********
Nos ta kere ku e tipo di seminario i interkambionan aki ta masha bon idea, pero si e públiko grandi en general no sa esei (inkluso ku tin transmishon na radio!), e ora ei e esfuerso ta bai un poko pèrdí. Ayera a papia hopi riba empresanan chikí i mediano ku no t’ei mas. Irónikamente ku e esfuersonan pa tene e seminario ayera ta un bon idea, pero e mester ta kompañá ku un bon promoshon. Si no tin sèn pa un bon promoshon di un seminario, ta kon ta pretendé di promové un sektor sólido di empresa chikí i mediano?

Score: 6.0, Votes: 1

Lorito 16 September 2008

Tue, 16 Sep 2008 21:25:28 -0700

Lorito ta yama tur hende un felis djamars. Djamars ta dia di soda. Ta nifiká ku awe Lorito su alanan ta plak na otro i nos no por move masha leu. Pero komo ku nos ta un Lorito ku wowo di falki, di leu mes nos ta mira ku tur kaminda tin masha ambiente. Ata nos a topa Shon Rosa ku su saya folklóriko ku ta kapta atenshon tur kaminda.
*********
Loke ta bon di Siman di Kultura ta, ku tur kaminda tin un entusiasmo masha grandi. Ta manera kos ku nos a redeskubrí Kòrsou. Nos ta spera ku e ánimo aki ta keda tambe despues di e siman aki. Lorito a keda masha kontentu, ora nos a tende den kaya kon e hendenan ta deseá otro bon Siman di Kultura. Tabatin algun hende ku a yama nos spesialmente pa bisa nos pa bisa un felis Siman di Kultura. Nos tambe a yama un par di hende pa deseá nan tur kos bon!
*********
Den Konseho Insular a pèrdè un oportunidat klave pa demostrá ku nos por uni. Lorito tambe ta kere ku henter e asuntu di Struktura Estatal mester bai un plataforma mas haltu. Manera Ron a bisa ayera bon kla: no ta bon idea pa 11 miembro so disidí riba tur asuntu estatal. E ta manda un mal señal i nos ta kuminsá un pais dividí. Nos a spera ku sikiera den e Siman di Kultura aki nos lo a demostrá un poko mas union, vishon i armonia! Lástima, pero un biaha mas un oportunidat pèrdí!
*********
Nos kier a manda un pabien awe pa Dimitri Cloose ku su funshon nobo na CPA. Lorito a tende ku Dimitri a sali komo e mihó den esnan ku a solisitá pa e puesto ku Jan Sierhuis a bai laga atras. Dimitri a traha den pasado na Museo Marítimo i awendia na Fundashon Era Nobo.

Score: 6.0, Votes: 1

Lorito 15 September 2008

Mon, 15 Sep 2008 17:42:58 -0700

Lorito ta yama tur hende un felis djaluna. Nos a bula hopi den fin di siman i nos alanan a keda kansá. Pero tabata dushi si! Nos a topa yen di hende ku nos tin masha tempu sin mira. Un saludo pa pastor Simon, pa Doña Omayra, Ompi Elis, Boy Dap, Eddie Pietersz-Heiliger, Doña Suzy Römer i otronan ku nos a topa den masha bon ambiente.
*********
E mainta ku Sonia Garmers na Biblioteka Públiko tabata unu ku masha ambiente. Bo mes sa, Sonia ta keda Sonia. Na su edat Sonia no tin nodi di skonde nada mas. Nos a gusta ora el a konta ku su hefe di e tempu ei (Doña Helen) no tabata ke pa el a toka e piesa Mea Maria Mea dia ku Maria Liberia tabata na Kòpi Kòfi. Un bon anékdota esei tabata!
*********
(foto shon ki)

Nos a bai un ratu tambe e fiesta di Skon Ki, maestro di dominó ku a parti sapatu rònt Kòrsou. Hopi bon ambiente ku Krisnha i Michael. Toka mes e hendenan ei ta toka i animá fiesta. Un saludo pa “Lisinbein” Ibi ku tambe nos tabatin masha tempu sin mira. Nos a kere sigur ku nos lo a tende e piesa Lisinbein, pero Ibi di, ku awor aki no ta tempu di karnaval. Nos a bis’é, ku ta Siman di Kultura i ku piesanan di karnaval tambe ta parti di nos kultura! Di tur manera nos a keda ku gana di tende e piesa. Nos ta bai pidi Carlos tok’é na Mi95.
*********
Pa nos di bon, nos a tende einan tambe e piesa “Ta Muhé ta manda mundu” pa di dies bes ayera. Ta kasualidat? Waya Lorito a keda waya riba e piesa!

Score: 6.0, Votes: 1